InfoHub Logo

2026 jyly Qazaqstannyń birqatar aımaqtarynda sý tasqyny qaýpi artýy múmkin. «Qazgıdromet» mamandary aldyn ala boljam jasap, elimizdiń qaı óńirlerine qater tónip turǵanyn anyqtady.

Bıylǵy gıdrologıalyq boljam boıynsha, eń joǵary qaýipti aımaqtar qataryna Aqmola, Qaraǵandy, Soltústik Qazaqstan, Shyǵys Qazaqstan jáne Abaı oblystary kiredi. Qostanaı, Pavlodar, Almaty jáne Aqtóbe oblystarynda sý tasqynynyń ortasha deńgeıdegi qaýpi kútilýde.

Bul boljam kóp jyldyq gıdrometeorologıalyq baqylaýlar negizinde jasalǵan. Ol úshin kúzgi topyraq ylǵaldylyǵy, tońdaný tereńdigi, qardyń qalyńdyǵy jáne kóktemgi qar erý kezindegi aýa raıy jaǵdaılary eskerildi. Mamandardyń aıtýynsha, qolaısyz aýa raıy jaǵdaıynda ózenderdegi sý deńgeıi kóterilip, erigen qar sýynan eldi mekender, aýyl sharýashylyǵy alqaptary men ınfraqurylym nysandary sý astynda qalýy yqtımal.

Bul týraly Infohub.kz aqparat agenttigi habarlaıdy.

Aqmola oblysy

Munda Esil, Qalqutan, Jabaı jáne Suly ózenderinde sý deńgeıiniń normadan asý qaýpi bar. Ásirese, Astrahan, Bulandy, Arshaly, Selınograd, Atbasar aýdandary men Qosshy qalasy osal bolyp sanalady.

Qaraǵandy oblysy

Bul óńirde Nura jáne Sherýbaı-Nura ózenderi baseınderine erekshe nazar aýdarylady. Buqar Jyraý, Nura jáne Aqtoǵaı aýdandarynda sý tasqynynyń joǵary qaýpi saqtalady.

Soltústik Qazaqstan oblysy

Sergeev sý qoımasynan tómengi aǵystaǵy aýmaqtarǵa baqylaý kúsheıtildi. G. Músirepov atyndaǵy, Shal aqyn, Esil, Qyzyljar aýdandary men Petropavlovsk qalasy joǵary qaýipti aımaqtarǵa jatqyzyldy.

Shyǵys Qazaqstan oblysy jáne Abaı oblysy

Kúzde topyraqtyń ylǵaldylyǵy joǵary bolýy, tońdanýdyń tereńdigi jáne qardyń mol jınalýy qaýipti arttyrady.

Shyǵys Qazaqstan oblysynda Altaı, Glýbokoe, Zaısan, Tarbaǵataı, Samar, Ulan jáne Úlken Naryn aýdandary, al Abaı oblysynda Aqsýat, Aıagóz, Besqaraǵaı, Borodýlıha, Jarma jáne Kókpekti aýdandary qaýipti aımaqqa endi.

Ortasha qaýipti aımaqtar

Qostanaı oblysy

Aımaqtyń kóp bóliginde kúzgi topyraq ylǵaldylyǵy normadan tómen. Tońdaný 140 santımetrge deıin jetedi, keıbir aýdandarda bul ótken jylǵy kórsetkishten asyp túsedi. Soltústik jáne ortalyq aýdandarda qardyń qalyńdyǵy normadan joǵary.

Tobyl ózeni baseıninde qar erigen kezde joǵarǵy Tobyl jáne Qaratomar sý qoımalaryna erigen sýdyń kelýi yqtımal. Jalpy, jergilikti sý basý qaýpimen ortasha qaýip deńgeıi boljanady.

Pavlodar oblysy

Topyraq ylǵaldylyǵy normadan joǵary. Tońdaný keı jerlerde 200 santımetrden asady. Qardyń qalyńdyǵy normadan 27-106 paıyzǵa artyq.

Sý tasqyny kezinde erigen sýdyń mol bolýy, Shúlbi jáne Sóleti sý qoımalarynyń jumys rejımi, sondaı-aq Ertis ózeninde muz keptelisteriniń paıda bolýy múmkin. Birqatar aýdan men Aqsý qalasy úshin ortasha qaýip boljanady.

Almaty oblysy

Kúzgi topyraq ylǵaldylyǵy negizinen normadan tómen. Ońtústik aýdandarda topyraq tolyq erigen, qalǵan aýmaqta tońdaný 1-76 santımetrdi quraıdy.

Naýryzda kúrt jylynyp, qatty jaýyn jaýsa, taý ózenderinde erigen jáne jańbyr sýynan bolatyn tasqyndar bolýy múmkin. Almaty qalasy men oǵan japsarlas aýdandar ortasha qaýip aımaǵyna jatqyzyldy.

Aqtóbe oblysy

Topyraq ylǵaldylyǵy normadan tómen, tońdaný 24-150 santımetrdi quraıdy. Qardyń jınalýy klımattyq mánderden tómen.

Qar erý kezinde betki aǵyn qalyptasyp, oıpań jerlerde jergilikti sý basýy múmkin. Kóptegen aýdan men Aqtóbe qalasy úshin ortasha qaýip deńgeıi boljanady.

Jaǵdaı naqtylanatyn bolady

«Qazgıdromet» naýryz-sáýir aılaryndaǵy temperatýra rejımi men jaýyn-shashyn mólsherine baılanysty sý tasqyny jaǵdaıynyń ózgeretinin atap ótti. Ózenderdegi muz erýi bastalǵannan keıin mamandar memlekettik organdar men halyqty habardar etý úshin apta saıyn qysqa merzimdi gıdrologıalyq boljamdardy jarıalaıtyn bolady.

Esterińizge sala keteıik, buǵan deıin Prezıdent Qasym-Jomart Toqaev sý tasqynyna qarsy is-sharalar josparynyń naqty bolýy kerektigin aıtqan bolatyn. Memleket basshysy úkimetke jáne ákimdikterge kóktem bastalǵansha barlyq sý tasqynyna qarsy sharalardy sapaly júzege asyrýdy tapsyrdy.