Qazaqstanda Ulttyq biryńǵaı testileý bastaldy
Búgin Qazaqstannyń júzge jýyq testileý pýnktinde Ulttyq biryńǵaı testileýdiń alǵashqy kezeńi bastaldy.
2020 jyldyń 16-20 qańtary aralyǵynda 95 myńnan astam úmitker UBT tapsyrady.
Aıta keteıik, joǵary oqý ornyna aqyly negizde túsý úshin UBT jylyna 4 ret ótkiziledi (qańtar, naýryz, maýsym jáne tamyz). Bul rette, oqýǵa túsýshiler bilim granty konkýrsyna qatysý úshin maýsym aıynda ótetin UBT-ny tapsyrýy qajet. Jalpy, Ulttyq biryńǵaı testileýdi tapsyrý formaty ózgergen joq. Bul norma joǵary bilim alýǵa qoljetimdilikti arttyrý maqsatynda engizildi.
UBT-ǵa qatysý úshin qujattar 2019 jyly 1-15 jeltoqsan aralyǵynda biryńǵaı aqparattyq júıe arqyly qabyldandy. Nátıjesinde, UBT-ǵa qatysýǵa 95 myńnan astam adam ótinish berdi. Onyń ishinde 75 520 oqýshy testileýdi qazaq tilinde, 22 744 bala – orys tilinde jáne 176 bala aǵylshyn tilinde tapsyrady.
Sanattar boıynsha, 90 808 bala – 11 (12) synypta oqıdy jáne byltyrǵy testileýden ótpegen, JOO-ǵa shartty túrde qabyldanǵan 2 701 úmitker bar. Odan bólek, shyǵarmashylyq daıyndyqty talap etetin, ózge bilim berý baǵdarlamasyna aýysqysy keletin 1-2-inshi kýrstaǵy 1 841 stýdent bar.
UBT-da 820 aýdıtorıa paıdalanylady. Barlyq aýdıtorıalar uıaly baılanys quraldarynyń jumysyn buǵattaıtyn quraldarmen jáne beınebaqylaý kameralarymen qamtamasyz etilgen. Tyıym salynǵan zattar tabylǵan úmitker UBT-ǵa kirgizilmeıdi jáne akt arqyly ǵımarattan shyǵarylady.
Óńirlerge QR Bilim jáne ǵylym mınıstrliginiń 447 ókili jiberiledi, apelásıalyq komısıalar qurylady, medısınalyq kómek kórsetý beketteri uıymdastyrylady jáne testileý barysyndaǵy qaýipsizdik qamtamasyz etiledi. Budan bólek, qajet bolǵan jaǵdaıda jeke kómekshiler, sondaı-aq erekshe bilim berý qajettiligi bar balalarǵa arnalǵan sýrdoaýdarmashylar usynylady.
Jergilikti jerlerde UBT uıymdastyrý jáne ótkizý boıynsha memlekettik komısıalar quryldy. Memlekettik komısıa quramyna oblystar nemese respýblıkalyq mańyzy bar qalalar ákimdikteriniń ókilderi, quqyq qorǵaý organdarynyń, qoǵamdyq uıymdardyń, buqaralyq aqparat quraldarynyń ókilderi kirdi.
You Might Also Like
-
Taǵy bir jyly ańqaý soǵymǵa jylqy alǵaly bazarǵa barady. Kóp jylqynyń ishinen, bir órkeshi joq túıedeı, qara bıe ańqaýǵa semiz de, tolyq ta kórinedi.
-
Aýyl — ár qazaqtyń kindiginen baılanǵan túp qazyǵy. Aýyl dese áli kúnge artymyzǵa alańdap, alysta qalǵan balalyq shaqqa ańsarymyz aýyp turady.
