InfoHub Logo

Jıyrma bes ǵasyr buryn saqtardyń padıshasy ójet ári sulý Zarına ómir súrgen. Bir kúni ol týǵan jeriniń darqan dalasynda serýen quryp, sergip qaıtý úshin saıatqa shyǵady.

Aq sáıgúlik oqtaı zýlap dóń basyna kelgende Zarına taýdyń eteginde sapqa tizilip turǵan jaý áskerin kóredi. Olar da kenetten shyǵa kelgen salt attyny baıqap, qýa jóneledi. Zarına qorshaýǵa almaq bolǵan jaý áskerinen sytylyp shyǵyp, attyń basyn erkine jiberedi. Qýǵynshylar artta qalyp qoıady. Biraq olardyń kósemi Strıangeı naızaǵaı sekildi qara tulparymen qýyp jetip, salt attynyń basyn shappaq bolady. Osy sátte Zarınanyń kúmis dýlyǵasy ushyp ketip, tóbesine túıgen qolań shashy sýsyp baryp arqasyna tógiledi. Áıel ekenin kórgen qolbasshy qylyshyn jerge shanshıdy. Moıyldaı qara kózinen, has sulýlyǵynan esi shyqqan Strıangeı saq padıshasy arý Zarınaǵa ǵashyq bolady. Ózi ór tulǵaly, ójet minezdi ári qaıyrymdy hanzadany Zarına da unatyp qalady.

Saq sulýy men mıdıalyq hanzada saıat-serýende jıi júzdesip júredi. Ańǵa shyqqan olardyń bir-birine degen meıirim-yqylasy arta túsedi. Dushpandyqtyń ornyn dostyq basyp, eki el arasynda tatý kórshilik qarym-qatynas ornaıdy...

Osyndaı bir kezdesýde Strıangeı Zarınaǵa otaý kóterip, bir el bolaıyq degen kóńilin bildiredi. Bul usynysty qabyl alýǵa Zarınanyń óz basy ázir edi, biraq ol eliniń taǵdyryn oılaıdy. Bir jyl boıy oılanyp, myń tolǵanǵan Zarına Strıangeıge turmysqa shyqpaıtynyn aıtady. Ol úshin mahabbattan da kúshti nárse bar edi, ol — eliniń táýelsizdigi. Sol kezeńde Turan men Medıanyń arasynda qaqtyǵys bolmapty. Bul Zarınanyń jeke basyn baqytsyz etý arqyly eline ápergen beıbit ómiri bolatyn.

---