InfoHub Logo

Qazaqstan Respýblıkasynyń Parlament Májilisiniń Agrarlyq máseleler komıtetiniń tóraǵasy, «Aýyl» partıasynyń basshysy Serik Egizbaev Jibek Joly arnasyndaǵy «Ýáde» baǵdarlamasynda agroónerkásip salasyndaǵy jalǵan statısıka máselesin ashyq kóterdi. Onyń aıtýynsha, eldegi azyq-túlik óndirisine qatysty derekter shyndyqqa janaspaıdy, al mıllıondaǵan tonna ónimder – qaǵaz júzindegi ǵana sandar.

«Jalǵan statısıka, mıllıondaǵan prıpıskalar bar. Mıllıondaǵan tonna sút, kókónis, astyq – bári ótirik. Prezıdenttiń qabyldaýynda bul másele kóterildi, memleket basshysy buǵan tańǵaldy», – dedi Serik Egizbaev.

Jalǵan eseptiń zardaby qandaı?

Saladaǵy jalǵan statısıka naryqqa aıtarlyqtaı keri áserin tıgizip otyr. Eń ózekti mysal – kartop máselesi. Egizbaevtyń aıtýynsha, Úkimettiń otyrysynda keıbir óńirler qoımada bar kartop qoryn júz ese asyryp kórsetkeni anyqtalǵan.

«Mańǵystaý óńirinde bar-joǵy 20 tonna kartop bolsa, esepte 2000 tonna dep kórsetilgen. Mundaı jalǵan derekter baǵanyń qymbattaýyna jáne naryqtaǵy tapshylyqqa tikeleı áser etedi», – dedi ol.

Bul jaǵdaı tek kartoppen shektelmeıdi. Osyndaı «qaǵaz júzinde ǵana bar» ónimder sút, astyq jáne kókónis óndirisinde de tirkelip otyr.

Jalǵan derek bergender jaýapqa tartyla ma?

Baǵdarlama barysynda jýrnalıs Erbolat Muhamedjan jalǵan esep bergender jazalanýy kerek pe degen suraq qoıdy. Serik Egizbaev bul usynysty qoldaıtynyn aıtyp, statısıkamen aınalysatyn jaýapty tulǵalar zań aldynda jaýap berýi tıis ekenin málimdedi.

«Nege olar bulaı isteıdi? Sebebi statısıka úshin jaza joq. Eger naqty jaýapkershilik engizilse, bundaı jaǵdaılar azaıar edi», – dep pikir bildirdi komıtet tóraǵasy.

Agroónerkásip salasyndaǵy jalǵan statısıka tek sandardyń ǵana emes, jalpy aýyl sharýashylyǵy júıesiniń burmalanýyna ákelip soǵady. Bul máseleni sheshý úshin:

• Jalǵan esep bergenderge zańdy jaýapkershilik júkteý
• Ónim qoryn naqtylap, ashyq júıe qalyptastyrý
• Sıfrlyq tehnologıalardy engizý arqyly málimetterdi baqylaý kúsheıtý qajet

Qazaqstandyqtardyń azyq-túlik qaýipsizdigi men naryqtaǵy turaqtylyq úshin bul máselege bılik tez arada sheshim tabýy tıis.