InfoHub Logo

Kezinde Áýlıeta qalasynda Seıdýaly tóre jáne Myrzahmet degen iri saýdager turypty. Dáýlet jarystyrǵan osy eki paqyr «qalanyń bazaryn men bıleımin, men bıleımin» dep únemi ańdysa júrgen. Kıim kıý, at miný jáne basqa sáýlet jaǵynan Myrzahmettiń asyńqyrap keter jeri kóbirek eken. Osy jaǵynan saǵy synǵan Seıdýaly endi amal-aılaǵa basyp, sózden syndyrý, muqatý jaǵyn qarastyryp, Shý boıynan Qylyshbaıdyń kelýin kútedi.

Kúnderdiń kúninde qalaǵa Qylyshbaı keledi. Sony ańdyp, qulaǵyn túrip júrgen Seıdýaly jat ta jabysyp:

— Aınalaıyn, Qylysheke, myna Myrzahmetti halyqtyń aldynda bir syndyryp, el betine qaraǵysyz etip berińiz. Qalaǵanyńyzdy bereıin, — deıdi. Shaıqymazaq, ári tapqyr

Qylyshbaı az-kem oılanyp turyp:

— Jaraıdy, aldaǵy beısenbi, juma bazarǵa deıin Myrzahmettiń atyndaı at, kıimindeı kıim, sáldesindeı sálde tap, — deıdi.

Aıtqanyndaı-aq bazarǵa halyq óte kóp jınalyp, jer qaıysyp ketedi. Kún kóterile bazarǵa sándene kıinip, aqboz at minip, daǵaradaı sáldeli Myrzahmet te keledi. Ol qalyń jıynnyń shetine kelip toqtaı bergende bir jaqtan jurtty qaq jaryp, dál sondaı at minip, kıim kıgen Qylyshbaı da shyǵyp, baıqatpaı qasyna kelip tura qalady. Birinen-biri aınymaı, jarbıyp turǵan ekeýdi kórip, jurt qyran kúlkige batady. Artyna jalt qaraǵan Myrzahmet dál ózi qusap jarbıyp turǵan Qylyshbaıdy kórip tilge de kelmeı, atynyń basyn burǵan kúıi tura qashady. Qylyshbaı da sońynan qalmaı jónep beredi.

Aqyry, Myrzahmet qan bazardan qasha jóneledi. Qylyshbaı sonda da qalmaı qoıady. Halyqtan qara úzip, kóz kórmes jerge barǵanda bir tasada tosyp turǵan Myrzahmet saýdager:

— Osy mende neń bar edi, Qylysheke? Artymnan qalmadyńyz ǵoı, tegi, — depti. Sonda Qylyshbaı turyp:

— Assalaýmaǵaleıkúm, Myrzahmet búkir,
Ekeýimizdi búkir qylǵan Qudaıǵa shúkir.
Bir jyldyq shyǵynymdy ótemeseń,
Sońyńnan qalsam, qalsam betime túkir, — depti.
Budan ońaıshylyqpen qutylmasyn bilgen Myrzahmet Qylyshbaıdy úıine ilestirip baryp, bar qalaǵanyn berip, attandyryp jatyp:

— Taqsyr, Qylysheke, ekinshileı meniń qasyma kelip turýshy bolmańyzshy, — dep taǵy jalynǵan eken.

Sóıtip, Áýlıeata qalasynda ańdysqan eki baıdy osylaısha tespeı sorypty.

---