InfoHub Logo

Kóktem shyǵa bere orman arasyndaǵy qazaq úı shańy­raǵynyń ishki keneresine uıa salǵan Qarlyǵash, bala­pandary jumyrtqadan shyqqan soń qulap ketpesin degen nıetpen aıaqtaryn qylmen matastyryp tastaǵan. Erekshe bir ádeti — uıany únemi taza ustaıtyn, tipti balalarynyń qıyna deıin syrtqa ala ketetin. Sondyqtan ba, álde basqa sebebi bar ma, áıteýir adamdar ózine qurmetpen qaraıtynyn ishteı sezetin. Jáne mundaı jerge zıandy jándikter, tipti jylannyń da jolamaıtynyn jaqsy biletin.

Bul úıdiń otaǵasy Janarbek qarıa mal sharýashylyǵymen aınalysatyn. Ásirese iri qara tuqymyn asyldandyrýǵa erekshe mán beretin. Mezgilimen óriske shyǵarý, sýarý, jemdeý tárizdi jumystardyń júıeli atqarylýyn talap etetin. Kómekshileri onyń aıtqanyn qalt jibermeı múltiksiz oryndaıtyn. Sondyqtan da bolar, sońǵy eki-úsh jylda sharýasy ońǵa basyp, qystaýyna shaǵyn sút fermasyn uıymdastyrdy. Memlekettiń kómegine arqa súıep, jumysshylar jaldady. Olardy turǵyn úımen qamtamasyz etti. Sóıtip, keshegi jalǵyz qystaý birtindep eldi mekenge aınala bastady.

Qarlyǵash munyń bárin de óz kózimen kórgen. Jyl saıyn osynda kelip balapan shyǵarýdy ádetke aınaldyrdy. Bıyl kóń sasyǵan qystaýdy qoıa turyp, aýasy taza, aınalasy ashyq qazaq úıdi mekendegisi kelgen. Bul sharýa onyń oılaǵanyndaı bolyp, ýaqyt óz babymen ótip jatqan.

Bir kúni aǵa baqtashynyń:

— Bordaqyǵa alynǵan maldy shóbi shúıgin aımaqqa aparǵanymyz jón sıaqty, — degen daýsyn qulaǵy shalyp qaldy. Shańyraqqa qonyp otyrǵan Qarlyǵash at ústindegi Janarbek qarıany baı­qady.

— Malshylarǵa qajet qoı, úıdi jyǵamyz ba, qaıtemiz?

— Qarlyǵash — kıeli qus, balapandaryn ushyryp áketkenshe tıispeńder.

— Jaraıdy.

— Jigitterge aıt, ýaqytsha jappa jasap alsyn.

— Maqul!

Myna jyly sózge Qarlyǵashtyń rıza bolǵany sonshalyq, qýan­­ǵanynan eriksiz saırap jiberdi.

---