InfoHub Logo

Bıylǵy oqý jylyna 88 myń grant bólindi. Bul týraly QR Ǵylym jáne joǵary bilim vıse-mınıstri Qýanysh Erǵalıev málim etti.

Atap aıtqanda, bıyl 18 mamyrda osy jyldaǵy negizgi UBT bastaldy jáne ol 5 shildege deıin jalǵasady.

«Jalpy, UBT-ǵa 166 myń talapker ótinish tapsyrdy. Bıyl Memleket basshysy Qasym-Jomart Kemeluly Toqaevtyń bergen tapsyrmasyn oryndaýdy jalǵastyramyz. Bul rette granttyń 60 paıyzy ınjenerlik-tehnıkalyq mamandyqtardy qamtıdy. Sondaı-aq, tyǵyz ornalasqan, jańa qurylǵan jáne batys aımaqtaryndaǵy jastar úshin de arnaıy grant bólingen. 2023 jyly óńirlik JOO-larǵa bólinetin pedagogıkalyq kvota sany artyp, 6280 grant bólindi. Al «Serpin» baǵdarlamasy boıynsha 3653 grant bólindi», - dedi Q. Erǵalıev Ortalyq komýnıkasıalar qyzmetindegi baspasóz máslıhatynda.

Onyń aıtýynsha, «Serpin» baǵdarlamasy aıasynda jumys arqyly óteý merzimi bıyl qysqardy. Buryn 3 jyl bolsa, qazir 2 jyldy qurap otyr. Sondaı-aq, grantty jumys arqyly óteý oqyǵan aımaqta ǵana emes, baǵdarlama aıasynda qamtylǵan basqa aımaqtarǵa da barýǵa bolady.

«Bilim berý granttarynyń jalpy sany 88 myńdy qurady. Onyń ishinde bakalavrıatta oqý úshin 73 myń grant, magıstratýraǵa – 13 myń, doktorantýraǵa 1890 grant bólinip otyr. Bıyl grantqa qujattardy qabyldaý jáne onyń ıegerleriniń tizimin jarıalaý kúnderine qatysty ózgeris bolmaıdy. Iaǵnı, 13-20 shilde aralyǵynda grantqa qujattardy qabyldaýdy, al grant ıegerleriniń tizimin 10 tamyzǵa deıin jarıalaýdy josparlap otyrmyz. Joǵary oryndaryna qabyldaý 25 tamyzǵa deıin júzege asyrylady», - dedi vıse-mınıstr.

---