InfoHub Logo

Senbi. Tósekte jatyp búgin ne isteıtinimdi oıladym. Turamyn, shaı, televızor, taǵy shaı, taǵy televızor, shaı, televızor... Kelinshegim bazarǵa ketken.

Dalada kóktem. Torǵaılar janushyra shyryldasyp, ashyq aspan, jyly kúnge qýanýda. Kóshege shyǵyp serýendeýge de bolady. Biraq dál qazir esh nársege zaýqym joq.

Kózimdi jumyp qalǵýǵa áreket jasadym. Mashınalardyń sypyrylysqan úni men tereze mańyndaǵy qustar tirshiligi ádetten tys jarqyn. Kóktem. Kenet Sáýle tústi esime. Árıne, Sáýle. Nurǵa tolǵan janary, kúlkige toly sózderi osyndaı maǵynasyz senbilerge maǵyna berý úshin jaratylǵan.

Ornymnan turyp telefon nómirin tere bastadym.

— Alo?

Kishkentaı balanyń daýysy.

— Sáýleni bola ma?

— Sáýle joq.

— Qashan keledi?

Ol únsiz qaldy.

— Alo?

— Sáýle ólip qaldy.

— Qalaı? Qashan?

— Bári ony kómýge ketti. Úıde eshkim joq.

Balanyń daýysy sonshalyqty jaıbaraqat.

Telefon tutqasyn ornyna qoıyp kıinýge kiristim. Keshe ǵana kezdestik. Sap-saý bolatyn. Álde mashına basyp ketti me eken? Kenet onymen keshe emes arǵy kúni kezdeskenim tústi esime. Báribir sap-saý bolatyn. Kóshege shyqtym. Jyp-jyly. Uzaq qystan soń kúnniń jylýy sıqyr, ertegi sıaqty. Kókpeńbek aspan enteleı tónedi, dúnıe jap-jaryq. Keýdeme keptelgen kesek úreı tarqaı bastady. Mundaı kúni áldekimniń, ásirese Sáýleniń ólýi múmkin emes. Kisisi qaıtys bolǵan úıge kishkentaı balany tastap, úlkender o zamanda bu zaman adam kómýge kete me? Basymdy shaıqap jymıdym. Bárin Sáýleniń ózi istep otyr. Odan shyǵady. Únemi kúlki shashyp turatyn janaryn elestettim. Ne degen qyz. Esik qońyraýyn bastym.

— Kim?

— Men jańa zvondaǵan aǵamyn.

Ashty. Bes-alty jasar top-tompaq bala. Ar jaǵynan eresekteý qyz kórindi.

— Sáýle qaıda?

— Ólip qaldy.

Taq-taq etedi.

— Qashan?

— Keshe.

— Qalaı ólip qaldy?

— Kóp dári iship, ishi aýyryp. Al Sizge myna hatty tastady. Maǵan eshkimge aıtpaı, sizge, óz qolyna ber dedi. Áıtpese meniń túsime kiremin dedi.

Eresek qyzdyń eki kózi qyp-qyzyl. Úreıge tola. Tezirek hatty berip qutylǵysy kelip tur. Tuńǵıyqtan kúlki bas kóterip, tamaǵymdy qytyqtady. Qabaǵymdy shytyp, tórt búktelgen qaǵazdy ashyp oqydym:

Sálem…

Sol kúni sen tym jaıbaraqat boldyń. Júzińe kózim túsken saıyn júregimdi ý sharpydy. Sodan keıin qoshtasatyn ýaqyt jetti. "Saý bol" dedim men. Sen basyńdy ızediń. Nege osynshama jeńil qoshtastyq? Nege kózderimiz túıisip bir sátke kidirmedi? Birde "Maǵan kúz unaıdy" degensiń. Men sengen joqpyn. Kúzdiń adamdary sen sıaqty emes. Basqa. Sen tym sholaq bolatynsyń. Tym jeńiltek. Seniń qasyńda ózimdi aýyr sezinetinmin. Ómir — men úshin úreı, qupıa. Mahabbattyń da baqyttan góri qorqynyshy, adaldyǵynan góri aramdyǵy basym. Seniń mahabbatyńnyń... Qazir qaıdasyń? Múmkin meniń qasymda shyǵarsyń. Tańdanǵan keıippen qabaǵyńnyń astymen qarap otyrǵan bolarsyń dál qazir. Onda nege ózimdi munsha jalǵyz sezinemin bul álemde? Meni oılaıtynyńa senimdimin. Árıne, oılaısyń. Bárin qaıtarý, qaıtadan bastaý múmkin bolsa ne ister ediń. Taǵy da qaýyrsyn keıpińe enip jylatar ma ediń, álde meniń oısyz baqytym úshin muńdy qabyldar ma ediń. Mahabbat meni qatigez etipti. Seniń ókinetinińdi elestetip kúlimsireımin. Eshqashan eshkim kórmegen kóz jasyń janaryńdy talaı shylaıtyn shyǵar endi. Biraq bul dúnıeden ótken adam oralmaıdy. Men oralmaımyn...

... Syrtqa shyqtym. Kún de, aspan da óz ornynda. Kóktem de. Óz ornynda. Tek Sáýle joq.

---