InfoHub Logo

(Qazaqstannyń mekemelerinde keńse isterin qazaq tilinde júrgizý haqynda)

Qazaqstanda qazaǵy kóp jerlerde keńse isterin qazaq tilinde júrgizý kerek dep gazet júzderinde jazdyq. Ám bul týraly qaı gýbernıada ne qylyp jatqany «Eńbekshi qazaq» gazetiniń júzinde jazylyp jatyr.

Bul ár jerden kelip jatqan habarlarǵa qaraǵanda, qazaq tilin iske asyrýǵa kóp jerlerde is basyndaǵy jigitterdiń kóbi onsha yntaly kórinbeıdi.

Ár túrli sebepter aıtady. Aqsha joq deıdi. Qazaqsha is júrgizýdi biletin kisiler joq deıdi ám tolyp jatqan sary ýaıym, qaýip-qaterlerdi jańbyrdaı jaýǵyzady.

Árıne, ol belgili. Yntasyz iske, kóńilsiz iske sansyz bóget, sansyz ýaıym tabýǵa bolady. Biraq bizdiń aı týymyzsha, bul iske bógettiń kóptigi basqa sebepterden. Sebeptiń eń aldy — is basyndaǵy adamdardyń bul iske shyndap kirisken nıetteriniń joqtyǵy, yntalarynyń joqtyǵy.

Shyn nıet bolsa, ekpindi ynta bolsa qazaq tiliniń keńselerde júrip ketýine shúbá joq. Oǵan dálel — Qazaqstannyń zań komısarıatynyń bul týraly kórsetip otyrǵan isi.

Qazaqstannyń zań komısarıaty óziniń gýbernıalyq mekemelerine qazaq tilin tez qoldanýǵa buıryq qylǵan.

Qazir Qazaqstannyń eń zor gýbernıasy Semeı gýbernıasyn sot mekemeleriniń bárinde keńse isteri tutasymen qazaq tilinde kúre bastaǵan ám qazaq tilinde jazylǵan gýbernıalyq sottyń qaýlylary, qararlary Orynbordaǵy zań komısarıatyna kele bastady.

Jáne Aqmola gýbernıasynda da sot mekemeleriniń keńse isteri qazaq tilinde júre bastady degen habar alynyp otyr.

Onyń ústine zań komısarıatynyń kollegıasynyń (basqarmasynyń) bir múshesi qazir Torǵaı, Yrǵyz, Aqtóbe jaqtarynda júr ám ol jaqtyń da sot mekemelerinde keńse isteri qazaq tiline qoıylyp, júrip keter deýge bolady.

Jáne qazir zań komısarıaty sot keńselerinde jazylatyn túrli qaýly, qarar, bılik, kesim, tekserý, anyqtaý ám basqa sondaı qaǵıdalardyń báriniń nusqasyn qazaqsha baspaǵa basyp, Qazannyń barlyq gýbernıasyna jibereıin dep jatyr. Mine, ekpindi ynta bolsa, shyn nıet bolsa, qandaı bolsa da is osyndaı birte-birte júrip ketpek. Qazaqstannyń zań komısarıaty bul iste ózge komısarıattarǵa órnek, úlgi bolýǵa tıis. Al endi zań komısarıatyna teńelińder!

19.09.1923 jyl

---