InfoHub Logo

Túımesh — kelige túıip, jańǵyryqqa salyp toqpaqpen janyshtalǵan et. Ony keıde sol kúıi qatyryp nemese qarynǵa salyp saqtaıdy. Maıǵa qaryp, sýǵa qaınatyp, keıde ishekke tyǵyp qaınatyp pisiriledi.

Maı túımesh — maıyn kóbirek jiberip kelige túıgen et. Ony kóbinese óńeshke, júrektiń qolqasyna tyǵyp pisirýge bolady.

Biteý — búıenge tyǵyp pisirgen usaq et. Onyń bir jaǵy tuıyq, ekinshi basy tigýli, soǵan oraı piskende óz sorpasy ózinde bolady.

Meńireý — ásiptiń úlken jáne semiz etip jasalǵan bir túri.

Jaýjumyr — soıylǵan maldyń etin buzyp, qalyń etterin arsalap alyp, túgeldeı óz qarnyna salyp, sý quımaı pisirgen et. Ony keıde jaýbúırek dep te ataıdy.

Borsha kise — taýyq, qaz, úırektiń, buzaý, laq, qozynyń etterine kúrish, sarymsaq, burysh, shıki jumyrtqa, sary maı qosylady. Sút quıyp otyryp mashınaǵa tartylady. Sodan ishekke, búıenge tyǵylyp nemese qamyr arasyna salynyp pisiriledi.

Jaýbúırek — qoıdyń, eshkiniń, baǵlannyń buzbaı pisirgen bóksesi.

Syrbaz — óz terisine orap, aldyn—ala ot jaǵylǵan shuńqyrǵa kómip pisirgen baǵlan eti.

Et hoshan — quıryq maı, qamyr, ósimdik maıyn qospalap qarynǵa salyp peshke pisiretin, tuz—burysh, ıis dámi kelisti taǵam.

---