InfoHub Logo

Tarǵaq — ortasha pishindi dala balshyqshysy (salmaǵy 230 g). Osy ádemi, symbatty qustyń negizgi uıalary qazaq dalalarynda ornalasqan. Qysta jyly jaqqa ushyp ketedi (qyrkúıekten naýryzǵa deıin). Jerde, shuńqyrda ornalasqan uıasynda, sáýirde 4 shubar jumyrtqalaryn salady. Atalyǵy men analyǵy kezektesip basyp, 3 aptadan keıin mamyqty balapandary shyǵady da, uıalaryn birden tastap kete beredi.
Balapandary eresekteri sıaqty jándiktermen, ıaǵnı shegirtke, qońyz jáne aýyl sharýashylyq zıankesterimen qorektenedi, sóıtip paıdasyn tıgizedi. Balapandary 1 aıdan keıin ushady. Qýań Qazaqstan dalalary men shólderinde bolatyn bul qustyń sany sońǵy onjyldyqta azaıyp barady. Sondyqtan tarǵaq Qazaqstannyń Qyzyl kitabyna engizilgen jáne dúnıejúzindegi qorǵansyz qustardyń biri bolyp esepteledi.
Sanynyń azaıýynyń negizgi sebepteri — jerdi jyrtý, dala landshaftynyń basqa da ózgeristeri, maldy kóp jaıý, hımıalyq qosylystardy retsiz paıdalaný, ańshylyq. Aýyl sharýashylyq jumystaryn ekologıalyq turǵydan uıymdastyryp, ony qorǵaýdy halyq arasynda nasıhattaý kerek.

---