InfoHub Logo

Zeınur sabaq  daıyndaýǵa otyrdy. Búgingi tapsyrma óleń jattaý edi. «Jazǵyturym qalmaıdy qystyń syzy..» — dep shapshańdata oqı bastady. Áp-sátte bir shýmaǵyn jattap ta úlgerdi. Óleńdi jattap almaı eshteńege burylmaýǵa sert qyldy. Sóıtip otyrǵanda dosy Marat kele qalmasy bar ma?!.

— Júr, Zeınur, qyzyq kıno kelipti. Balalardyń bári sonda ketti.

— Joq, Marat, men barmaımyn, óleń jattaýym kerek.

— Kelgen soń-aq jattap alarsyń, kettik, — dep qınap edi, kónbegen soń Marat júgire jóneldi.

— Jazǵytury qalmaıdy qystyń syzy… Qoıshy, Marat aıtqandaı  kelgen soń da jattap alýǵa bolady. Qyzyqtan qur qalatyn boldym.

— Áı, Marat, toqta-a! — dep terezeden moınyn sozyp aıqaılap jiberdi. Biraq ony estir Marat joq, alystap ketti.

Kınodan kelgen soń Zeınur óleńdi qaıtadan jattaı bastady. Sóıtkenshe bolǵan joq, dostary syrǵanaqqa jınalyp qaldy. Taý bop úıilgen kúrtik qardan  tómen quldılap, balalar ekeý-ekeýlep shanamen syrǵanaq oınaı bastady. «Joq, eshqaıda shyqpaımyn, óleńdi qalaıda jattap alýym kerek», — dedi Zeınur ishteı kúbirlep. Áıtse de uzaq otyra almady. Syrttaǵy balalardyń shýyly alańdata berdi.

— Qoıshy, ertemen turyp jattap alamyn ǵoı, — degen oı keldi. Sol-aq eken, kıimin shala-pula kıip, dalaǵa júgirip shyqty.

Keshki tamaqtan soń qalǵı bastady. Óleń jattaýǵa shama joq. «Erte turyp pysyqtarmyn, endi kóp qalǵan joq qoı», — dedi de Zeınur qalyń uıqyǵa ketti. Erteńinde kesh oıanyp, mektepke qaraı júgirip bara jatty.

---