InfoHub Logo

«Úlgili tárjimá» qolǵa tıgennen keıin men endi bastaýysh mektep úshin hrestomatıa qurastyrýǵa kiristim. Munda men eń aldymen Ybyraı Altynsarınniń hrestomatıalaryn úlgi ettim. Óıtkeni Ybyraı ári sheber pedagog, ári jaqsy metodıst edi. Sondyqtan bastaýysh mektepte oqıtyn qazaq balalaryna arnalyp jazylǵaly otyrǵan hrestomatıa, sóz joq, Ybyraıdyń úlgisi boıynsha jazylýy kerek edi. Ybyraıdyń oqý quraldaryndaǵy negizgi saryn minez-qulyqty túzeýdiń, jaýyzdyqqa, ozbyrlyqqa qarsy kúrestiń, adaldyq, ádilettilik adamgershilik tárbıesin berýdiń saryny edi.

«Úlgili bala» hrestomatıasyna Krylovtyń ózim aýdarǵan mysaldardan kirgizdim, orys klasıkteriniń, balalarǵa arnap jazǵan qysqa áńgimelerin ózimshilep qazaq turmysyna laıyqtap jazdym, sol sıaqty qazaqtyń baı aýyz ádebıetin suryptap paıdalandym.

Osymen qatar, bul kitapqa tabıǵat týraly, onyń ár alýan qubylystary týraly, geografıa, ósimdik janýarlar týraly maǵlumattar beretiń balalardyń uǵymyna syıymdy jáne qyzyqty qysqa-qysqa áńgimeler, mysaldar kirgizdim. Árbir áńgimeniń sońyna suraqtar qoıdym.

Hrestomatıany qurastyrǵanymda, negizgi oılaǵan maqsatym, kózdegen nysanam — jas urpaqty óner-bilimge, ádilettilikke, adamgershilikke tárbıeleý edi. Mundaǵy árbir óleńshi, áńgimelerdiń mazmuny oqýshylardy óner-bilimge shaqyrý, shynshyl bolýǵa úndeý, jetim-jesirlerdi, nasharlardy boıaý, qaırymsyz baılardy áshkereleý, sol sıaqty áleýmettik teńdikti nasıhattaý edi. «Úlgili bala» hrestomatıasynyń ıdeıalyq negizgi oı túıini osy edi.

«Úlgili bala» sol kezde, tipti odan berigirekte de, kóptegen mektepterde oqý quraly bolyp paıdalanylyp júrdi. Hrestomatıany óz kezinde bastaýysh mekteptegi balalardy durys tárbıeleý jumysynda óz halinshe belgili dárejede edáýir qyzmet atqarǵan eńbektiń biri dep bilemin. Kitaptyń jazylý tarıhy, ony jazýǵa sebep bolǵan jaǵdaı osy joǵaryda aıtylǵandar edi.

---