InfoHub Logo

Sońǵy jyldary jastar arasynda qazaqtyń dástúrine jat «Helloýın» meıramy keńinen tanymal bolyp, toılanyp júr. Bıyl onyń merekelenýine Qaraǵandy memlekettik tehnıkalyq ýnıversıteti de atsalysqan.

Qaraǵandy memlekettik tehnıkalyq ýnıversıtetiniń 50-ge tarta stýdenti men magıstranty qazaqqa jat «Helloýın» merekesin toılaǵan. Sharaǵa atalǵan ýnıversıtettń oqytýshylary da at salysypty. Bul jaıynda atalǵan ýnıversıtettiń baspasóz qyzmeti joǵarǵy oqý ornynyń resmı saıtynda habarlaǵan.

saıttan alynǵan skrın-shot

«2016 jyldyń 31 qazanynda saǵat 15.00-de 426-dárishanada «Halloween» merekelik is-sharasy ótti. Taryn UHalie (Qazaqstandaǵy AQSH elshiliginiń ókili, aǵylshyn tili muǵalimi) men «Orys jáne shetel tilderi»kafedrasynyń uıymdastyrýmen ótken sharaǵa kafedra oqytýshylary, 50 stýdent pen magıstrant qatysty. Helloýın – bul zamanaýı meıram. Irlandıa men Shotlandıanyń ejelgi keltteriniń dástúrli merekesi. 31 qazanda barlyq áýlıeler kúni qarsańynda aǵylshyn tildi elderde toılanady. Shara barysynda foto, beıne materıaldardy paıdala otyryp, Helloýın taqyrybynda prezentasıa kórsetildi», - dep jazylǵan QarMTÝ saıtynda.

 

Helloýındi toılaımyz dep, bet-álpetine túrli boıaý jaǵyp, jyn-shaıtan keıpine enip, qıalıdyń isin jasaıtyn balalaryna tyıym sala almaı otyrǵan ata-analar endi «Helloýınniń» jarnamalanýyna bilim berý mekemesiniń de atsalysqanyna narazy.

 

«Osy jyn-peri, shaıtan, ólgen qalyńdyq sıaqty neshe túrli adam shoshyrlyq keıipke enýdiń ne qyzyǵy bar ekenin túsinbeımin. Al Elbasymyz Nursultan Ábishuly bilim alǵan ýnıversıtette osyndaı sharanyń ótýi – tipti uıat nárse. Sonda bizde toılanatyn basqa merekeler joq pa? Jastardy durys jolǵa salýdyń ornyna dinimizge, dástúrimizge jat osyndaı merekeni toılatýǵa múmkindik berip otyrǵan ýnıversıtet basshylyǵynyń isi qynjyltady», - dedi osy JOO-da bilim alatyn stýdenttiń anasy Raıhan Tóleýqyzy.

sýret avtordiki

Helloýın Eýropada, AQSH-ta halyq arasynda tanymal mereke. Bul mereke hrıstıandyq dáýirge deıingi kezeńde qazirgi Anglıa men Irlandıanyń, sondaı-aq Fransıanyń aýmaǵynda ómir súrgen keltterden bastaý alady. Olardyń nanym-senimi boıynsha, 31 qazan kúni mazasyz árýaqtar men sıqyrly tirshilik ıeleri bizdiń álemimizge ótedi-mis. Sondyqtan da keltter árýaqtar sıaqty kıinip alyp, arǵy betten keletin tylsym kúshterdi tynyshtandyrý úshin ár úıge baryp, tamaq surap júretin bolǵan. Ýaqyt óte kele Helloýın jyn-oınaq merekege aınaldy. Keıingi jyldary Helloýınde aǵashtardy órteý, shamdardy syndyrý sekildi usaq buzaqylyqtar sánge aınala bastady. Ókinishke qaraı, osy bir túsiniksiz mereke Qazaqstanda da keń etek jaıyp keledi. Qazan aıynyń sońǵy kúni mektep oqýshylary men stýdentterdiń jyn urǵandaı keıipke túsetini jasyryn emes. Bet-aýzyn qan-josa qyp boıaǵan qyzdar bir-birinen asyp túsip, áleýmettik jelilerge sýretterin salyp álek, al jigitter atalmysh «merekesymaqty» toılaý maqsatynda kóshede adamdardy qorqytyp, kólik dóńgelekterin jaryp, ártúrli buzaqylyqqa barýda. Osylaısha, ne bolsa soǵan eliktegish qazaq jastarynyń sanasy ózge eldiń, ózge dinniń meıramdarymen ýlanyp jatyr.

Jibek MUQASHEVA

Baq.kz

---