InfoHub Logo

Tıin erte oıansa da, buıyǵyp jata berdi. Jyly ornynan tipti de qozǵalǵysy joq. Qarǵalar qarqyldaıdy. Qar jaýa ma eken? «Asqat aǵa kútip qalar, ol kisi ketip qalsa, ash qalamyn ǵoı», — dep, ózin ózi zorlap áreń turdy. Ary-beri qozǵalyp, denesiniń qurysqan-tyrysqanyn jazǵannan keıin aǵashtardyń ushar basymen zymyrap kele jatyr edi, aldynan kishkentaı kók torǵaı kezdesti.

— Tıin, qaıda asyǵyp barasyń? — dedi ol.

Basqa ýaqytta bolsa, estimegendeı kete berer edi, kók torǵaı osynda qalǵan sanaýly qustardyń biri bolǵandyqtan sózine qulaq asyp, júrisin tejep, moıyn bura qarady. Beıshara qus butaqta búrisip otyr. Ash-aý. «Ózimmen birge ilestire ketsem be eken?» — degen oı keldi jany ashyp. Sodan keıin ony eliktireıin dep:

— Men ashanaǵa bara jatyrmyn. Qalasań, birge júr, — dedi.

— Ashanaǵa? Bul baqta ashana bar ma edi?!

— Kók torǵaı, sózdi kóbeıtip qaıtesiń? Odan da birge ilesip júrseıshi.

— Jaraıdy.

Kók torǵaı ushyp, al tıin aǵashtan aǵashqa sekirip, zymyrap keledi.

— Aqshyl tıin, sen sonshalyqty ushqyr ekensiń ǵoı. Tipti qalysar emessiń.

— Ushqyr bolmasam, ıt-qusqa jem bolmaımyn ba, shapshańdyǵymnyń arqasynda aman-saý júrmin, — dedi ol. — Kók torǵaı, sen meni nege aqshyl tıin deısiń? Men ejelden sarǵysh tıin emespin be?

— Maǵan senbeısiń be? Endeshe túrińe qarasaıshy, — dep kók torǵaı syqylyqtap kúldi.

— Á, meniń jazǵy júnim túsip, qysqa tózimdi jańasy shyqqan eken ǵoı. Túrim sondyqtan da ózgergen ǵoı. Men endi sýyqtan qoryqpaımyn, — dep qýandy tıin.

Sálden keıin ekeýi baqtyń adamdar jıi júretin jerine kelip jetti. Mine, osy arada meıirimdi adamdar ań-qustarǵa jem beredi. Tıinniń «ashana» dep jumbaqtap turǵany osy edi.

Asqat aǵa ketpegen eken. Alystan muny kórip, tilin tańdaıyna tıgizip taqyldatyp, tamaqqa shaqyrdy. Tıin qaraǵaıdyń basynan jyldam túsip, jaıylǵan alaqandaǵy jarty jańǵaqty qaqshyp alyp, qaıtadan joǵary órmeledi. Áp-sáttiń arasynda dánin arshyp jep, al qabyǵyn jerge tastady. Jańǵaq jeýge ońaı bolsyn dep, ádeıi ortasynan qaq bólingen. Áıtpese, qatty jańǵaqty shaǵý qıyn ǵoı. Mine, osylaısha san márte túsip, jańǵaqqa toıyp aldy. Al artylǵanyn jerdi qazyp, kómip qoıdy. Bul azyǵyn qysqa saqtaýy edi. Kók torǵaı aınala ushyp júrip, baıaýlap kep alaqanǵa qondy. Asqat aǵa oǵan kúnbaǵystyń dánin berdi. Kók torǵaı piste shaǵýdyń sheberi eken. Kóz ilespes jyldamdyqpen qabyǵyn arshyp, dánin qylǵytýda. Bir ýaqytta múńk ete qalǵan bir ıis bilindi de, tıin qaraǵaıdyń ushar basyna shyǵyp ketti. Jaqyn mańda ıtter júr eken. Tıin ıtterden sumdyq qorqady. Ol bıikte otyryp aınalany tamashalaýǵa kóshti. Qamqorshy endi óziniń súıikti aq kepterin butaqqa qondyryp, jem berýge kirisipti. Aq kepter — erke. Dál bir jeke-dara tamaq ishetin sholjań balaǵa uqsaıdy. Asqat aǵa ony erekshe jaqsy kóredi. Áne, birdeńe dep kúbirlep, basynan sıpap jatyr. «Bıyl osynda qystaıtyn shyǵarmyn, — dep oılady tıin aınalany toq kóńilmen sholyp. — Qamqor adamdar barda bul arada qystaýǵa bolady».

---