InfoHub Logo

Tasjarǵan (bedrenes kamnelomkovyı, Pimpinella saxifraga L.) — kóp jyldyq, shóp tektes ósimdik. Bıiktigi 75 sm-ge deıin jetedi. Negizgi tamyry butaqty, birneshe moıyn tamyrly, túsi qońyr. Sabaǵy — tik, ishi qýys, syrtynda qysqa túgi, sabaǵynyń uzyna boıyna sozylǵan jyralary bar. Japyraqtary eki túrli: tómengileri jumyrtqa tárizdi, shet shetinde doǵaldaý kelgen tisteri bolady, joǵarǵy japyraqtary úsh salaly. Gúlderi aq, shatyr sıaqty bir jerge jınalyp turady. Tasjarǵan pımpınella maısym aıynan qazan aıyna deıin gúldeıdi. Dárilik maqsat úshin onyń tamyryn kúzde nemese erte kóktemde qazyp alady.

Tasjarǵan halyq medısınasynda qaqyryq túsiretin, zár júrgizetin, asqazan jumysyn retteıtin, nerv júıesin tynyshtandyratyn dári retinde qoldanylady. Muny ishý ásirese, daýys qarlyqqanda óte jaqsy nátıje beredi. Ol úshin tunbanyń 15 tamshysyn jóke gúlinen jasalǵan terletetin dárige qosyn ishý kerek. Bul ósimdiktiń tamyry sýda óte nashar erıtindikten dárini onyń tamyryn kóbinese araqqa nemese spırtke eritý arqyly jasaıdy. Ol úshin 20 gram untaqtalǵan tamyrdy 50 ǵramm araqqa salyp, 7-10 kún ustaıdy, daıar bolǵan tunbadan 30 tamshydan kúnine 4-5 ret ishedi.

Qýyqqa tas baılanǵanda tasjarǵan men ıtmuryndy teńdeı etin alyp, ony shaı retinde ishedi. Bul shaıdyń 1 stakanyna 1 qasyq taza bal qossa, óte jaqsy nátıje beredi.

---