InfoHub Logo

Berekeń aýylynda jıylys bolady degen soń, Tasbergen sopy, Beldenboq molda, Itaıaq bı úsheýi basyn qosyp shyǵa qaldy. Berekeń aýyly Uzynshyrpyda, ózenmen eki arasy 10 shaqty shaqyrym jer. Dekabr ishindegi yzǵyryq sýyq, ysqyrǵan boran búrliktirip eriksiz yqqa qaratady.

— Tońyp barǵanymyzǵa qaraı Ulbosyn báıbishe etke toıdyrsa jarar edi,— dep Beldenboq molda súıekke kirip alǵan túıe jún kúpisiniń jaǵasyn qulaǵyna taman kóterip qoıdy.

— Jetesi jarymaǵan neme ǵoı, aýzyn qý shóppen súrtedi de otyrady. Baıaǵy kúnimiz bolsa, osyndaı ıtke kúnimiz túser me edi... Itaıaq seniń esińde bar shyǵar, baıaǵy talas yshtatta Jápekem úıinde on kún udaıymen jatatynymyzda, kúnine eki mezgil etin úzbesten berip turady-aý! Oı, sabazdardyń qonaqjaıy-aı!.. Baqty izdese, sondaı adamdar izdesin",—dep Tasbergen sopy ótkendi qozǵap, kúrsinip qoıdy.

Úsheýi de kúrsindi. Úsheýi de ótken kúnniń "qyzyqtaryn" kóz aldaryna elestetti...

Berekeń úıinde onshaqty adam sóılesip, daýryǵyp otyr. Itaıaq bı sózin kesteleı sóılep, "Bálenshekem súıdegen eken" dep taqpaq maqalyn da kirgizip jiberedi.

— Sonymen, sózderińizdiń qorytyndysy ne boldy?— dep bir búıirde otyrǵan murtty qara Tasekeńe qaraı empeńdeı tústi.

— Bizde eki sóz bola ma? Aýylnaılyqty Berekeńniń bosaǵasyna baıladyq,— dep túneýkúni-aq aıtqamyz. Sol sózimizden shyǵamyz. Al, "kandıdatyn" ózimiz alamyz, bizde de dámeli balalar bar...

— Myna nemelerdi qaıtemiz? "Kedeımiz, birtalaı elmiz, úkimet bizdiki" dep erteń shýyldaıdy ǵoı.

Itaıaq bı myrs etip kúldi. Tabaqtan sheginińkirep otyryp, saýsaqtan aqqan maıyn jalaı túsip:

— Úkimet kedeıdiki bolsa, kedeıin ózi jarylqaı jatar. Saılaý ózimizdiki ǵoı. Biz qalaǵan adamymyzdy saılaımyz,— dedi...

— Ýa, Jylqybaı, qaıdan júrsiń?

— Qaladan kelem.

— Ne habar bar?

— Tynyshtyq.

— Saılaýdan ne bildiń?

— Saılaý jaqynda bilem, Ybyraıdyń balasyn kórip edim, sol soǵyp otyrdy: "Bıylǵy saılaýǵa baılar, bolystar, moldalar, tóreler qatyspaıdy. Saılaý erki kedeılerge beriletin boldy",—dedi.

Sopy, molda, bı, úı ıesi Berekeń — bári de Jylqybaıǵa ańǵaryla qaraı qaldy.

— Beker shyǵar...

— Joq, ras, myna gazetińde de bar,— dep búkteýli qaǵazdy qaltasynan sýyryp aldy. Gazettiń úshinshi betindegi "Keńes dushpandary" degen iri jazý kózge shalyndy. Jazýdyń astynda saılaýǵa aralasa almaıtyndardyń súgireti basýly edi.

Búıirde otyrǵan murtty qara súgiretti ary-beri aınaldyryp qarady da:

— Apyrmaı, gazet basatyndar da qý-aý, buljytpaı salýyn qarashy. Myna bireýi bizdiń Itekeńnen aınyǵan joq. Baıaǵy bolys bolǵan kezińizdegi, gýbernatordyń aldynan shyqqandaǵy túrińiz sekildi,— dep gazetti Itekeńe usyndy. Itekeń ustamady, kóziniń qyrymen ǵana qarap, sáldeli moldany kórgende, ishinen: "mynaý Beldenboq molda sıaqty eken"— dep oılady.

Beldenboq molda, Itaıaq bı, Tasbergen sopy — úsheýi súıretilip Berekeń úıinen shyǵyp bara jatqanda, gazettegi súgiretke túrleri keldi de qoıdy. Murtty qara myrs etip kúlip jiberdi.

— Gazet basatyndar pále ǵoı, osylardy qaıdan bildi eken?— dedi. Berekeńniń báıbishesi erkin demin alyp:

— Aýylnaılyǵy qurysyn. Az ǵana malymyzdy ıelendirip qoısa, bizge tóreliginiń keregi-aq joq... Qashanǵydan buryn, shubap, etimdi bitirip edi, qarasy batqyrlardyń qarasynyn batqany-aq durys bolǵan eken,— dedi.

---