InfoHub Logo

(Sheker Kárimqyzyna arnaımyn)

Ekeýmizdiń aramyzda eki jas aıyrma bar. Soǵan sáıkes ártúrli klastarda oqydyq. Biraq minezimizdiń sáıkestiginen shyǵar, jasymyzdaǵy aıyrmashylyq dostyǵymyzǵa bóget bola almapty. Mektep aýylymyzdan eki-úsh shaqyrymdaı jerde boldy da, baryp kelip oqydyq. Sovhoz ortalyǵyna kúndelikti qatynaıtyn eki-úsh shaqyrymdyq jol ústinde, úıde júrgendegi barlyq bos ýaqytymyzda, bir-birimizdiń janymyzda qonyp qalatyn kezderimizde de sóılese bersek sózimiz taýsylmaýshy edi. Esh jan bóget jasamastaı ońashaǵa shyǵyp alǵan soń, sábı janymyzdyń aınasyndaı, bir uzaq áńgimege kirisetinbiz... Ondaı sátterde kishkentaı júrekterimizdi tátti qıal kernep, bar janymyzben sol áńgimege beriletinbiz. Ondaıda dosymnyń kózderi erekshe bir shýaqqa malynyp, dál qazir áldeqaıda usha jóneletindeı, jaınap ketetin. Onyń sol bir nur shashqan júzine qaraı, men de sheksiz qýanyshqa keneletinmin. Iá, men sol bir qıaldan týǵan ásem bolashaqtan da dosymnyń kirshiksiz janynyń habarshysyndaı bolyp elesteıtin onyń qos janaryna qarap jadyraýshy edim.

Sóıtip júrgende dosym kenetten qatty naýqasqa ilikti. Onyń únemi sáýle shashyp, jaınap turatyn, meıirim tógip, aıalaı qaraıtyn qaraqat kózderinen endi men jıi-jıi aýyr bir muńdy, jan kúızelisin ańǵaratyn boldym. Kórgen jerde únemi ýáıimdemeshi, bári aq áli umyt bolady dep jalynǵym keletin. Barlyq jyly sózderimdi aıtyp, júreginde tunǵan búkil sherden aryltýdy armandaıtynmyn. Biraq bata almaýshy edim. Ol jóninde áńgime bastaýǵa ekeýmizdiń de kóńilimiz daýalamaıtyn. Birde men eki-úsh kúndeı tumaýratyp qalǵanda ǵana osy taqyrypta sóz qozǵalyp, ol: bárin de maǵan ber mundaı kúıdiń, seniń janyń syrqattyqtan japa shegýge tıis emes dep, — jylap jibergen. Esińde me ekeýmizdiń bolashaq týraly aıtatyn taýsylmaıtyn tamasha áńgimelerimiz, sen soǵan sol bir tamasha kúnderge alańsyz jetýge mindettisiń degen ol. Onyń tilegi shynynda da osylaı degendeı, móldiregen jas tamshylary omyraýyna qaraı jarysa qulap jatqan-dy...

Kóp uzamaı biz basqa jaqqa kóship kettik. Endi hat jazysyp turdyq. Bir hatynda ol: "Men kimmin?" dep surasam, seniń: "Zamanyń keleshekke daıarlap jatqan jańa dáýirdiń urpaǵysyń," — dep, jaýap berer ediń. Men, shynymen, óz zamanyma rızamyn. Erkin ósip, erjetip kelemin. Qaıda barsam da jolym ashyq, talabyma tejeý bar dep bilmeımin. Biraq men óz úlesime tıgen sol múmkindikterdi paıdalana alamyn ba? Eger jaǵdaıym baıaǵy kezdegideı bolsa mundaı suraq týmaǵan da bolar edi-aý... Al qazirgi jaǵdaıda ómir meni óz qajetine jaratady dep jıi oıǵa qalamyn," — depti.

Dosymnyń ashshy shyndyqtan týǵan bul suraǵy meni qatty qınady. Alaıda qansha janym aýyryp ketse de, onyń sózderinen bir búrkemek kúı sezgendeı, jaı taba almadym da, óz oılarymdy ábden ekshep alyp, jaýap hat jazýǵa otyrǵanmyn. " Qymbatty dosym, ekeýmizdiń tań bozyna deıin taýsylmaıtyn tátti qıal men sulý armandarǵa toly tamasha áńgimelerimizdiń shyndyqqa aınalaryna men eshqashan da kúmán keltirgen emespin jáne osy senimimnen eshqashan da aınymaspyn. Al shynaıy baqytqa barar jolda kedergilerdiń de az bolmaıtyny týraly biz az aıttyq pa?! Menińshe, seniń kóńil kúıińe qazir áser etip júrgen solardyń bireýi. Sondyqtan jasýǵa haqyń joq dosym. Sen osyny umytpa! Sen de, ózimiz kóp aıta beretin, uly ómirdiń jasaýshysysyń. Ómir bolý úshin, ómirdiń nurly bolýy úshin seniń, sen sıaqty móldir sezimdi jáne jan dúnıesi kirshiksiz taza mıllıondaǵan adamdardyń ómiri qajet. Sen olardyń qataryn kemitýge tıis emessiń dosym!". "Hal-jaǵdaıym jaqsy, — dep jazypty ol sońǵy hatynda, — qazir aldyma qoıǵan úlken maqsatym bar. Sol sebepti kóńil kúıim de oıdaǵydaı. Bolashaqty óz qolymyzben jasaý isine óz úlesimdi qosý úshin bar nıetimdi jumyldyryp, emdelýdemin. Jeńisime degen senimim de kún saıyn nyǵaıa túskendeı. Men ómir úshin kúresýdemin."

Tezirek jazyl, dosym! Bizdiń ómirimiz ómir úshin qajet. Ómir degen ulynyń ózi qybyrlaǵan jándiktiń ómirin qosa eseptegendegi barlyq ómirlerdiń jıyntyǵynan turatynyn esker!

1967-jyly Semeı oblysy Aıagóz aýdandyq «Alǵa» gazetinde jarıalandy.

---