InfoHub Logo

Tumanbaı Moldaǵalıev (20.03.1935 jyly týǵan, Almaty oblysy, Eńbekshiqazaq aýdany, "Jarsý" sovhozy) — qazaq aqyny. Qazaqtyń Memlekettik ýnıversıtetiniń fılologıa fakúltetin bitirdi (1956). "Pıoner" jýrnalynda (1959-70) jumys istedi. "Baldyrǵan" jýrnalynyń jaýapty hatshysy (1970-1973) boldy. 1973 jyldan "Jazýshy" baspasy janyndaǵy Balalar jáne jastar ádebıetiniń bas redaksıasy men "Jalyn" almanaǵynyń bas redaktory T. Moldaǵalıevtiń tuńǵysh óleńi "Ýkraına qyzyna" 1954 jyly jarıalandy. Alǵashqy óleńder jınaǵy "Stýdent dápteri" 1957 jyly jaryq kórdi. T. Moldaǵalıev názik syrly, oıly da otty jyrlarmen tanyldy. "Kámıla" (1960). "Kóktem tańy" (1961), "Alataý qyzy" (1963), "Ferúza týraly jyr" (1964), "Zýlaıdy kúnder" (1965), "Júregim meniń saparda" (1966) t. b. jınaqtary shyqty. 1967 jyly jaryq kórgen "Jańa dápter" atty kitaby úshin Qazaqstan komsomoly syılyǵynyń laýreaty atandy (1968). "Eskertkish" (1969), "Shaqyrady jaz meni" (1970), "Júrek oıaý qashanda" (1972) atty kitaptary da oqýshylardyń iltıpatyna bólendi. Onyń "Qosh, kóktem" atty tańdamaly óleńder kitaby (1971), "Hattar" atty poemalar jınaǵy (1974) jaryq kórdi. T. Moldaǵalıevtiń orys tilinde "Ia — syn Semırechá" (1962), "Pervaıa vstrecha" (1968), "Novaıa tetrad" (1969) atty óleńder jınaqtary shyqty. T. Moldaǵalıev kóptegen án mátinderin jazdy. Onyń "Qustar qaıtyp barady" (mýzykasy N.Tilendıevtiki), "Baqyt qushaǵynda", "Ánim sen ediń" (mýzykasy Sh. Qaldaıakovtiki), "Ertis válsi" (mýzykasy Jamaqaevtiki), "Shaqyrady kóktem" (mýz. Á.Beıseýovtiki) atty ánge jazylǵan óleńderi halyq arasyna keń taraǵan. Ol D.G. Baıron, M.Iý. Lermontov, T.G.Shevchenko, Týmanán, S. Kanýtıkán, Ǵ. Ǵulam, H. Ǵulam, R. Ǵamzatov, Uıǵyn, Zýlfıa, D. Jalsaraev jáne t.b. aqyndardyń shyǵarmalaryn qazaq tiline aýdardy.

---