InfoHub Logo

Tazalaýdy janyńyz súıe me? Kirlengen zatty jaqtyrmaı, shań men bakterıalarǵa qarsy antıseptık alyp júretinderdiń qatarynansyz ba? Bul maqala sizge tazalaýdy tez ári ońaı etýge kómektesedi.

1. Súrtkishti keńse qysqyshymen keptirińiz

Eger shúberegińiz ben súrtkishińizge yńǵaıly sabyńyz bolmasa, qarapaıym keńse qysqyshyn paıdalanýyńyzǵa bolady. Ózińiz yńǵaıly dep tapqan jerine qystyryp, ony qoldanyp bitkennen keıin qystyra salyńyz. 

2. Súrtkishtegi bakterıalardan qutylǵyńyz kelse, ony mıkrotolqyndy peshińizge qoıyńyz.

Súrtkishińizdi jýyp-shaıǵannan keıin de tazalyǵyna kúmánińiz bolsa, mıkrotolqyndy peshińizge bir-eki mınýtqa salyp qoıyńyz. Osy arqyly bakterıalardy óltiresiz. Biraq esińizde bolsyn, matalldan jasalǵan saby bar súrtkishti bulaı tazalaýǵa bolmaıdy.

3. Tazalaýǵa arnalǵan quraldardy ońaı tabatyn jerge qoıyńyz.

Eger tazalaý quraly kóz aldyńyzda turatyn bolsa, ony alyp, árdaıym tazalyq saqtaýǵa múmkindigińiz bolady. Artyq mınýtyńyz bolǵanda las plıtany qolyńyz jetip turǵan jerden súrtkishti alyp, tazalaı salyńyz. Bar bolǵany 60 sekýndyńyzdy jumsaımsyz. Kósheden kelgenińizde aıaq kıimińiz topyraq bolsa qolyńyz jetip turǵan jerden súrtkishti ala alasyz. Úı ishin lastamaý úshin daıyn turǵan tazalaý quralyn sol jerde-aq paıdalana alasyz.

4. Úıińizdiń kireberisine qorap nemese sebet qoıyńyz

Úıińizge kirip kelip, kúrteńizdiń qaltasynan qajet emes zattardy shyǵaryp jatqanyńyzda shaǵyn zattardy sórege shasha salmaı, osy qorapqa nemese sebetke sala alasyz. Apta saıyn osy jıyndy bir tazalap, qajet emesin qoqysqa tastaýyńyzǵa da ońaı bolady.

5. Mıkrotolqyndy peshińizdi tazalaý úshin sirke sýyn salyp, qyzdyryńyz

Mıkrotolqyndy pesh – ashanańyzdaǵy kómekshińiz. Biraq tamaqty qyzdyrý barysynda onyń ishki bóligine sorpasy men sýy shashyraýy múmkin, al sosyn ony tazalaý qıynǵa soǵady. Sizge osy kezde sirke sýy kómekke keledi. Bir shynyaıaq sirke sýyn mıkrotolqyndy peshińizge salyńyz da, ony 3-4 mınýtqa qosyńyz. Budan keıin apparattyń ishin shúberekpen súrtip shyǵyńyz.

6. Ashanadaǵy shkaftaryńyzdyń ústine gazet nemese plenka jaıyp qoıyńyz

Ashanada barlyq jıhazdyń ústine maı jınalady. Ásirese shkaftar men sóreler. Olardyń ústine gazet jabyńyz, al as plenkasyn paıdalansańyz odan da jaqsy: tazalyq jumystaryn júrgizgenińizde kir men maıdy súrtip, ýaqytyńyzdy joǵaltpaısyz.

7. Jýyný bólmesindegi sý aǵyzý quralyn da sirke sýymen tazalańyz

Sirke sýy mıkrotolqyndy peshińizdi ǵana emes, jýyný bólmesindegi sý aǵyzý quralyn tazalaýda da paıdalana alasyz. Bul quraldy ýaqyt óte kele tat basady, al ony ketirý ońaı emes. Polıetılenge sirke sýyn quıyp, onda sý aǵyzardy salyńyz, osydan keıin betin rázeńkemen býyp qoıasyz. Birneshe saǵat ótkende shúberekpen súrtesiz.

8. Kedany tazalaýǵa tis pastasyn qoldanyńyz

Kedańyzdy men sıaqty jaqsy kórseńiz, olardyń tez kirlep ketetinin jaqsy biletin shyǵarsyz. Sebebi onyń tabany aq nemese ashyq sur bolady, al biz turyp jatqan elde keıbir memleketterdegideı joldy sabynmen jýmaıdy. Eski tis shetkasyn alyp, tis pastasyn kedańyzǵa jaǵyńyz da, tazalap kórińiz. Aıaqtaǵannan keıin kedańyzdy dymqyl shúberekpen súrtińiz.

9. Kıimdegi maıly daqtardy ydys jýý quralymen ketirińiz

Ydys jýýǵa arnalǵan quraldardyń jarnamasyn kórgen shyǵarsyz. H quraly tipti sýyq sýda da maıdy ketiredi... dep jatady. Quraldy óziniń tikeleı mindeti boıynsha qoldanyp, kıimdegi maı daqtaryn ketirip kórińiz.

Al siz tazalyqqa qatysty qandaı amal bilesiz? Pikirge jazyp, bólise otyryńyz.)

---