InfoHub Logo

Meniń ishimde qazir ǵajap ózgerister bolyp jatyr. Tolqyǵan oıdy, boıdy bılegen qýanyshty tolyq aıtýǵa tolymdy sóz tappaı turmyn.

Iapyr-aý, emes pe edim keshe bala,
Asyppyn teń ortadan myna qara!
Qysylǵan soń óleń de shyǵyp ketti aýyzdan.

Zaman shirkin zymyrap barady. Bireýler onyń shańyna tunshyǵyp qalyp jatsa, bireýler úzeńgi qaǵysyp taıtalasyp barady. Meniń alpysymdy osynsha áıgilep, meıramdaýlaryńyz jaı emesin ábden bilemin. Gáp alpysqa kelýde emes, qalaı kelýde ǵoı. Alpystyń bıigine shyǵyp alyp, artyma kóz jibersem alty aılyq joldy alty-aq attap jetippin. Jalǵyz jetkenim joq. Bárińmen birge, halyqpen birge jetippin. Maǵan qazir ómir — teńiz, halyq — keme, partıa — kapıtan bolyp elesteıdi. Aman-esen, oljaly etip meni osy shaqqa keltirgen sol halyq, sol partıa. Olaı bolsa, maǵan arnaǵan syı-qurmet, ıgi tilekterińizdiń bárin birin qaldyrmastan men partıama, halqyma arnadym.

«Jaqsy sóz jan azyǵy». Jan jasaı bilse, azyq jetkilikti bolǵan sıaqty. Biraq, kóńilde bir túıtkil tur. Almaqtyń salmaǵy bar. Ony ekiniń biri kótere bermeıdi. Kótersem degen talap taýdaı. Taýdaı talap keıde tıtteı tómpeshikke súrinip te qulaı salady. Ondaı sátsizdikke ushyraı qalsa cóge kórmeńizder.

Menen buryn bul úıde talaı aǵaılardyń 60 jyldyq merekesi ótti. Olar osy minbeden «alpys, degen nemene táıiri!» dep edi. Degizgen árıne, qýanysh. Meni de qýanysh kernep tur. Áıtse de, alpysty ońaı deı almaımyn. Óıtkeni, jańaǵy aǵaılar deri dese de, býyndary qazir syrtyldap júr. Býyn nelikten syrtyldaıtyny belgili. Men tek barymdy aıamasqa ýáde etem. Naǵyz jazýshylyq eńbek ınemen qudyq qazǵanmen birdeı. Sol qudyqtan sáti túsip fontan atqysa kópsinbeımin. Tamshylap, jylymshylap aqsa Sizder azsynbańyzdar.

Maǵan kórsetken qurmetterińiz ádebıetke kórsetken qurmet. Halyqqa rýhanı azyq bolǵan ádebıetimizdiń lázzaty, nári kúnnen-kúnge arta bersin! Ony jasaýshylardyń taýy shaǵylmaı, qalamy muqalmaı alpys túgili, júzge jete bersin!

1962

---