InfoHub Logo

Qos palataly Parlamentimizdiń Elbasy bıik ataǵyn zańdastyrýǵa qulshynysyn qýana quptaǵandardyń biri edim. Demek, bul ataý halqymyzdyń erteden kókeıinde júrgendiginiń aıǵaǵy edi. Al osy halqyńyzdyń shyn kóńilinen shyqqan yqylasy men qurmetin qabyldaýdan bas tartqanyńyz, qurmetti Nursultan Ábishuly, Sizdiń qarapaıymdylyǵyńyzdyń jarqyn kórinisi bolsa kerek. Aýyl qazaǵynyń otbasynda tárbıelenip, salt-dástúrdi berik ustap ósken ul ǵana osylaı isteı alady. Biraq bizdiń uǵymymyzda Siz báribir Ult kóshbasshysy bolyp qalyptasyp úlgergen bolatynsyz. Endi halqymyzdyń ystyq yqylasyna saı, Konstıtýsıalyq zańdy gazetterden oqyp, qýana quptap otyrmyn.

Qazaq eliniń qazirgi bastan keship jatqan ómiri asa kúrdeli oqıǵalarǵa toly. Táýelsizdikke ıe bolǵan kezdiń alǵashqy jyldarynyń ishinde-aq tańqalarlyq tabystarǵa qol jetkizip álemdegi eń joǵary damyǵan órkenıetti elderdiń nazaryn ózine aýdara bilse, bul árıne, Nursultan Ábishuly, Sizdiń kóregen saıasatyńyzdyń jemisi. Qazaqstannyń kóp etnosty halqynyń zor senimine ıe bolyp dáıekti reformator, bolashaqty boljaǵysh bıik bedeldi saıasatker ekenińizdi kórsete bildińiz.

Men sonaý 1991 jylǵy Prezıdent saılaýynan keıin, qurmetti Nur-Aǵa, Siz ant qabyldaǵan Joǵarǵy Keńestiń saltanatty sesıasyna Mańǵystaý halqynyń ókiliniń biri retinde qatysqanymdy maqtan etemin. Ol meniń ómirimdegi eń umytylmaıtyn tarıhı sátterdiń biregeıi bolyp esepteledi.

Táýelsiz Qazaq Eliniń Tuńǵysh Prezıdentin taqqa otyrǵyzý rásimi maǵan sarqylmaıtyn shabyt berdi. Eldi nyǵaıtýǵa qarlyǵashtyń qanatymen sý sepkendeı bolsa da jyrymmen óz úlesimdi qosýym kerek dep túsindim. Sondyqtan da «Qazaqstan – 2030» strategıalyq baǵdarlamasyn halyqqa keńinen túsindiretin jalyndy pýblısısıkalar men kórkemdigi joǵary «Barys minez halyqpyz», Kaspıı qaırańyn ıgerý ınvestısıasy týraly «Kaspııdiń túbi – altyn túp» toptama óleńderin jáne birneshe nasıhattyq maqalalar jazdym. «Qarashúńgil – qara kózim tuńǵıyq» atty Qazaqstan munaıynyń 100 jyldyǵyna arnalǵan kitabyma «Ata-qazaq» atty bólim engizdim.

Ózińiz qaıta qurǵan Mańǵystaý oblysyna táýelsiz elimizdiń Tuńǵysh Prezıdenti retinde 1994 jyldyń jazynda kelgenińizde bizdiń qýanyshymyzda shek joq bolatyn. Sol kezdegi qushaq jaıyp qarsy alǵan mańǵystaýlyqtar yqylasyn aına-qatesiz berýge umtylǵan eki óleńimniń birin – «Ata qazaq», ekinshisin «Aqboz at mingen Elbasy» dep ataǵan edim. Tamshaly atty Mańǵystaý tabıǵatynyń kórikti jerinde aqboz atqa mingen boıda darhan dala tósinde quıǵytyp shaba jónelgenińiz áli kóz aldymyzda. Al sol táýelsizdigimizdiń alǵashqy jyldarynda jazylǵan «Ata-qazaq» óleńindegi oı tujyrymdarymnyń qazir dál kelgenine ári tańdanamyn, ári qýanamyn... Sol óleńim mynaý edi...

Bir shyńyraý jáne onda jalǵyz qaýǵa,
Qutym bolǵan tússe de sansyz daýǵa.
Árqashanda qamqor bop qol sozasyz,
360 áýlıeli Mańǵystaýǵa.
Elińiz bar ıesin kópten kútken,
Toza jazdap tozbaǵan óktemdikten.
Sizge usynar kıesi darysyn dep
Áýlıeler boıyna jerden bitken.
Qaıda da qoshemet mol súıikti Ulǵa,
Álemdi Kósemdikpen uıyttyń da.
Tanyttyńyz Qazaq atty halyq baryn,
Ǵasyrda dara týǵan bıik Tulǵa.
Qoǵamdaǵy taldaısyz ár izdi Siz,
El aldynda uǵynyp paryzdy Siz.
Qazaq ultyn topannan saqtap qalý,
Jolyn biler Nuh paıǵambar tárizdisiz.
Qara túnder kelmeske ketti deımiz,
Baqyt qusy bizge de jetti deımiz.
Elbasynyń ıgi iste qadamyna,
Beket-Ata jar bolsyn dep tileımiz.
Az kórgen joq ómirden atam azap,
Bastalady endi ómir óte ǵajap.
Jasaı bersin Nursultan Nazarbaev,
Urpaq berer esimi – Ata-Qazaq!!!

(«Egemen Qazaqstan», № 245-247, 23.06.2010 j.)

---