InfoHub Logo

Ardaqty aǵaıyn, qalamdas dos, qadirli qonaq, tatar baýyrlar!

Tatar halqynyń óskeleń óneri men arshyndy ádebıetiniń aptasyn ótkizýge kelgen ónerpaz dostar!

Daryndy, ónerli, ónegeli halyqtyń jan qazynasyn jasaýshy tatar mádenıetiniń qaıratkerleri!

Ejelden tóskeıde maly, tósekte basy ózderińmen birge bolǵan qazaq halqy búgin mynaý astanasy Almatyda, Abaı kúmbezinde: «Qosh keldiń, baýyrym, qonaǵym! Tórdiń tóbesine shyq!» — dep, qazaqsha qushaq jaıyp qarsy alady.

Qazaqtyń Oktábrden burynǵy ozyq oıly aqyndarynyń biri Sultanmahmut tatar mádenıetin qazaq halqyna úlgi-ónege etip kórsetken-di:

«Anaý qyrda tatar tur,

Basqalarmen qatar tur...» degen bolatyn.

Uly Oktábr qaıta týǵyzǵan halyqtar sanynda sharýasy shalqyp, óneri órken taýyp, mádenıeti marqaıǵan tatar, qazaq halyqtary bul kúnde jańa sapaly dos, jańa sapaly týys. Tatar halqy da, qazaq halqy da bul kúnde sovet halyqtarynyń máńgi dostyq uıymynyń terezesi teń, sanatty, sapaly músheleri; bul kúnde bul eki týysqan halyqtyń ónerlik qazynasy búkil Sovetstan mádenıetiniń uly muhıtyna quıatyn Edil men Ertis sıaqty. Halyqtar arasyndaǵy dostyq pen birlikti nyǵaıta berer, tabystyra, jymdastyra, kiriktire berer myqty dáneker de osy ádebıetter, kórkemónerler dostyǵy, tutastyǵy, jarastyǵy.

Qazaq halqy tatar halqynyń Ǵabdolla Toqaı, Májıt Ǵafýrı, Ǵalımjan Ibrahımov, Musa Jálıl, Ahmat Erıkáı, Shaıhı Mánnur, Ahmet Faızı, Najmı sıaqty marqum jazýshylaryn jáne qazirgi Ǵumar Bashırov, Hasan Týfan, Abdrahman Ábsálámov, Naqı Isánbát, Zakı Nýrı, Sıbǵat Hakım, Nýrı Aryslanovtardy ana tilinde jaqsy kórip oqıdy. Sol sıaqty qazaq romandary men dastandaryn, óleńderi men áńgimelerin tatar halqy da súısine, súıine oqıdy. Sondyqtan da biz árbir sovet jazýshysyn tek óz ultynyń ǵana jazýshysy ǵana emes, búkil sovet halyqtarynyń jazýshysy dep bilemiz. Osynyń ózi týysqan halyqtardyń arasyndaǵy shyn dostyqtyń aıqyn bir kórinisi sıaqty.

Osy astanada, Almatyda, Abaı teatrynda májilisi ashylyp, mámilesi bastalyp otyrǵan tatar ádebıeti men kórkemóneriniń Qazaqstandaǵy aptasy sol uly dostyqtyń, máńgi birliktiń, týystyqtyń bir nyshany, sovet halyqtarynyń arasynda týǵan jańa rásim, jaqsy dástúr, jarqyn salt. Ózara tanysý-tabysý, syrlasý, aqyl qosý, óner ósirý salty. Yrysty — aýys, ónerdi — juǵys eter salt.

Sol salt boıynsha elimizge kelgen tatar ádebıeti men óneriniń merekesi qutty bolsyn!

Qalamdastar dostyǵy — halyqtar dostyǵy!

Sol dostyq jasasyn!

1962

---