InfoHub Logo

Álemge áıgili Eýropa men Azıany jalǵaǵan Uly Jibek jolynyń torabynda ornalasqan búkil Ortalyq Azıadaǵy eń kóne, ásem ári kórikti qalalardyń biri - Túrkistan qalasy. Tarıhy tereń bul qala kezinde qazaq halqynyń ortalyǵy rólin atqarǵany da barshaǵa málim. Tarıhy baı, taǵylymy tereń Túrkistan qalasynyń búgingi jastar úshin de orny bólek. Túrkistan – elimizdiń rýhanı júregi, qazaqtyń ataqty tulǵalary máńgige jaı tapqan qasıetti qala. Osynda jerlengen 164 áıgili tulǵanyń 21-i el basqarǵan tulǵalar, 30-dan astamy qol bastaǵan batyrlar men sóz bastaǵan bıler ekeni barshaǵa málim. «Túrkistan tarıhy – kúlli qazaqtyń tarıhy», – degen Elbasy N.Nazarbaev kóne shahar orny aıryqsha ekendigin atap kórsetti. Túrkistan qalasy oblys ortalyǵy mártebesine ıe bolǵan 2018 jyldyń 19 maýsym kúni halqymyzdyń jadynda qalǵan erekshe kún bolǵanyn atap ótken jón. Qazirgi kúni qalamyzda jańa ǵımarattar boı kóterip kórkeıip, tyń bastamalar qolǵa alynyp, aýqymdy jobalar iske asyrylyp jatqanyn maqtanyshpen aıta alamyz. Al 2018 jyly jyl saıyn atalyp ótetin qala kúni merekesine: Túrkıa, Úndistan, Ózbekstan, Iran, Bolgarıa, Reseı t.b. elderden kelgen ádebıetshi qaýymnyń rýhanı basqosýy bolyp ótti. Atalǵan is-sharada Túrkistan qalasynyń gúldenýine úlesterin qosqan azamattar marapattaldy. Túrkistan qalasy elimizdiń derbes oblysy retinde órkendep, shahar jańarýda. Bıylǵy jyly qalanyń «Oqýshylar saraıy» ǵımaratynyń aldyna uly Abaıdyń eskertkishi, al «Oblystyq drama teatry» ǵımaratynyń aldyna álemniń ekinshi ustazy atanǵan Ál-Farabıdiń eskertkishi qoıyldy.

Sońǵy jyldary Túrkistan qalasynyń demografıalyq jaǵdaıy jaqsaryp, ekonomıkasy birshama ósip, halyqtyń áleýmettik jaǵdaıy túzelgeni baıqalady. Jahandyq týrıserdi kóptep tartý arqyly Túrkistan qalasyn týrızm ortalyǵyna aınaldyryp, búkil álemge damytý kózdelýde. Sonymen qatar elimizdiń rýhanı astanasynda kóptegen jalyndy jastar sapaly bilim alýda. Búginde Túrkistan qalasy - búkil túrki áleminiń mádenı-rýhanı ortalyǵy bolyp tabylady. Órkenıeti men salt-dástúrin berik saqtaǵan bul shahardyń keleshek urpaqqa bereri de mol. Biz Túrkistanmen maqtanamyz!

Ý.M.Djoldybaeva  Ál-Farabı atyndaǵy QazUÝ-niń Qazaqstan tarıhy kafedrasynyń dosenti

Á. Mýbáshirhan Ál-Farabı atyndaǵy QazUÝ-niń Geografıa jáne tabıǵatty paıdalaný fakúltetiniń 1-kýrs stýdenti

---