InfoHub Logo

Jazýshylardyń jýyrda Kreml saraıynda ótken úshinshi sezi ádebıet jaıyn alty kún áńgime etti. Sovet elindegi, sosıalısik, kapıtalısik syrtqy elderdegi ulyly-kishili halyqtardyń báriniń derlik sezge ádebıet ókilderi qatynasty. Túri, dini, tili árqıly adamdar bas qosqan osy úlken jıyn sovet ádebıeti dúnıe júzinde eń aldaǵy ádebıet ekenin taǵy da bir áıgiledi. Sosıalısik realızm ádisi ómir shyndyǵyna, Marks, Lenın ǵylymdaryna súıenedi, jazýshy men halyqtyń jubyn jazbaıdy. Sondyqtan sovet ádebıeti qoǵam ómiriniń aınasy, qoǵamymyzdy bastaýshy partıanyń ozyq oıy — jarshysy bolyp keledi.

Qazirgi qazaq ádebıeti ómirshil sol úlken ádebıettiń, gúldengen jýan bir butaǵy -Lenındik syılyq alyp otyrǵan Muhtar Áýezovtiń Abaı týraly, Abaı zamany týraly tórt kitabyn maqtan etemiz. Áıtse de, tabystan talap úlken. Halyqtyń rýhanı tilegi kún sanap ósip barady. Qyzyqty kıno kartınalardy kóbirek surap jatyr. Ol úshin aldymen qyzyqty kınosenarııler jazý kerek. Jaqsy spektáklder surap jatyr. Ol úshin aldymen jaqsy pesa jazý kerek. Al, jazý degen sóz áýeli ómirdi, adamdy bilý degen sóz. Biz bettep bara jatqan komýnızm eshkim kórmegen jańa dúnıe. Ony jasaýshy adamdar da jańa. Ómirimiz, adamdarymyz sonshalyq shapshań ósýde, ózgerýde, kózden tasa qylsań-aq shatasasyń. Sondyqtan, búgingi taqyrypqa jazýdy, búgingi ómirdi kóz jazbaı zerttep otyrýdy sıez basa aıtty.

Birsypyra qazaq jazýshylarynyń basynan bir jalǵan uǵym qalmaı júr. Olarsha, ádebıettiń shaǵyn túrlerin shaǵyn jazýshylar ǵana jazatyn sıaqty. Shynynda shyǵarma kólemin emes, kórkimen, salmaǵymen baǵalanady. Kólemi kishi shyǵarmalarymen-aq úlken jazýshy bolǵandar az ba? Bizde áli kúnge ózin tanytqan sheber áńgimeshi, feletonshy, án teksterin jazýshy, ocherkshiler joqtyń qasy. Bul sol jalǵan uǵymnyń saldary bolýy múmkin.

Partıa, úkimet basshylarynyń sezge qatynasýy, dostyq, jyly sózderi, bergen keńesi ádebıetshilerdiń oıyn keńite, shabytyn arttyra tústi. Jazýshyda shabyt bolsa bári bolady.

---