Qazaq ǵalymynyń jańalyǵy japondyqtardy tańqaldyrdy
Qazaqstan Prezıdenti Nursultan Nazarbaevtyń Japonıaǵa resmı sapary aıasynda eki eldiń Úkimetteri men jeke sektordyń ekonomıkalyq yntymaqtastyq jónindegi birlesken komısıasynyń altynshy otyrysy ótken bolatyn.
Osy otyrystyń «Jańa baǵyttar» dep atalǵan 1-shi seksıasynda Jańashyl zıatkerlik tehnologıalar akademıasynyń dırektory Nuraly Qudaıbergenuly «Jasandy ıntellekt tilderin jasaý ádistemesi» atty baıandama jasap, japondyqtardy tańqaldyrdy.
Mısýbısı korporasıasynyń bas menejeriniń orynbasary H.Saıtonyń moderatorlyǵymen bolǵan bul jıynda «Tokıo Seıko», «Marýbenı korporeıshn», «Applause» syndy japondyq jetekshi kompanıalardyń ókilderi sóz sóılep, jahandyq jańa tehnologıalardaǵy ozyq trendter jaıynda pikir bildirdi. Al qazaqstandyq ǵalym Nuraly Qudaıbergenuly japon eliniń 1982-1992 jyldarda 54 mlrd ıen (shamamen 500 myń AQSH dollary) jumsalǵan kompúterdiń 5-shi býyny men jasandy ıntellekt tuǵyrnamasyn jasaý jobasynyń sátsiz aıaqtalý sebepterine toqtaldy. Búginde Japon eliniń ınvestısıasy kómegimen birlese otyryp, jasandy ıntellekt (robot) tilderin jasaý múmkindiginiń dáleldi jobasymen tanystyrdy.
«Jasandy ıntellekt (robot) tilderin jasaý kompúterlik aqparattyq baǵdarlamasyn ázirleý ádistemem - adamzattyń oıshyldary Arıstotel, ál-Farabı, Kant, Gegel, Marks jáne Djon MakKartı, P.Kýznesov, B.Qoıshybaev, O.Mýhın syndy ǵalymdardyń tarıhı jetistigin paıdalana otyryp, fılosofıa jáne ınformatıka qıylysyndaǵy zerrtteýlerdiń jemisi bolyp tabylatyn jańalyq», - dedi ol otyrystan keıin QazAqparat agenttigi tilshisine.
Suhbat barysynda ǵalym óz baǵdarlamasynyń negizgi jańalyqtaryna da toqtaldy.
«Kompúterlik kodtaý tilin biletinder sany jer betinde 100 myń adamnan aspasa, aqparattyq baǵdarlama mamandarynyń sany 50 mln. adamǵa jýyqtaıdy. Al biz ashqan kompúterlik jobalaý tilinde 0,5 mlrd adam aqparattyq baǵdarlamashylarǵa táýeldi bolmaı erkin jumys isteı alatyn bolady jáne ekonomıs-robot, zańger-robot syndy jasandy ıntellekt ıeleri ómirge keledi», - dedi ol.
Máselen, Nuraly Qudaıbergenulynyń aıtýynsha, kez kelgen quqyqtyq qujat daıyndaý qajet bolǵan jaǵdaıda zańger-robot kómegine júginip, arnaıy tapsyrmalardy júktep, buıryq beresiz. Ol az ýaqyttyń ishinde qajetti aqparattardy saraptap, kásibı turǵyda ózińizge qajetti qujatty sanaýy mınýttardyń ishinde tolyqqandy daıyndap beredi.
«Bul komısıa otyrysyna qatysýdaǵy basty maqsatym - osy jobamdy japondyq áleýetti ınvestorlarǵa tanystyryp, múmkin bolǵan jaǵdaıda ınvestısıa tartý arqyly ony júzege asyrý. Óıtkeni, bul jobany júzege asyrýǵa qomaqty qarajat qajet. Jalpy, japondyq iskerlik orta tarapynan jobaǵa zor qyzyǵýshylyq bar ekendigin baıqadym», - degen ol ózi ashqan ǵylymı jańalyq negizinde «Zıatkelik mektep», «Sıfrly ýnıversıtet» júıeleriniń jasalǵandyǵyn atap ótti.
You Might Also Like
