InfoHub Logo

Qurmanǵazyny taǵy bir aýyr oqıǵa kútip alady. Jalǵyz balasy Qazı qatty aýyryp jatyr eken. Bul jaǵdaı kúıshiniń janyn qozǵaıdy. Balanyń ýaıymymen úıinde astyń joǵyn, turmysynyń qıyndyǵyn da elemeıdi. Biraq Qurmanǵazynyń tilegi bolyp, Qazı kóp ýaqyt tósek tartyp jatyp, áıteýir beti beri qaraıdy. Ábden aryqtaǵan bala endi tez ońalyp ketý úshin jaqsy tamaq kerek bolady. Onyń ústine kóp ýaqyttan beri kúıshisin saǵynǵan el adamdary, dostary aǵylyp kele beredi. Balasyna da, kelgen-ketken qonaqtaryna da Qurmanǵazy tamaq, qonaqasy taýyp bere almaıdy. Óıtkeni, Alqa men Baıǵazynyń jıǵan-tergen qara-qurasyn baıaǵy Áýesti qýǵanda Qurmanǵazynyń minip ketken eki atynyń ıesi, baı sypyryp alady. Sóıtip, kúıshiniń úı-ishi tek ólmestiń kúni ǵana bolyp kúneltip otyrady. Basqasynan buryn Qurmanǵazyǵa
qonaqtaryn, dostaryn razy qyla almaǵany batady. Pálen jasqa kelip aq-qarany, ómirdiń nebir soqpaǵyn da, toqpaǵyn da kórip, qanshama ystyq-sýyqqa kómpisti bolǵanymen, myna bir jaǵdaı kúıshiniń janyn qattyraq terbetedi. Qonaqtary ketkesin Qazıdyń janyna jaılap, yńyrsyp:

— Surasań meniń atym Qurmanǵazy,
Qutqarmas qashsa qoıan qumnan tazy.
Úıińe dosyń kelip qury attanar,
Qaıteıin kedeıshilik maldyń azy.
Kúreńniń tobyǵynan tarttym tańba,
Baı menen bas ımedim bıge, hanǵa.
Aryqtap sary aýrýdan turǵanynda,
As taýyp bere almadym Qazıjanǵa.
Aıtaıyn aıt degende óleńimdi,
Bilemin bir kún baryp ólerimdi.
O da bir maǵan bergen baqyt shyǵar,
Keteıin jaıyp jurtqa ónerimdi.
Qurekeń ushqan qusqa myltyq atqan,
Jigitke jaraspaıdy úıde jatqan.
Keshegi býyrqanǵan kezeńimde,
Baılardy qaban edim zar jylatqan, — dep dombyrasyna qosylyp ándetedi. Kúı tartady. Bul kúı el arasynda «Qazıjan» atanyp ketedi.

---