InfoHub Logo

Qazaqstan astanasy — Qyzylordada Qazaqstan eńbekshi tabynyń tóńkerisshi jazýshylar uıymynyń bes kisiden basqarmasy quryldy. Basqarmanyń maqsaty — Qazaqstannyń eńbekshi tabynyń tóńkerisshi jazýshylaryn uıymdastyryp, bir jobamen ádebıet maıdanyna shyqpaq. Uıymǵa kirgen jazýshylardyń shyǵarǵandaryn bastyryp turmaq jáne aılyq jýrnal shyǵarmaqshy.

Qazaqstannyń tóńkerisshi jazýshylar uıymy ózin jalpy Keńester Odaǵynyń proletarıat jazýshylar uıymynyń bir butaǵy sanaıdy. Keńester Odaǵynyń Moskvadaǵy proletarıat jazýshylarynyń basqarmasymen qatynas jasap, ádebıet maıdanynda bir nusqamen áreket qylady. Sondyqtan Qazaqstan eńbekshi tabynyń tóńkerisshi jazýshylar uıymy jalpy Keńester Odaǵynyń proletarıat jazýshylar uıymynyń jobasyn qabyl alyp, qoldanady, ol joba myna tómende jarıalanyp otyr.

Eńbekshi taptyń shyn tóńkerisshi azamaty bolyp ádebıet maıdanyna shyqqandar, ıakı endi shyǵaıyn dep júrgender, myna tómendegi jalpy jobany qabyl alsa, uıymǵa kiredi. Uıym ashylmaǵan jerde, 3 — 2 kisi bolsa, ózderi osy jobamen uıym ashyp, uıymǵa kirgenderdiń aty-jónin (anketin toltyryp) jazyp, tizimin ortalyqtaǵy basqarmaǵa jiberý kerek.

Oktábr tóńkerisinen keıin Qazaqstannyń ádebıeti ilgerilep, enbekshi taptyń tóńkerisshi jazýshylary shyǵa bastady. Biraq bulardyń kóbi, ár jerde bólek-bólek júrgendikten, týra jolǵa túse almaı, «Alashtyń» burynǵy sandyraq soqpaǵyna shyrmalyp júr.

Keńes úkimetine, komýnızmge jaý bolǵan burynǵy Qazaqstannyń «saıasatshylarynyń» eski kúnálary keshirilgen soń burynǵy «Alashtyń» rýhy sińip qalǵan adamdar túrli perdemen, túrli tásilmen jazý maıdanyna. ádebıet maıdanyna shyqty. Oqýy, bilimi, tájirıbesi az eńbekshi taptyń tóńkerisshi jazýshylary olardy ádebıet maıdanynan qýyp shyǵa almady.

«Alash» rýhy sińgen jazýshylardyń qımyly sońǵy ýaqytta kúsheıeıin dedi: olar óleń, jyr áńgimeden asyp, qazirgi qazaq ádebıetine syn jaza bastady.

Qazaq ádebıetine «syn» jazǵanda ózderiniń sandyraq soqpaǵynyń sorabyna salyp, ár gúrli eppen, óz bazarlarynyń narqymen ádebıetke baǵa beredi. Sondyqtan Qazaqstannyń tóńkerisshi jazýshylaryna aıqyn jobaly bir uıym jasaý kerek edi. Mine, ol uıym endi jasaldy. Qazaqstannyń eńbekshi tabynyń tóńkerisshi jas jazýshylary endi tez qımyldap uıym jasap, Qyzylordadaǵy ortalyq, basqarmamen habarlasyp baılanys jasap, kirisýleri kerek.

Basqarmanyń istep jatqan isteri budan bylaı baspasóz júzinde jarıalanyp turady.

Basqarma músheleri: Sáken Seıfýllauly,

Abdyrahman Baıdildauly,

Beıimbet Maılyuly,

Feoktıstov Nıkolaı.

Basqarmanyń ýaqytsha adresi:

Qyzylorda, Qazaqstannyń halyq aǵartý komısarıaty, basqarma hatshysy Sáken Seıfýldaulyna.

1925 jyl

---