InfoHub Logo

Sholpan óldi... Oktábr tańy atqannan keıin oıana bastaǵan qazaq qyzdarynan shyqqan jana talap, jas aqyn Sholpan 1926 jyldyń 28-sentábrinde joq boldy. Aımaqtyq partıa komıtetiniń áıel bólimi shyǵaratyn «Áıel tendigi» jýrnalynyń 5 — 6 nomerinde Sholpannyń qysqasha kim ekeni aıtylyp, sýreti basyldy. Sholpandy qazaq oqýshylary bile bastaǵan edi. Sholpan qazaq qyzdarynan shyqqan birinshi aqyn edi. Kedeı tabynyń aqyny edi. Sholpan jyl qusy edi, jańa gúldegen qyzǵaldaq edi. Ósip jetpeı tez soldy. Kókteı soldy.

Sholpannyń jasy jıyrma úshte edi. Áke-sheshesi Aqmola ýeziniń Nurbaı bolysynyń qazaǵy. Kedeı, nashar adamdar. Sholpandy 1918 jyly qazaq ádetimen Al dońǵar balasy Bókeı degenge bergen. Bókeı súımegen adamy bolǵandyqtan Sholpan sovet zańynyń arqasynda bosanyp shyqqan, sodan oqý izdegen. Aqmolada 1923 jyly komýna mektebinde tárbıelenýshi bolǵan. 1924 jyly Orynborǵa kelip, áıelder mektebinde oqyǵan. Sholpannyń óleńi eń birinshi ret 1923 jyly «Eńbekshi qazaqqa» basylyp shyqty. Sonda-aq aqyn ekeni kórine qalǵan edi. Jyl saıyn óleń kestesin ádemilep kele jatyr edi. Ne kerek, kók shybyq jetpeı qıyldy!

Sholpan 1923 — 1926 jylǵy jazǵan óleń jınaqtaryn óler aldynda maǵan jiberipti. Jazǵan hatynda:

«Óte nasharladym. Doktordyń «elesin» degen kúni jetip qaldy. Qosh bolyńyz! Sholpan batty dep eseptersiz... Ólimge berilgen qaryndasyń Sholpan» depti.

Aıtqandaı keshikpeı Sholpan óldi...

Sóziniń basynda:

Úlgili sóz,
Bola ma kez
Oqyp, bilip jazbasa.
Altyn men jez
Alynbas tez,
Eńbektenip qazbasa.
Tilińnen shyǵar,
Basqalar uǵar,
Kóńildiń sherin qozǵasa, -

depti.

Súıdegen Sholpan eńbek jolynda óldi. Qazaqtyń kedeı áıelderiniń kóńil sherin jyrlaýǵa alasuryp izdengen Sholpan jetpeı joq boldy.

Qosh, qaryndas! Qosh, joldas!

1926 jyl

---