InfoHub Logo

Erkin men Jaras esik aldyna alty shybyq otyrǵyzdy. Sý alys, shelektep tasyp quıdy.

Arada on shaqty kún ótti. Shybyq búrshik jaryp kele jatty. Ekeýi qaıta-qaıta baryp kóredi.

— Mynaý — meniń aǵashym, — dedi Jaras.

 — Anaý meniki...

Shybyqtardy áldeqashan ekeýi menshiktep alǵan. Ákesi de balalaryna dán rıza.

— Eki jyldan keıin kóleńkesinde otyryp shaı ishesińder, — dep qoıady.

Otbasyn qýanyshqa bólegen soń shybyqtar bir túnde zym-zıa bolar dep kim oılaǵan? Túbinen kúrekpen qazyp alyp ketipti. Sirá, esiginiń aldyna otyrǵyzbaq bolǵan ǵoı.

Erkin birden klastasy Seıilǵazydan seziktendi. Aqyryndap jaǵalap kelgen. Kózine ottaı basyldy. Óziniń shybyqtary. Qorasynyń ishinde tizilip tur. Qasynda ıt baılaýly. Seıilǵazy kórinbeıdi.

— Adam emes eken! — dedi Erkin kúıip ketip.

Ótkende ekeýiniń tóbelesip qalǵany esine tústi. Seıilǵazy muny «qalpaq» dedi. Ashýy mundaı kelmes. Jerge atyp urǵan... Muǵalıma apaı kelip qalǵan. Áıtpese...

— Otyrǵyzǵan shybyqtaryńdy julyp tastaımyn! — degen Seıilǵazy yzalanyp.

Aıtqanyn istepti. Bir jaqsysy, julyp tastamapty. Qorasynyń ishine otyrǵyzyp qoıypty.

Bárin ákesine kelip aıtqan.

—  Eregisip qaıtesiń? — degen ákesi. — Ne kóp, toǵaıda shybyq kóp. Ákel de, qaıta otyrǵyz.

Sóıtip, Jaras ekeýi toǵaıǵa taǵy ketken... Altaý emes, on ekisin ákeldi. Seıilǵazyǵa istegen qyry. Onyń tereginen eki ese kóp. İshi kúıse, tuz jalasyn.

İnisi ekeýi taǵy da on eki shybyqty kútip-baptaýǵa kiristi. Árıne, sýdyń alystyǵy qınap tur. Kóp-kórim jer. Shelektep tasyp quıady. Jumystary burynǵydan eki ese kóbeıdi. Biraq qaıtse de shydaý kerek.

On shaqty kúnnen keıin shybyqtar kókteı bastady.

— Taǵy da bireý urlap ketse qaıtemiz? — dedi inisi Jaras. Erkin oılanyp qaldy.

— Kezekpen kúzette túramyz, — dedi. — Búgin men turam. Erteń sen turasyń. Ekeýi osylaı kelisken.

Erkin túni boıy uıyqtaǵan joq. Úıge bir kirdi, bir shyqty. Jurttyń bári uıqyda. Jalǵyz ózi oıaý. Aıdy qyzyqtady. Juldyzdardy qyzyqtady. Ýaqyt óter emes. Áldene tysyr etse, jalt qaraıdy. Bir jaǵynan munysy da qyzyq. Áskerden oralǵan aǵasy qyzyqty áńgimeler aıtqan. Shekara kúzetinde bolypty. Túni boıy kóz ilmeı shekarany kúzetipti. Uıqysy kelse de, uıyqtamapty. Óıtkeni, jaman aıtpaı, jaqsy joq, belgisiz jat pıǵyldy jaý qastandyq jasaýy múmkin. Árıne, Erkinniń qorǵap otyrǵany shekara emes, óziniń eńbegi, bolashaq terekteri... Seıilǵazy sıaqty jat pıǵyldy balalar qastandyq jasaýy múmkin.

Tún tynysh ótti. Erkin paryzynan qutyldy. Erteńine inisi Jaras kezekshilikte turdy.

Tańerteń erte syrtqa shyǵa bergen. Dálizdiń túkpirinen pys-pys etken dybys estildi. Uıqyly-oıaý kózimen barlaı qaraǵan. İnisi — Jaras. Eski quraq kórpeni tósenip, kıimderimen qannen-qapersiz uıqyny soǵyp jatyr. Áıteýir, shybyqtar ornynda eken. İnisine qatty renjidi.
Shaı ústinde muny áke-sheshesine aıtyp bergen. Olar bolsa ursýdyń ornyna ishek-sileleri qatyp kúlip jatyr.

— Senderge bir ıt alyp bermesem, bolmaıdy eken, — dedi ákesi.

Ákesi aıtqan sózin sol kúni-aq oryndady. Úlken tóbet ákeldi Jaras pen Erkinge tez-aq úırenisip ketti. Ony shybyqtardyń qasyna uzyn etip baılap qoıdy. On eki shybyq — on eki aǵash. Áli-aq esik aldy toǵaıǵa aınalady. Qandaı jaqsy?! Muǵalıma apaıdyń tilimen aıtsa, «Aǵash — ómir kórki». Ol kómirqyshqyl gazyn jutady, ottegini bólip shyǵarady. Al ákesinshe aıtsa, «Sharshap kelip, kóleńkesinde shaı ishken qandaı jaqsy?!» Sergip shyǵa kelesiń.

---