InfoHub Logo

PİKİR

Búgingi kúngi qazaq ádebıetin, onyń ishinde qazaq óleńin asqarala bıikterge kóterip júrgen zamandas aqyndarymyzdyń biri — Sáken Imanasuly ekenine meniń kúmánim joq. Onyń esimi ulttyq poezıamyzdyń ótken ǵasyrdyń alpysynshy jyldary jaratylǵan Muqaǵalı Maqataev, Tumanbaı Moldaǵalıev, Qadyr Myrzalıev, Jumeken Nájimedenov qatarynda turýǵa laıyq.

S. Imanasov poezıasy bizdiń qazaqy rýhanıatymyzdy nedáýir baıtty desem, artyq aıtpaspyn dep oılaımyn. Onyń qalamynan týǵan ondaǵan kitaptardan ózimiz ómir keship otyrǵan mezgildiń óleń tilimen kúılenip, kestelengen sazdy shejiresin oqyp, tanımyz. Ári bul áleýmettik uranshyl, qurǵaq deklaratıvtik saryn emes. Anyq sulý, syrly poezıa. İshten, júrekten shyqqan, keıde muńdy, názik, al kóbine-kóp ereýilshil, birbetkeı, ójet, órshil poezıa. Imanasovty ózge tustas aqyndardan erekshe aıyryp, bólektep turatyn da — onyń osy ójet, órshil minezi.

Sáken aqynnyń osyndaı elden erek jemisti eńbeginiń resmı qoǵamıat tarapynan ádil baǵalanatyn, sóıtip aqynnyń ózin ǵana emes, ózge de Sákenshil oqyrmandardy rıza etetin ýaqyty keldi dep bilemiz.

30.12.2003 j Almaty

---