InfoHub Logo

H. Dosmuhamedov atyndaǵy Atyraý memlekettik ýnıversıteti
Jýrnalısıka mamandyǵynyń 3 kýrs stýdenti
Meńdiǵalıeva Qundyz

Týǵan jer — adam ómirinde kıeli oryn alady. Naqty osy jer ony elimen, ótkeni jáne bolashaǵymen  baılanystyrary aqıqat. Balalyq shaqtan bastap adamda Otanǵa degen mahabbat sezimi oıanady. Árbirimiz úshin Otan oshaq basynan bastalady. Meniń týǵan jerim Esbol aýyly. Dál osy jerde kóńildi de shattyqty, ýaıymsyz, qaıǵysyz balalyq shaǵym ótti. Aýylym Qasıetti Jaıyq ózeniniń jaǵasynda ornalasqan. Mahambet aýdanynan jeti shaqyrym jerde ornalasqan aýyldy Jaıyq ózeni bólip jatyr. Sonymen qatar aýylǵa Atyraý-Inder tasjoly arqyly da qatynaýǵa bolady. Jaıyq ózeniniń jaǵasynda Qyz Jibek balǵyn shaǵyn ótkizgen. Osy ózendi ótip Tólegen Qyz Jibegine kelgen. Ózen sýyna Mahambet pen Istaı áskeri attaryn sýarǵan. Jaıyq úshin alysyp, jan berisken. Aıta keteıik, senesiz be Jaıyq sýynan Aleksandr Makedonskıı de aýqat alǵan. Ózennen ózimen-ózi shyǵyp jatqan qara maıdy kórip Arıstotel tań qalǵan. Osydan keıin Jaıyqtyń qudiretine senbeske bolmaıdy. Qazynaly da baı tarıhymyzdy aıtý, ony jetkizý keleshek urpaq úshin kerek. Shyǵystyń ǵulamasy Ábý Nasyr Ál-Farabı babamyz «Tarıhty bilmeı, ótkendi qazirgi jaǵdaıdy, bolashaqty boljaý qıyn» dese, Elbasy N.Á. Nazarbaev  «Bul — táýelsiz Qazaqstannyń azamaty ǵasyrlar toǵysynda óziniń arǵy-bergi tarıhı jolyn oı eliginen ótkizip, «Keshe kim edik? Búgin kimbiz? Erteń  kim bolamyz?» degen tóńirekte oılansyn deıdi. Bul — árbir azamat týǵan eliniń, týǵan halqynyń tarıhy eshkimnen de olqy emestigin túsinsin degen sóz. Bul — árbir azamat tarıh qoınaýyna  oısha tereńdeý arqyly óziniń ata — babalary qaldyrǵan  osyndaı keń baıtaq jerdiń laıyqty murageri bolýǵa umtylsyn» —  degendi de aıtqan edi.

Aýyl kezinde mal sharýashylyǵy sovhozy retinde qurylǵan. Sovhoz qosylǵan kezde 15 aýyl (qazirgi Eńbekshil), 13 aýyl (qazirgi Ortaqshyl), 8 aýyl (qazirgi Aqjaıyq) aýyldary birikken. Túıe, sıyr sharýashylyqtary jumys istegen. Sovhoz quramyndaǵy aýyldar qazirgi tańda bólek aýyldyq eldi-meken retinde qurylǵan. Aýyldyń búgingi turmysyn ótkenmen salystyrýǵa kelmeıdi, árıne. Búgingi tirshiligine aýyl turǵyndary shúkirshilikpen qaraıdy. Aýylda mektep, balabaqsha, klýb, dárigerlik bólimshe jumys isteıdi. Bilimmen sýsyndatatyn jańa tıptegi mektep 2001 jyly salynǵan. Búginde mektepte 33 muǵalim, 131 oqýshy bar. Ustazdar jańartylǵan bilim berý boıynsha túrli kýrstarǵa turaqty qatysyp, biliktilikterin únemi arttyryp otyrady. «Aıgúl» bóbekjaı balabaqshasynda alańsyz búldirshinder tárbıelenýde. Balabaqsha irgetasy 1957 jyly qalanǵan. Qazirgi tańda eki topta 30 bala bar. 6 pedagog maman eńbek etedi. Bóbekjaı eki bólmeli bolsa da balalarǵa barlyq jaǵdaı jasalǵan. Aýylda halyqqa turaqty qyzmet kórsetetin Esbol aýyldyq klýby jumys isteıdi. 100 oryndyqty ǵımarattyń irgetasy 1967 jyly qalanǵan. 2016 jyly kúrdeli jóndeýden ótti. «Aq bosaǵa» sonymen birge bı, drama, vokal úıirmeleri bar. Ár mereke saıyn halyqqa qyzyqty da kóńildi keshter uıymdastyrady. Dárigerlik bólimshe aýyl turǵyndaryna udaıy túrde qyzmet kórsetedi. Aýyldyń búgingi tynys-tirshiligi osyndaı.

Aýyl — qazaqtyń altyn besigi, túp tórkini. Mádenıet pen dinniń máıegi. Aýyl ananyń aıaly alaqanynan talaı uly ǵalymdar, aqyndar men jazýshylar, kóptegen qoǵam qaıratkerleri túlep ushqan joq pa?!

Qazir boıjettim, biraq ta ómir boıy men úshin balalyq shaqtaǵy týǵan aýla men kóshe — meniń kishkentaı Otanym. Men elimniń bir bólshegimin, onyń búgini men bolashaǵymyn.

 

---