InfoHub Logo

Taldyqorǵandyq pedagog Tatána Lýsenko Máskeýde ótken «Tárbıeleý óneri» avtorlyq ádistemelik eńbekterdiń halyqaralyq baıqaýynan júldeli oraldy. Atalǵan jarysqa Máskeý, Sankt-Peterbor, Saha Respýblıkasy (Iakýtıa), Belarýs,  Qazaqstan memleketterinen 230-ǵa jýyq pedagog qatysty.

Qazaqstannyń ár óńirinen baıqaýǵa 30 avtorlyq ádistemelik jumys jiberildi. Saıystyń sońǵy týryna qazaqstandyq 10 avtordyń jumysy ótti.

Baıqaýdyń máresi jýyrda Máskeý qalasynda VI Búkilreseılik ǵylymı festıvál men XI ǵylym festıvali aıasynda uıymdastyryldy.

Qazylar alqasynyń quramynda Qazaqstannan Mektepke deıingi mekemelerdiń qazaqstandyq birlestiginiń tóraıymy L. Kýlenova boldy.

Sarapshylar komısıasy men baıqaý tóreshileriniń sheshimi boıynsha Taldyqorǵannan qatysqan Tatána Lýsenkonyń avtorlyq jumysy Halyqaralyq baıqaýdyń úzdik jumysy dep tanylyp, jeńimpaz atandy. Onyń jumysy «3-6 jas aralyǵyndaǵy balalardy óz betinshe bilim alý júıesinde ıntellektýaldyq turǵyda damytý úshin óz qoldarymen ázirlegen Montessorı-materıaldar analogyn paıdalanýdyń dástúrli emes ádisi» dep ataldy.

İrikteýden ótken qatysýshylardyń barlyǵy da «Konkýrs fınalısi» Dıplomymen jáne baǵaly syılyqtarmen marapattalyp, baıqaý nátıjesi boıynsha shyǵarylatyn ǵylymı-ádistemelik jınaqqa materıaldaryn jarıalaýǵa múmkindik aldy. Konkýrs aıaqtalǵannan keıin Mektepke deıingi uıym qazaqstandyq birlestigi «Máskeý qalalyq pedagogıkalyq ýnıversıteti» JB MABM bilim berýdegi pedagogıka jáne psıhologıa ınstıtýtymen mektepke deıingi pedagogıka salasynda túrli sharalar ótkizý qarastyrylǵan yntymaqtastyq týraly Memorandýmǵa qol qoıdy.

---