InfoHub Logo

Ospanova Gúlmarıa Turysbekqyzy
Ál-Farabı atyndaǵy QazUÝ-dyń fılologıa jáne álem tilderi fakúltetiniń
qazaq tili men ádebıetiniń 2-kýrs stýdentti

Kópshilik qaýymnyń, ásirese, jastardyń qundy qazyna kitapqa degen  suranysy kúnnen-kúnge  artyp kele jatqanyn kórip júrmiz. Tipti, búginde kitap oqý sánge aınaldy desek, artyq aıtqanymyz emes. Bul, árıne, qýantarlyq jaıt. Oǵan  áleýmettik jelilerde  kitaptar jaıly qyzyqty  jazbalar  jazatyn paraqshalardyń kóbeıýi, túrli janrdaǵy kitaptardyń birneshe tırajben jaryqqa shyǵýy, sondaı-aq, kitap dúkenderiniń qarqyndy jumysy dálel. 

Bul turǵyda rýhanı baılyqty  barynsha nasıhattap, qazaq tildi kitap naryǵynyń qalyptasýyna óz úlesin  qosyp júrgen «Qazyna» kitap úıin erekshe atap ótkenimiz jón.

Bıylǵy  jyldyń sáýir aıynda óz jumysyn bastaǵan kitap dúkeni az ǵana ýaqyt ishinde oqyrman qaýymnyń ystyq yqylasyna bólenip úlgerdi. Osyndaı ıgi bastamanyń negizin qalaǵan - Almas Sháıken bolsa, kitap qoryn toptastyryp, jınaǵan - Kúltegin Aspanuly. «Qazynanyń» jalpy  40 myńǵa jýyq kitap qory bar. Al sany jaǵynan 3500 kitapty quraıdy.

Ózge kitap dúkenderi sıaqty kitapty satyp qana qoımaı,  tyń jobalar men izgi is-sharalardy  udaıy uıymdastyrýy- «Qazynanyń» basty  ereksheligi.

Kitap úıiniń aıryqsha jobalarynyń biri- belgili aqyn-jazýshylar, qoǵam, mádenıet qaıratkerlerimen júzdesý ótkizetin «Qazynaly gonaq» jobasynyń  kitapqa degen qyzyǵýshylyqty odan ári arttyra túsýde mańyzy zor. Sebebi, ózderi úlgi tutatyn tulǵalardyń  rýhanıat, sonyń ishinde kitap oqý jaıly taǵylymdy  keńesteri oqyrmandarǵa oı salmaı qoımaıdy. Bul jobanyń alǵashqy qonaǵy- belgili saıasatker, qoǵam qaıretkeri Dos Kóshimmen ótken kezdesýde  ult taǵdyryna qatysty  ózekti máseleler sóz boldy. 

Odan soń, etnograf, jazýshy, qazaq dástúriniń nasıhatshysy Zeınep Ahmetovamen bolǵan súbeli suhbatta «Kúretamyr» kitabynyń  negizinde salt-dástúr, ulttyq tárbıeniń qyr-syry jaıynda áserli áńgime órbidi. Keıingi kezdesýler Kúlzıa Naabı, Kámshat Bekjigitova syndy kásibı koých, psıhologtarmen ózindik damý, ózgeris taqyptarynyń aıasynda boldy. Al halqymyzdyń  kórnekti  aqyny, ult janashyry Muhtar Shahanov, Qazaqstannyń halyq ártisi, akter Tuńǵyshbaı Jamanqulov, sonymen birge, erejesiz jekpe-jekten álemniń úsh dúrkin chempıony, qoǵamdyq aǵartýshy  Ardaq Nazarov, dýbláj akteri Azamat Qanapıalarmen bolǵan júzdesýler kitapsúıerlerge este qalarlyqtaı áser qaldyrdy.

Sonymen qatar,  kitap dúkeni osy ýaqytqa deıin  eki márte «Qazynaparty»- qala jastarymen birge án aıtyp, kúı shertip, jurtshylyqtyń kóńilin kóteretin rýhanı kesh uıymdastyrdy. Kómekke  muqtaj jandarǵa  qol ushyn sozýdy maqsat etken  «Qazynamen qaıyrymdylyq» atty  ıgilikti  sharasy  taǵy bar. 

Jýyrda ǵana, ıaǵnı, qyrkúıektiń  29-y kúni «Oqy» oqyrmandar klýby óz jumysyn bastady. Budan bylaı turaqty oqyrmandar bas qosyp, «Qazyna» kitap úıinde túrli qazaqsha  kitaptardy  birge taldaıtyn bolady. Bul da óz kezeginde kitap oqý mádenıetiniń joǵarylaýyna septigin tıgizeri sózsiz. 

Osylaısha,  ulttyq  qundylyqtarymyzdy dáriptep, kitap ımıjin kóterýge, sol arqyly tilimizdiń mártebesin bıiktetýge barynsha atsalysyp júrgen  «Qazyna»  búginde kitapsúıer qaýymnyń súıikti mekenine aınaldy. Rýhanı kemeldikke umtylǵan árbir qazaq úshin bul  kitap úıi- taptyrmas múmkindik.

---