InfoHub Logo

Qylyshbaı aqyn ádette bir shyqsa, eki-úsh aı jolaýshylap bir-aq qaıtady eken. Mundaıda saǵynysqan aýyl-aımaq túgel jınalyp, mereıleri ósip, jaı-japsardy barynsha keń áńgimeleıtin bolǵan. Osyndaı bir shyraıly dıdarlasý ústinde aýyl jigitteriniń biri bıyl azyn-aýlaq ýaq maldyń júdeýligin, keler kúnniń qalaı bolary alańdatyp otyrǵandyǵyn aıtady.

— E, jazdygúni jutaǵandaryńa jol bolsyn? — depti Qylyshbaı.

— Ózińiz biletin Sársenbek baı bıyl jerdiń otyn da, qudyǵymyzdyń sýyn da bıletpeı qoıdy. Jerimizge malyn jaıyp, qudyǵymyzǵa qoıyn sýaryp, ápshimizdi bir ýys etti.

— Bar bolǵany sol-aq pa? Sársekeńniń maly turmaq ózin bul mańaıǵa jolamaıtyn eteıin. Buıyrsa bir bozqasqanyń sorpasyn da iship qalarsyńdar.

— Qaıtip, Qylysheke?

— Erteń tań atpaı bir jigit qudyqqa túsip, shegenge jasyrynyp tursyn. Aqyry qudyqqa baıekeńniń ózi keledi dedińder ǵoı. Qudyqqa qaýǵasyn salǵan kezde birinshisine tımeı, ekinshisin ustap, jibermeı tartyp tursyn. Baı qudyqqa úńilgen kezde álgi jigit erbeńdep, sýǵa qulaı ketsin. Arǵy jaǵyn taǵy kóre jatarmyz, — deıdi Qylyshbaı.

Aıtqandaı-aq kúndegi ýaqyty sáske tústiń mezetinde Sársenbek baı qoıyn shubatyp, qudyqqa qaraı kele beredi. Kele sala aı-shaı joq, qaýǵasyn qudyqqa salyp jiberedi. Qudyqtyń ishinde shegendi tasalap turǵan jigit Qylyshbaıdyń álgi aıtqandaryn isteıdi. Qudyqtyń ishinde qaýǵaǵa jabysyp turyp, sýǵa erbeńdeı qulap túsken «báleni» kórgen baı shalqasynan túsedi. Túrýli turǵan irgeden muny Qylyshekeń kórip otyrady.

Sársenbek baı tura salyp, shýlap kele jatqan qoıyna qaraı júgirip, qoıshysyna:

— Oıbaı, qaıtar keıin, qudyqta bir pále jatyr. İshinen bir bozqasqasyn tańdap ustap, úıge alyp bara ber, — deıdi de de, ózi Qylyshbaıdyń úıine qaraı júgiredi. Asyǵa-úsige tabaldyryqtan attaı berip:

— Qylysheke, myna qudyqtan bir pále kórdim, tezirek joryp jiberińiz, — deıdi. Qylyshbaı eshteme túsinbegen raıda:

— Baıeke, o ne, jaıshylyq pa? — depti.

— Oıbaı, aınalaıyn, Qylysheke, myna qudyqtan bir bále kórdim.

— Baıeke, bul qudyqtyń basyna jyn-shaıtan erteden-aq úıir edi. Sonyń biri shyǵar, eshnárse atadyńyz ba? — deıdi.

— Iá, estýim bar edi. Meni qaı Qudaı qara bastyrdy. Bul qudyqqa bıyl qaıdan qona qalyp edim, Qudaı qyrsyǵyńnan saqtaı gór, bir bozqasqa atadym.

Qylyshbaı jel bere túsip:

— Oıbaı, tezirek taratyp jiber, tezirek qamyna kiris, — deıdi. Ol osylaısha aýyl-aımaqty jas sorpaǵa bir keneltedi.

Arada birer aı ótkende Qylyshekeń jigitterin taǵy jınap alyp:

— Soıar mal joq, bári aryq eken. Sákeń baıdan taǵy bir sorpa ishemin, — deıdi.

— E, qalaı, Qylysheke?

— Baı uıqyǵa bardy-aý degende bes-alty jigit úıin kóterip, esigin artyna qaratyp qoıyńdar da, qoıyn úrkitińder. Arǵy jaǵyn kóre jatarmyz, — deıdi.

Aýyl jigitteri Qylyshekeńniń aıtqanyn buljytpaı oryndap, tún qarańǵysynda eshnárse sezdirmeı ketedi. Qoradaǵy qoıdyń shýynan shoshyp oıanǵan baı esikke qaraı tura júgirip, mańdaıyn keregege uryp alady. Sóıtse, ornynda esigi joq. Baı báıbishesin oıatyp, sham jaqtyrsa, esigi artqa qarap qalypty, júktiń tasasynda tur.

Aqyly aıran bolǵan baı tań atar-atpastan Qylyshbaıdyń aýlyna qaraı shabady. Qylyshekeń úıinde eken, túk sezbegen adamsha jaıbaraqat:

— Baıeke, reńińiz nege munsha qashyp ketken, ne boldy? — depti.

— Oıbaı, Qylysheke, bıyl meni bir qyrsyq aınaldyrdy. Anadaǵysyn ózińiz bilesiz, al túnde úıimniń esigi artqa qarap qalypty, — dep baı jaǵasyn ustaıdy.

— Apyraı-á, mynaý sumdyq eken. Áneýgúnginiń salqyny ǵoı, ketpeı alyp júrgen ǵoı. Eshnárse atadyńyz ba?

— Bir bozqasqa atadym, Qylysheke.

— Oıbaı, tez taratyp jiberińiz. Túneýkúnginiń keneýi ǵoı ketpeı júrgen. Endi ketedi.

Sóıtip, jónsiz basa-kóktegen baıdy janynan shoshytyp, qaıtyp bul araǵa jolamaıtyn etken eken.

---