InfoHub Logo

6-klass oqýshysy Saqbergen sabaq oqymaı, ylǵı kóshede oınaıdy da júredi. Qaı jerde balalar oınaǵan, adam kóbirek jınalǵan jer bolsa Saqbergendi naq sol jerden tabasyn. Biraq sabaqty oıyn sıaqty jaqsy bilmeıdi. Muǵalim sabaq suraǵanda ol suraqtyń basqy eki sózin aıtady da, bedireıip turyp alady. Ne búgin qolym tımeı oqı almap edim demeıdi, ne bilmeımin demeıdi. Oılaǵan bolyp aýzyn jybyrlata beredi. Keıde jan-jaǵyndaǵy balalardyń ózara sóılesken sybyryna qulaq salady.

Muǵalim jańa sabaq túsindirgende ol qaltasynan sholaq bákisin shyǵaryp alady da, Saqbergen degen atyn partaǵa oıyp jaza bastaıdy. Buryn onyń «Saq» degeni bitken, endi «bergeni» qalǵan. Keıde qaltasynan nanyn alyp, úzip jep, maljańdap otyrady.

Balalar ony qabyrǵa gazetine de jazyp qoıdy:

Saqbergen,

Tamaq dese tap bergen,

Oqý dese jalt bergen...

Fızıka sabaǵynan buryn Saqbergenniń «qanaǵattanarlyq» degen ǵana baǵasy bar edi. Onyń ózin de kitaptan kózi túsken jerin oqyp berip alǵan bolatyn. Endi búgin kezek kelip qala ma dep qypyldap keledi. Ol partada qasynda, artynda otyratyn balalarǵa keıde jalynyp, keıde qodyrańdyp ózine sybyrlap jiberýdi, ne kitaptan kórsetip otyrýdy suraıtyn. Búgin ol janynda otyratyn Mergenge qyr kórsetip kelip edi.

Mine, fızıka muǵalimi kirip keldi. Jyl basynan bergi sabaqty qaıtalaý júrip jatqan kez. Balalardy túgendep bolǵan soń muǵalim Saqbergendi ornynan turǵyzyp:

— Fızıka degen ne? — dep suraq qoıdy. Ol ishinen baǵana Mergenge qyr kórsetkenshe jalynbaǵan ekem dep oılady.

Saqbergen baǵanadan beri fızıkany ózi-aq ashyp qoıatyn edi, suraqtyń qaı jerinen keletinin bilmedi. Onyń qasyndaǵy Mergen dereý aldyndaǵy kitapty aldy da, ashqan bolyp partanyń astyna tastaı saldy, sóıtip geometrıany alyp, ashyp Baqbergenniń aldyna qoıdy jáne qolymen nusqap bir sózdi kórsetti. Saqbergen oqı berdi:

— «Geo degen grektiń jer degen sózi, metrıa degen ólsheý degen, jer ólsheý degen sóz...»

Balalardyń kóbi syqylyqtap kúlip jıberdi de, birazy tymyraıyp qaldy, al Mergen óziniń joldasyna istegenine uıalǵandaı qyzaryp ketti.

Naq osy kezde artqy partadan bir sybyr shyqty da, Saqbergen qulaǵyn soǵan tosty. Muǵalim shydamdylyqpen tyńdap otyr: «doǵal burysh toqsan gradýsqa teń bolady». Saqbergen qaǵyp aldy:

— Doǵal burysh toqsan gradýsqa teń bolady.

Balalar bir sózden aıta bastady:

— Fızıkada.

Saqbergen: — fızıkada

Balalar:— doǵal

Saqbergen: — doǵal.

Balalar: — burysh.

Saqbergen: — burysh.

Balalar:— bola ma?

Saqbergen: — bola ma?

Muǵalim de, balalar da shydaı almady, bári dý kúlkini qoıyp berdi.

Muǵalim :

— Ony óziń aıtshy. Fızıkada doǵal burysh bola ma? — dedi. Saqbergen ne aıtqanyn endi uǵynǵandaı moıyny salbyrap ketti. Balalar jappaı qolyn kóterdi. Saqbergen sybyrdyń ózin qaıda áketkenin endi ǵana sezdi. Balalardyń jappaı kótergen qolyn kórip, Saqbergen partanyń astyna tyǵylyp qalǵysy keldi...

---