InfoHub Logo

— Ámir, týǵan kúnińmen!

— Dostym, shyn júrekten quttyqtaımyz!

— Jıyrma bestiń áldenesheýin jasap, júzge jet!

Qaýmalaǵan dostarym tilekterin jaýdyryp jatyr. Ózimdi kınojuldyzdaı sezinip turmyn. Búkil álem men dep eljirep turǵandaı. Tańnan beri anamnyń meıirimge toly ystyq lebizderi. Endi, mine, kesh boıy quttyqtaýdan bir jalyqpaǵan dos-jarandarymnyń aq nıetteri. Áı, men baqyttymyn-aý! Baqyttymyn! Ásirese, Sulýshashtyń ózine tilegen jaqsylyq ataýlyny maǵan tilegeni. Basym aınalyp barady. Jıyrma bes jasqa jetkende, barlyq jigitter dál mendeı máz-meıram bola ma eken?! Áı, qaıdam? Mendeı máre-sáre bolatyndar neken-saıaq shyǵar. Súmbil shashyn ıyǵynan tógiltip tastap, erekshe sulý kóringen Sulýshash maǵan taıap keldi. Meniń oıymdy oqyp qoıǵandaı, «Kel, bıleıik» demesi bar ma? Ajarly qyz aıdaı sáýlesin tógip, jaqyn kelse, bıden qashar jasyq jigit men emespin. Váls áýenimen dóńgeleı jóneldik. Shaǵyn dámhananyń ishi ystyq pa, álde qyzdyń deminen be, qara terge tústim. Sulýshash asa taqalmaı, sypaıy araqashyqtyqta yrǵala bıleıdi. Sýdyraǵan shashyn jibek dersiń.Shyr-kóbelek aınalyp júrmiz. Quıqyljyǵan áýen baqyt áleminiń uranyndaı. Al men-sol ǵajap álemniń dara hanzadasymyn. Perızatym da janymda. Qıal qusym budan ary sharyqtaı berer me edi, váls áýeni kenetten aıaqtaldy. Ózim unata qoımaıtyn rok mýzyka qosyldy da, jańaǵy tamasha ólkeniń sıqyrly sýretterin úrkitip jiberdi.

— Káne, dastarhanǵa jaıǵasaıyq!

Qýat asabalyq qyzmetin áli jalǵastyryp júr.

— Kel, Sulýshash, otyraıyq, — dedim amalsyz.

— Ámir jaqtyrmaıtyn rok mýzyka qosyldy. Týǵan kún ıesiniń kóńili túsip kete me dep alańdap otyrmyn, — dep qaldy Áıgerim. Ózi men úshin alańdaıtynyn buryn da aıtyp edi. Búgin taǵy...

— Eger dáýletim tasyp tursa, myna dámhanany bútindeı jaldap alyp, tek qazaqsha áýenderdi tamyljytyp qoıar edim. Árıne, tek Ámir úshin solaı jasar edim!

— Sulýshash, sen odan da Ámirge ǵashyq ekenińdi tap osy jerde moıyndaı salsańshy!

— Myna sózderińmen moıyndap ta úlgerdiń, Sulýshash!

— Iá, sen Ámirge ǵashyqsyń!

— Jaı áriptes qoı, — degen Áıgerimniń daýsy bir túrli ersi shyqty.

Sulýshash men kútkendeı aqtalmady. Óziniń minezindeı týra bitken kirpikterin qaǵyp-qaǵyp jiberip, jaıdary ezý tartty.

— Ámir, baqyttyń qusy kezbe deýshi edi. Búgin sol kezbe qus seniń basyńa Sulýshash bolyp qondy! — Asaba Qýat mánerlep sóılemek bolyp, bárimizdi kúldirdi.

— Men kezbe emespin, Qýat! Men turaqty baqyt qusymyn!

Sulýshashtyń úni tipti syńǵyrlap, kúmis qońyraýdaı estildi. Ázildese otyryp, dastarhandaǵy dámge jaýdaı tıdik. Aqyry dámhana jabylar kezde bir-aq shyqtyq.

«Turaqty baqyt qusyn» qoltyqtap, dámhanadan shyqtym. Ózge áriptesterim jón-jónimen tarap ketti. Týǵan kúnimdi tek Sulýshashpen jalǵastyrǵym keldi. Átteń... Onyń ata-anasy qyzdarynyń tym kesh ýaqytta júrgenin qalamaıdy. Ony birer otyrystarda baıqaǵanmyn. Sol sebepten kermıyǵymdy ózim úıine deıin jetkizip salmaqpyn. Qyrsyqqanda Almaty kóshelerinde kúndizgi ıin tiresken kólik keptelisi múlde joq. Jeńil mashınamen zý etip, úıine jetip bardyq.

— Ámir, dýman kuniń qutty bolsyn! Júregiń ne ámir etse, sol oryndalsyn!-Sulýshash kúndegiden de nurlana, taǵy da quttyqtady. Sóıtti de, aqyryn ǵana betimnen súıdi.

— Kóp rahmet, baqyt qusym, súmbil shashym! — Men de onyń betinen súıdim. Úlbiregen beti maqta tárizdi. Tolqynystan qyzdyń qolyn jibermeı, ustap turyp qaldym. Qatty qysýǵa qımadym, saýsaqtary synyp keterdeı tym názik.

— Ketýim kerek,-dep sybyr etken Sulýshash úıine qaraı júgire jóneldi. Áıtse de ózi ornatqan baqyt kúıin júregimde qaldyryp ketti.

Kenet qalta telefonyma habarlama kelip tústi. Sulýshash qaıyrly tún tilep jazǵan bolar. Basqa kim bolýy múmkin? Jalma-jan ashyp edim, beıtanys nómirden kelgen habarlama bir túrli sýyq kórindi. «Jıyrma besinshi týǵan kúnińdi taǵy da ákesiz atap óttiń be? Ne deıin?! «Ekinshi múshelin atap ótken kimniń uly?» dep men tolǵanyp otyrmyn!» Bul kim? Dereý qońyraý shaldym.

Tutqany kótermedi. Sulýshash syılaǵan shattyń áýeni júregimdi birjolata tastap ketpese de, bir albasty tarpa bas salatyndaı qorqyp kettim. Dál búgingideı shat-shadyman kúnimde meni mysqyldap otyrǵan kim boldy eken? Zárli kekesinge toly sózder jattalyp qaldy.

Kimniń ulymyn? Túngi Almaty kóshesimen zyrlaǵan kólik tizgininde otyryp, osy suraqty erkimnen tys qaıtalaı berdim. Arý qalanyń sulýlyǵyna suqtanýǵa da, tipti súmbil shashymnyń júrekjardy lebizin elestetýge de dármenim qalmady. Sanamdy jalǵyz suraq osqylap turdy.

Tildeı habarlama tynyshymdy qashyrǵaly búgin úshinshi kún. Kóńilimdi jumysqa aýdarǵan bolyp júrmin. Túski úziliste Sulýshashpen birge tamaqtanyp, kóńilim sál de bolsa demdelip qaldy. Onyń jaı ǵana janymda otyrǵany júregime kóktem gúlin shashady.

— Ámir, nege mazań qashyp júr? — Júregimniń ámirshisi bolǵan arýym janymnyń jebeýshisine de aınalyp úlgeripti. Áıtse de oǵan syr aldyrǵym kelmedi.

— Jaı, jastyq shaqtyń qyzýy ǵoı, — dep ázilge súıeı saldym.

— Ol qyzý saǵan qandaı áreket jasaýǵa túrtki bolyp júr?-Tosyn suraqqa ózim oılamaǵan aıaqasty jaýap berdim.

— Seni ata-anammen, anyǵyn aıtsam anammen, ájemmen tanystyrsam dep oılap júrmin.

— Jaqsy oı eken. Men anammen aqyldasaıyn.-SHeshesine aıtpaı, shaı da ishpeıtin qyz ba dep súıiktimniń bul jaýabyna kóńilim tola qoımady. Ne degenmen jaýabyn kúttirip, jigitine nazdaný qyzǵa jarasymdy qylyq qoı.

Kúnde sulý kórinetin Almaty keshi surqaı tartqan. Kózime bir qara noqat elestegen kúıi, úıime keldim. Ájem jalǵyz otyr eken. Kútkenim de osy edi.

— Áje, shaıdy qoıa turaıyqshy. Meniń sizge aıtarym bar,-dedim asyǵyp-úsigip.

— Ulym-aý, jaý shapty ma? Ol ne buıymtaı?

— Áje, meniń ákem týraly biletinińizdi maǵan tolyq aıtyńyzshy. Bul taqyryptyń sizge de, apama da unaı qoımaıtynyn bilem. Biraq sońǵy kezderi ákem týraly oılanyp júrmin.

— Ámir, bul týraly sóz qozǵaǵanyńdy anań bilse, qatty renjıdi. Odan da jabýly qazandy jabýly kúıinde qaldyraıyq.-Ájem týra men kútkendeı, áńgimeden boıyn aýlaq saldy.

— Men on segizge tolǵanda, «tastap ketken ákeńdi surap qaıtesiń?» dep anam jaýaptan qashqan. Endi jıyrma beske kelip, ózim otaý qurar jasqa jetsem de, ákem týraly bilýge haqym joq pa?

— Balam, saǵym qýyp qaıtesiń?

— Áje, men saǵymnan jaraldym ba?

— Táıt, qaıdaǵyny aıtpaı otyr. Seni anań Alladan surap, myna ájeń táńirden tilep alǵan.

Ájem meniń sózime qatty tiksinip, ishteı áldebir duǵalaryn qaıtalap aıta berdi. Anam jumysynan kelgende, ájem ekeýmiz túk bolmaǵan túr tanytyp otyra qaldyq. Jaz gúlindeı jaınap júretin ádemi apama aýyr suraqtar qoıyp, kóńiline qaıaý salǵym kelmedi.

Qorqaý qarańǵylyqtyń patshasy tún bastaldy. Tereze aldyna baryp, áınekke qaradym. Qoıý qarańǵylyqtyń arasynan maǵan óz beınem qarap turdy. Kenet ol myrsyldap kúldi:

— Saǵym qýyp qansha júrer ekensiń? Neni anyqtaǵyń keledi?

— Ákemdi, jeti atamdy bilgim keledi. Onyń nesi aıyp?-Terezeniń ber jaǵyndaǵy men júnim jyǵyla ún qattym. Ar jaqtaǵy men adýyndy, ári tili ashshy eken.

— Al bilgende qaıtesiń? Osy ýaqytqa deıin ákesiz ómir súrip keldiń ǵoı. Anań seni jetimsiretken joq. Oqytty, shoqytty. Úıiń, kóligiń bar.

— Ómir dúnıemen ólshenbeıdi. Áke mahabbatyn kólikpen ólshegen sen aqymaqsyń!

— Já, solaı-aq bolsyn. Eger ákeń jaıly eshteńe bile almasań, qaıtpeksiń?-Ol kekete ezý tartty.

— Qaıtsem de anyqtaımyn.-Kijine qarap edim, ol joq boldy. Myna kúıgelek kúıimnen ózim shoshynyp qaldym. Belgisiz bireýdiń arandatýyna sonsha mán bergenim jaramapty. Eshkimge unamaıtyn ákem taqyrybyn jabaıyn. Iá, ájem durys aıtady. Uıaly telefonyma habarlama kelip tústi. Ótkendegi nómirden eken: «Tekti ǵumyr keshkensip júre ber. Namyssyz ekensiń!» Myna habarlamadan soń, jańaǵy jýas Ámir ǵaıyp boldy da, terezeniń ar jaǵyndaǵy birbetkeı Ámir keldi.

Súreńsiz jumys kúnin saltanatty keshke aınaldyratyn Sulýshash búgin maǵan oń jaýabyn aıtty. Otbasymmen tanysýǵa daıyn eken. Biraq anasy meniń de kelip tanysýymdy qalaıdy-mys. Bul jaýap baqaıesep tárizdi estilse de, kelisimimdi berdim. Búgingi keshti kóńildi ótkizýge tıispin. Bolashaq jarym alǵash ret meniń otbasymmen júzdesetin jaýapty sát qoı.

Kól-kósir dastarhan basynda otyrmyz. Bári de kóńildi kórinedi. Sulýshash bóle sińlisi Aıjandy erte kelipti. Onyń suraǵy bitseshi. Tergeýshi me ózi?

— Sonda bankır bolýyńa anań yqpal etti me, álde ákeń be? — ep qoıyp qaldy. Anama qaradym. Qyryq shyraqty áıeldiń qýlyǵy qol sozymda turmaı ma?

— Joq, meniń keńesimmen osy mamandyqty tańdady. Ári qyzmetinde tez ósýine de men yqpal ettim.-Anam jaýabyn jarastyryp úlgerdi. Urlyq jasaǵandaı, ishteı qýystanyp júrgenshe, súıiktime ákesiz óskenimdi aıtýym qajet. Qonaqtarymdy shyǵaryp saldym da, bólmeme kirdim. Taǵy habarlama. Qoryqqanym sonsha, ony ashýǵa júreksindim. Taǵy ne sumdyq jazylǵanyn kim bilsin? Qyzyǵýshylyǵym basym túsip, habarlamany ashyp oqydym: «Sulýshash qaı rýdyń kelini bolatynynan habarsyz ketti me? Obal bolypty sulýǵa.» Qudaı-aý, bul kim? Qońyraý soqsam, jaýap bermeıdi. Men jaıly sonshalyqty kóp biletin nendeı dıý bul?Tózimim taýsyldy. Bólmemnen atyp shyǵyp, apama jetip bardym. Ómir-baqı qorǵan bolyp kelgen jan anamnan osy joly da saıa kúttim. Onyń jaýaby janymdy tynyshtandyratynyna bek sendim.

— Apa, — dedim daýsym tarǵyldanyp, - ákem jaıly aıtyp berińizshi! Ótinem, jalynam!

— Tosynnan ne boldy? — Kúlip áńgime aıtyp otyrǵan apam tez-aq susty túrge ene qaldy. Ózi ártis sıaqty ma, qalaı?

— Týǵan kúnimnen beri osy suraq janymdy jep barady. Apa, qutqarshy myna zymystan oılardan!

— Nesine janyńdy jeısiń? On segiz jasyńda aıtqanmyn. Ákeń seni tastap ketken. Endi nege ony izdeı qaldyń?

— Anashym, janyńdy jaralaǵym kelmeıdi. Biraq aıtshy, ol qandaı adam edi? Sýretin saqtadyń ba?

— Sen janymdy jaralap ta úlgerdiń. Ol beıbaqtyń sýretin saqtaýǵa mindetti emespin!

Anam meni anaý qorqynyshty qubyjyqpen betpe-bet, jalǵyz qaldyrdy da, óz bólmesine taıyp turdy. Ájemnen de qaıran joq.

Atpastaı kóringen Almaty tańy áreń aǵarańdady. Jumysqa jınaldym. Sulýshashty kórsem, bar qıyndyǵym umytylatyndaı.

— Janym, qaıyrly tań. Seni túsimde kórdim,-dedi ol esh alańsyz.

— Men seni kóp oılaǵan soń, túsińe kirgenmin ǵoı.

— Bilesiń be, apań men ájeń maǵan óte unady. Endi búgin meniń ata-anammen tanysýǵa kelseń, jaqsy bolar edi.

— Keıinirek tanyssam bolmaı ma? — Bul sózimnen soń, Sulýshashtyń júzindegi qýanyshty reń solǵyn tarta qaldy. Jo-o-oq! Ony muńaıtýǵa haqym joq. Aıtqanyna kelistim. İshki úreıim Sulýshashtyń úıine barǵanda rastaldy. Saýaldary taýsylmaıtyn naǵyz qazaqtar eken. Keı suraqtaryna jaýap berip úlgermeı jatyp, kelesi suraqtaryn kóldeneń tarta qoıady.

— Ákeń jóninde tis jarmadyń ǵoı. Kelgeli apam, ájem dep qana otyrsyń. Jigit óz jurtyn jaqsy bilýi kerek,-dedi kenet ákesi shejire aıtyp otyrǵandaı mańǵazdanyp.

— Men ákesiz óskenmin, — dedim amalym quryp. Sulýshash maǵan jalt buryldy. «Nege aıtpadyń?» degen kinámshil kózqarasyn oqyp úlgerdim. Aıtýǵa murshamdy keltirdi me jumys qamy?

— Sonda qalaı? Ákeń jaıly eshteńe bilmeısiń be?

— Sabyr, jigitti uıalta bermeseńshi. Úıimizge alǵash kelýi ǵoı,-dep Sulýshashtyń anasy Bıbigúl otaǵasyn aqylǵa shaqyryp edi. Onysynan túk shyqpady.

— Men qyzymdy jeti atasyn bilmeıtin jetesizge bermeımin. Teksiz bireýdiń urpaǵyn jalǵastyrýyna kónbeımin!

— Áke! — dep shyr etti Sulýshash...

Bult arasynan shyǵa almaı tyrmysqan aı da qarańǵy. Jaryǵy bolsa da, myna kósheler de qarańǵy. Keýdemde júregim soǵyp tursa da, myna álem men úshin qarańǵy. Kóńilimdegi kóktemdi álgi sózder tonap áketken, ol da qarańǵy. Alystan jalǵan jyltyraǵan juldyzdar da qarańǵy. Ómir-qapas, men-tutqynmyn. Adamdardyń bári ómir-abaqtynyń tutqyny. Tek ótirik kúlip, ózderiniń jasandy shattyqtaryna «baqyt» dep at qoıǵan. Biraq menen ótken ǵarip bar ma? Qazaq úshin eń aýyr sóz-teksiz. Ony estigenshe, tirideı jerge kirsemshi. Sulýshashtyń tikminez ákesine renjı de almadym. Oniki durys. Jeti atasyn teksermeı, qyz alysyp, qyz berispeıtin qazaq qoı ol. Myna dıýana halime kimdi kinálaımyn? Taptym! Ákem aıypty! Ol meni tastap ketpegende, men aıdyń-kúnniń amanynda teksiz atanbas edim.Seni dúnıeniń qaı qıyryna ketseń de, izdep tabamyn. Sosyn jazańdy beremin! Oǵan myna qarańǵylyq kýá!

— «Sum ómir abaqty ǵoı sanalyǵa», — dep yńyrsı óleńdetip úıime kirdim. Bul óleń joly qaıdan esime túskenin bilmeımin, mektepte ádebıetti súıip oqıtynmyn. Sol shaǵym eles berip jatyr ma? Álde janyma jaqyn bolǵan soń, jalǵyz jol óleńdi ánge aınaldyryp aldym ba? Ózim de bilmeımn. Analarym oıaý eken.

— Balam, altynym, saǵan ne boldy?

Ájem jylaýdyń az-aq aldynda tur.

— Ámirjan, sen ishpeıtin ediń ǵoı?

Apam meni tanı almady. Meniń aıaǵymdy bastyrmaı turǵan araq emes, sher ǵoı, apa, sher!

— Qudaǵıyńnyń qolynan shaı iship edim, býynyma túsip ketti,-dedim mysqyldap.

— Shaıyn berip, qyzyn bermeımin dep qýyp shyqty.

— Ne deısiń? Qyzyna sendeı jigittiń tóresin taba ala ma eken?

— «Teksiz» dedi! «Jetesizsiń, ákesiz ósken ulǵa qyz bermeımin» dedi!

Anam tilden qaldy. Júresinen otyra ketti. Ájem duǵalaryn aıtyp, Allasynan járdem tiledi. Biraq Alla qutqarýshy perishtelerin jibermedi.

Men taǵy da jaýapsyz suraqtardyń soqqysynda qaldym.

Adam úsh kúnnen soń tozaqqa da úırenedi desedi. Men de úırendim. Sulýshashsyz ómir keshýge, ákemniń kim ekenin bilmeı alas urýǵa, tipti anaý qubyjyq habarlamalarǵa da úırenip, moıynsunyp kettim. Habarlama jylt etti. Qarańǵylyqtan shyǵarar sáýle me, álde... Oqı bastadym. «Ákeńniń joqtyǵynan shańyraǵyń qurylmaı jatyp qulap tústi. Endi ne istemeksiń? Joq ákeńdi izdeısiń be?» «Joq ákeń» dep ne tantyp tur myna qubyjyq? Ákesiz sábı týylatyn ba edi? Álde ákem qaıtys bolǵan ba?Qubyjyqqa qansha qońyraý shalsam da, tutqany kótermeıtinin bilemin. Sondyqtan «myqty bolsań, qarsy aldyma kel» dep habarlama jazyp jiberdim. «Oǵan áli erte» degen jaýap keldi.

Kishkentaı kúnimde oınap júrip qulap qalsam, birden anama jylap baratynmyn. Ol meni ystyq qushaǵyna alyp, erkeletip, qalaı da jubatyp alatyn. Búgin dál sondaı kúıge tústim. Jigit bolsam da, kóz jasym kirpigimniń ushynda turdy. Úıge kire sala, anamdy qatty qysyp qushaqtadym. Ájemdi de qushaǵyma aldym. Kózimdi ashqaly kórip kele jatqan qos anam meniń aǵyl-tegil jasymdy kórip,jandary muryndarynyń ushyna keldi.

— Apa, áje! Qutqaryńdarshy meni myna azaptan! Bireý menimen qatygez oıyn oınap júr. Ákem týraly sandyraq habarlamalar jiberedi. Sulýshashty áke-sheshesi menimen aralastyrmaı qoıdy.. Qarańǵylyqtyń qapasynan qutqarshy! Sonaý baqytty kúnderime oralǵym keledi!

— Balam, sabyr etshi,-dedi anam oqystan salqyn únmen.

— Joq, sabama túse almaımyn. Kúnde júregimdi syzdatqansha, búgin bári aıaqtalsynshy. Men kimniń ulymyn?Rýym kim?Qazaqpyn ba ózi?-Ózim úshin sonsha qymbat qos qımasymdy aıamadym. Ózimshildigim jeńdi aqyry. Ájem aýzyn basyp, eńkildep jylap tur. Sheshem ákemniń ólgenin estirterdeı túnerip alǵan.

— Apa, shyndyqty aıt. Búgin jaýaptan qashpa!

— Daıynsyń ba jaýabyn estýge?

— Iá, ázirmin!

— Gúljaz, qoı, aıtpa!-Ájem eki qoly erbeńdep, ortamyzǵa tústi.

— Qashanǵy jasyram? Qansha ýaqyttan beri alqymymnan alyp boldy. Aıtyp qutylaıyn. Ar jaǵy bir Allaǵa aıan.

— Iá, aıtyp qutyl, apa!

— Men seni jasandy uryqtandyrý jolymen týyp alǵanmyn.

— Túk túsinbedim. Ákemniń tastap ketkeni qaıda?

— Joq, ol ótirikti seniń kóńiliń sýysyn dep, men oılap tapqanmyn. Biraq seniń tynyshtyq alar túriń joq. Aqyry bildiń.

— Neni bildim? Ákesiz qalaı týǵanmyn?

— Jasandy uryqtandyrý ortalyǵyna baryp, qyzmet aqylary úshin tólem jasadym da, uzyn boıly, qara kózdi, buıra shashty degen sıpattamaly uryqty tańdadym. Sóıtip seni ózim úshin týyp aldym.

— Ózim úshin degen ne kesel, apa?

— Kári qyz mylja-mylja kempir bolmaı ma? Kúıeýge shyqpaǵan soń, jalǵyz júre bermeıin dep, ózimniń bolashaǵymdy oılap, seni dúnıege ákeldim.

— Qandaı bolashaq? Kimniń keleshegi?-Janym alas uryp, tysqa umtyldym. Jolyma kedergi bolǵan anamdy ómirimde alǵash ret keýdesinen ıterip jiberdim.

İlbip kelem, ilbip kelem. Boıymda shala-jansar janym bar. Oıymdy zil qara tuman basqan. Janymdy tas túnek eńserip aldy. Túnergen mylqaý álemde ıneniń jasýyndaı da sáýle qalmady. Tuldyr keńistikte qur tyrbyńdap kelem.Aqylym adyra qalyp, qaıran júrek qana qaldy qaltyrap. Kimge ekeni belgisiz, muń shaqqym keldi. Osy oı súırelep, Abaı eskertkishine alyp bardy. Eskertkish túbine qulaı kettim: «Uly baba, «qazaqpyn» dep ómir keshken balańmyn! Endi búgin ózimdi kim dep atarymdy bilmeı áýremin. Aıtshy, danagóıim, adamdy adam qoldan jasap alsa, kimge kúná?Aqsha úshin albasty tuqymyn shynyǵa salyp ótkizgen shaıtantektiler aıypty ma? Álde sol shynydaǵy uryqty jatyrynda damytqan ózimshil áıelder jazyqty ma?Osy azǵyndyqqa aýyzdyq salmaı, esirtip otyrǵan kúlli qoǵam ba? Meniń daýsym jeter emes. Ún qatshy myna meńireý qoǵamǵa! Oıatshy aryn! Saqtashy baryn!» Dál osy sátte búkil janym naǵyz áke qushaǵyn ańsap turdy. Al Abaı eskertkishinen jaýap bolmady: «ustarasyz aýzyna murty túsken» qazaǵyn kórgen danyshpan da menimen birge jylap turǵandaı.

Tún eteginiń qalaı túrilgenin, tań shapaǵynyń qalaı shashylǵanyn men sezbedim. Qubyjyqtyń qońyraýynan es jıdym. Qyzdyń daýsy «Qaıdasyń?» dedi. Adam ólip bara jatsa da, ishin qyzyǵýshylyq tesedi eken. Óler halge jetsem de, ol dıýmen kezdespeı ketkim kelmedi. Myna sumdyqty qara! Bóksesin burańdatyp Áıgerim kele jatyr.

— Sálem, Ámir!

— Ne kerek saǵan?

— Sen kereksiń!

— Aram ekensiń! Bir keńsede júrip, istegen isińdi qara! Sonda ne taptyń?

— Sulýshash ekeýińdi ajyratqym keldi. Sen týraly aqparat izdep sharshamadym. Sum derek meni ózi izdep tapty. Meniń alys jamaǵaıyn bir tátem qyz kúninde seniń apańnyń qurbysy bolypty. Ekeýi anaý ortalyqqa birge barypty. «Sodan týyp alǵan uly ǵoı» dep tátem bárin bilip otyr eken. Sol shyndyqty óz paıdama asyrdym.

— Eshteńe de kádeńe jaramady. Men ákem jaıly bárin bildim.Odan saǵan kelip-keter ne bar?

— Kóp nárse ózgerdi. Seniń álpeshtep júrgen sulýyń tastap ketti. Qaırylyp kelmeıtini anyq.

— Sonda Sulýshash bolmasa, men saǵan ǵashyq bolam ba?

— Men tegińe qaramaımyn. Ári meniń mahabbatym ekeýmizge jetedi!

— Joq, men Sulýshashty súıemin!!!

Osy ómirdegi jalǵyz móldirim-mahabbatymdy bar daýsymmen aıǵaılaı aıttym.

— Men de seni súıemin!

Tý syrtymnan estilgen syńǵyr únge jalt buryldym. Botashym, súmbil shashym, keldiń be? Janarymyz túıise qaldy.

— Qaıǵy qurty mújip bitken janymdy,

Qaıdan bildiń zapyran shekken halimdi?

— Men bilmeıtin júregińde kúı bar ma?

Seni súıem, basqa jaıǵa ılanba!

— Surama meniń tegimdi,

Bilmeı-aq qoıshy elimdi!

— Qazaqy janyń, tiliń bar,

Kem tutam qalaı ózińdi?!

— Tegim-jyn, al anam-qazaq,

Sodan da ómir tolǵan azap!

— Jyn bol, meıli peri bol!

Júregimniń máńgi úni bol!

Ǵashyǵymnyń jasty janaryndaǵy osy oıdy oqyǵan men oǵan qaraı táltirekteı umtyldym...

---