InfoHub Logo

Tolǵaq — jatyr bulshyq etteriniń joǵarydan, ıaǵnı jatyr túbinen bastalyp, tómen qaraı birqalypty jıyrylýynyń nátıjesinde bolatyn qubylys. Al keıbir jaǵdaılarda belgili bir sebepterdiń saldarynan tolǵaq álsirep nemese tolǵaq bolǵanymen de onyń nátıjesiz kezderi bolady, bul qubylysty tolǵaqtyń buzylýy deımiz.

Basty sebepteri

— júıkeniń sharshaýy;

— juqpaly aýrýlar;

— jatyr kemistikteri;

— jatyrdyń qabynýy;

— jatyr isikteri;

— klınıkalyq tar jambas;

— sýdyń kóp nemese az bolýy nemese erte ketip qalýy;

— negizsiz, durys emdemeý saldary.

Tolǵaqtyń buzylýy túrine qaraı úshke bólinedi:

1.  Tolǵaqtyń álsiz bolýy;

2.  Tolǵaqtyń tym qatty bolýy;

3.  Dıskordınasıalyq tolǵaq.

Álsiz tolǵaqty bastalǵan ýaqytyna qaraı birinshi, ekinshi dep bóledi. Eger tolǵaq o bastan álsiz, sırek bolyp jatsa, ony tolǵaqtyń birinshi álsizdigi deımiz. Al tolǵaq oıdaǵydaı bola kele, belgili bir kezde álsizdense, ony ekinshi álsizdik dep ataımyz.

Álsiz tolǵaqty kúsheıtetin tásilderdiń biri oksıtoksın jáne prostaglındınderdi qoldaný bolyp tur. Bul dárilerdi tamyrǵa tamshylatyp, 3-4 saǵat boıy quıady.

Tolǵaq tym qatty bolǵan jaǵdaıda tolǵaqty belgili bir ýaqytqa toqtatyp nemese báseńdetetindeı jaǵdaı jasaý kerek.

Tolǵaq tym qatty bolǵanda jatyr moıny men bosaný joldary tez ashylyp, jaraqattaný kóp kezdesedi jáne týylýǵa beıimdelip úlgermegen náreste de zaqymdanýy múmkin.

Dıskordınasıalyq tolǵaqtyń sebebi jatyr bulshyq etteriniń retsiz jıyrylýy. Sonyń saldarynan jatyr moıny durys ashylmaıdy, nátıjesinde tolǵaq uzaqqa sozylyp ketýi múmkin. Sondyqtan múmkindiginshe tolǵaqty retteýge áreket jasaý kerek.

Tolǵaqty kúsheıtetin dári-dármek qoldanýǵa bolmaıdy! Bulshyq etti bosańsytatyn jáne sedatıvtik dári-dármekti qoldaný kerek. Joǵaryda keltirilgen tolǵaqtyń buzylýynyń barlyq túrin emdegende basqa da akýsherlik jaǵdaılardy, mysaly,

— balanyń jaǵdaıy;

— sý ketken ýaqyty;

— áıeldiń jaǵdaıy;

— balanyń qalpy, salmaǵy, jaıǵasýy jáne t.b.

eskere otyryp, durys sheshim qabyldaǵan jón. Qajet bolsa, áriptestermen aqyldasý kerek.

---