InfoHub Logo

20-30 maýsym aralyǵynda mektep túlekteri Ulttyq biryńǵaı testileýden ótedi. Jyl basynan beri testileýdi aqyly negizde tapsyrý múmkindikteri berilip kelgenimen, osy joly memlekettik grantqa talasy bar túlekterdiń synalar sáti kele jatyr.

Jalpy, Ulttyq biryńǵaı testileý formaty ózgergen joq. Iaǵnı, tapsyratyn pánder, suraqtar, upaı sany, ýaqyty burynǵy formatta. 20-30 maýsym aralyǵynda UBT elimizdegi 1188 aýdıtorıada ótedi. Oǵan  qatysý úshin 117 242 adam ótinish bergen. Sonyń ishinde 96 myńnan astamy - osy jylǵy mektep túlekteri (mektep bitirýshilerdiń 72 paıyzy) bolsa, 20 myńnan astamy - bıyl jáne ótken jyldary kolej ben sheteldik bilim berý uıymdaryn bitirýshiler.

Bıyldan bastap UBT-nyń tórt ret - qańtar, naýryz, maýsym jáne tamyz aılarynda ótkiziletini buǵan deıin habarlanǵan bolatyn. Qańtardaǵy testileýge - 35 myńǵa jýyq, al naýryzda - 80 myńdaı oqýshy qatysyp úlgergen. Osy eki UBT-da jalpy mektep bitirýshilerdiń 78 paıyzy qamtyldy. Onyń 70 paıyzy qazirdiń ózinde aqyly negizde oqýǵa túse alady. Endi osy oqýshylardyń grantqa túsem degenderi maýsym aıynda testileýge qatysyp, óz bilimin synaýǵa múmkindigi bar.

UBT tapsyrý pýnktilerinde ınternet bolmaıdy

Bilim jáne ǵylym mınıstrliginen habarlanǵandaı, respýblıkalyq deńgeıde jáne árbir UBT ótkizý pýnktinde apelásıalyq komısıa jumys isteıdi. Barlyq aýdıtorıalar 100 paıyz (1188) uıaly telefon sıgnaldaryn óshiretin quraldarmen jáne baqylaý beınekameralarymen jabdyqtalǵan. Sondaı-aq jedel aqparat almasý úshin mınıstrliktiń jáne Ulttyq testileý ortalyǵynyń call-ortalyqtary turaqty túrde jumys isteıdi.

Vedomstvoda habarlanǵandaı, tyıym salynǵan quraldar men zańbuzýshylyqtar anyqtalǵan jaǵdaıda testileý nátıjesi joıylady.

UBT kezinde múmkindigi shekteýli túlekterge qandaı jaǵdaı jasalady?

BǴM habarlaǵandaı, erekshe bilim berý qajettiligi bar oqýǵa túsýshilerge jeke aýdıtorıa, sondaı-aq UBT sheńberinde tapsyrylatyn pánderdiń muǵalimi emes kómekshi, ymdaý tilin biletin maman beriledi. Bul úshin testileýge qatysatyn túlek densaýlyǵy týraly anyqtamany usynyp, ótinish berýi qajet.

Shekti bal boıynsha ózgerister bar ma?

BǴM-nan habarlanǵandaı, jalpy shekti bal ózgergen joq. Tek «Pedagogıkalyq ǵylymdar» salasy boıynsha shekti bal barlyq joǵary oqý oryndary úshin 50 baldan 60 balǵa kóterildi. Bul - bolashaq pedagogtardy sapaly irikteý baǵytynda jasalyp otyrǵan shara ekenin atap ótý kerek.

Al endi shekti balǵa naqtyraq toqtalatyn bolsaq, ulttyq joǵary oqý oryndary úshin UBT nátıjesi boıynsha - keminde 65 bal, «Pedagogıkalyq ǵylymdar», «Aýyl sharýashylyǵy jáne bıoresýrstar», «Veterınarıa» bilim salalary boıynsha - keminde 60 bal, basqa JOO-ǵa - keminde 50 bal, «Densaýlyq saqtaý jáne áleýmettik qamtamasyz etý (medısına)» salasy boıynsha - keminde 65 bal, onyń ishinde Qazaqstan tarıhy, matematıkalyq saýattylyq, oqý saýattylyǵy - oqý tili boıynsha keminde 5 bal jáne ár beıindik pánnen keminde 5 bal alýy qajet.

Al, qysqartylǵan oqý merzimimen oqýǵa túsýshi kolej túlekteri bilim grantynyń konkýrsyna qatysý úshin UBT nátıjesi boıynsha keminde 25 bal, onyń ishinde jalpy beıindik pán boıynsha - keminde 5 bal jáne beıindik pán boıynsha keminde 5 bal alýy tıis.

Testileýdiń nátıjesin qaıdan kórýge bolady?

Test tapsyrmalarynyń bazasy jyl saıyn 30 paıyzǵa jańartylady. Mektep túlekteri men ata-analar mınıstrlikten «suraqtardyń ishinde Gennadıı Golovkın men Dımash Qudaıbergen týraly saýaldar bola ma?» dep suraǵan kórinedi. Alaıda Ulttyq biryńǵaı testileý ortalyǵy suraqtardyń qazirgi qazaqstandyq tanymal tulǵalarǵa qatysy joqtyǵyn alǵa tartyp otyr.

Testileý nátıjesi UBT tapsyrý pýnktilerinde sol kúni jarıalanady. Sonymen qatar, mınıstrliktiń Ulttyq testileý ortalyǵynyń saıtynda da JSN nómirin terý arqyly nemese @edugovkz_bot telegram boty arqyly testileý nátıjesin kórýge bolady.

QazAqparat

Oqýǵa keńes beremiz:

Emtıhanǵa daıyndyq: qalaısha kóp nárseni op-ońaı este saqtaýǵa bolady

Emtıhanǵa ázirlenýge 5 keńes

Emtıhanǵa daıyndyq: ata-analarǵa keńester

---