InfoHub Logo

Toq ishektiń shyryshty qabatyndaǵy qabyný-dıstrofıalyq úderisiniń nátıjesinde onyń qyzmeti buzylady. Aýrý dızenterıa saldarynan, vıtamın tapshy bolýynan, alkogól ishimdikterin jıi ishýden, ishek bakterıozynan, aýyr metaldarmen ýlanýdan, ártúrli dári-dármekterdi kóp qoldanýdan bolady.

Belgileri

Naýqastyń ishi aýyrady, ish ótý men ish qatý almasyp otyrady, ish jeldenedi. İshtiń tómengi jáne búıir belikterinde tolǵaq tárizdi aýyrý bilinedi. Ol kóbine tamaqtanyp bolǵannan keıin 2-3 saǵattan soń baıqalady. Organızmde aqýyzdar durys ydyramaǵandyqtan, ýlaný kúsheıip, bas aýyrady, álsizdik paıda bolady. Nájis shyryshty nemese qan aralas. Júregi aınyp, qusady, aýyz ishi kúıip aýyryp, tamaqqa tábeti nasharlaıdy. Ol ortalyq júıke júıesine de yqpalyn tıgizedi, sonyń saldarynan uıqy da buzylady.

Eger der kezinde dárigerge qaralmasa, ol toq ishektiń oıyq jaraly aýrýyna ulasady. İshti qol saýsaqtarymen tekserip kórgen kezde toq ishek tusy qatty aýyrady, baýyr men kókbaýyr kóleminiń ulǵaıǵany baıqalady. Aýrý ýshyǵa kele naýqas aryqtaı túsedi, qany azaıyp, qanazdyq paıda bolady, trofıkalyq ózgerister de bilinedi. Kótenshekte de, ásirese úlken dáretke otyrǵan kezde, aýyrsynýlar paıda bolady. Aýrýdy naqty anyqtaý úshin nájiske taldama jasalady, rentgendik jáne endoskopıalyq zertteýler jasalady, klınıkalyq kórinisterge de muqıat nazar aýdarylady. Koprologıalyq zertteý júrgizgen kezde qan men shyrysh tabylady. Rentgenologıalyq zertteý júrgizgende toq ishektiń spazmy, shyryshty qabyq bederiniń buzylǵany baıqalady. Rektoromanoskopıa arqyly teksergende oıyq jara men shyryshty qabyq gıperemıasy anyqtalady.

Emi

Aldymen, aýrýdyń sebebin anyqtap alý kerek. Emdi soǵan saı bastaıdy. Tamaqty kúni boıy birneshe bólip qabyldaý kerek bolady. Dıetalyq emge erekshe kóńil bólinedi. №4 dıeta taǵaıyndalady. Suıyq sorpa, untalǵan botqa, súzbe, kısel, tátti emes jemis-jıdek shyryndary — negizgi tamaq. Etti azaıtady. Eger ish qatatyn bolsa, maıdy shekteý kerek, Óıtkeni olar ishektiń jıyrylýyn tómendetedi jáne gazdyń túzilýin qamtamasyz etetin kómirsýlardy azaıtady. Laktaza fermentiniń tapshylyǵy baıqalǵandyqtan, sút pen sút ónimderin shektegen jón. Ol asqynsa, bir-eki kúndeı tamaqty azaıtyp, ash júrýge de bolady. Aýrýǵa jaqpaıtyn tamaqty tipti paıdalanbaý kerek.

Dári-dármekpen emdi ishektegi shartty-patogendi floranyń sezimtaldyǵyn anyqtaǵannan keıin taǵaıyndaıdy. Sozylmaly juqpalardan bolǵan bolsa, qabynýǵa qarsy qoldanylatyn sýlfanılamıdter men antıbıotıkter qoldanylady. İshektiń túıilýin, aýyrýyn ketirý úshin spazmolıtıkter, mysaly, atropın, papaverın, no-shpa, belladona t.b. taǵaıyndaıdy. Derttik kúshený paıda bolsa, oǵan túımedaq tundyrmasymen, kalıı permanganatynyń álsiz eritindisimen, antıpırınmen mıkroklızma jasaıdy. Maımen, mysaly shyrǵanaq, ıtmuryn, balyq maılarymen jasalǵan klızma jaqsy kómektesedi Qabynýǵa qarsy gıdrokortızonmen de klızma jasaýǵa bolady. Mindetti túrde ártúrli dáreýmender beriledi. Ásirese V toby dárýmenderi, RR, S, A dárýmender kóbirek qoldanylady.

Eger alergıalyq kolıt bolsa, antıgıstamınd preparattar (pıpolfeı, dımedrol), steroıdty gormondar (prednızolon, deksametazon, trıamsınolon taǵaıyndalady.

Toq ishek qyzmetine emdik shóp aralastyrylǵan bulaýdyń, balshyqpen aplıkasıa jasaýdyń, novokaınmen jasalatyn elektroforezdiń ındýktometrıalardyń paıdasy kóp. Shıpajaıǵa barar aldynda aýrýdy emdegen dárigerden aqyl-keńes alǵan durys.

Eger dári-dármekpen emdeý járdemdespese, hırýrgıalyq ota jasaýǵa týra keledi.

I. Kerimov

---