InfoHub Logo

Úlken kıiz úıdiń esigine jaqyndaı berip, Altyn ájeı kilt toqtady. Ájesiniń eteginen ustap, birese sekirip, birese tompańdap júgirip kele jatqan Serik úıge burynyraq kirip ketken.  

— Tuńǵyshyń ba?

Ájeı esikke jaqyndaı tústi. Tanyp tur, daýys álginde kelgen qonaqtiki. Kelinine qarap edi, ol biraz únsiz tómen qarap qyzaraqtap otyrdy da, basynızedi. Ájeı selkete qaldy. Óz kózine ózi sener emes. Shynymen, Serikti ulym dedi me? Ájeıdiń bar ashýy basyna shapty. Yza býǵan ol endi burylyp júrem degende, tabaldyryq aldynda ony-muny shoqyp júrgen shubar balapan shoshyp ketip, tórge qaraı zytty. Shıqyldaǵan boıy dastarqan ústindegi shyny saýytqa salynǵan sarymaıdy bir basyp sekire qonaqtyń ıyǵyna qondy da, shıi qaıyrýly turǵan keregeniń kózinen ótip júre berdi. Sary maı men jolaqtanǵan aıaǵynyń izi sý jańa qara kostúmge úsh tarmaq bop tura qaldy. Ájesi qyzara alaqtaǵan kelinine de, shek-silesi qatqan Serikke de qaraǵan joq. Bar ashýyn sodan alardaı álgi balapandy úıdi aınala qýdy. Qolyna tússe uzyn shybyqpen dál dep bir urmaqshy edi, taýyǵy bar bolǵyr kórshi úıdiń qorasyna kirdi de, zym-zıa joǵaldy.

Ájeı qolyndaǵy shybyǵyn laqtyryp jiberdi. Sodan ashýy qonaq ketkenshe bir taraǵan joq. Kúndiz az-azdan sozyp qoıatyn urshyǵyn da qolyna almady. Ony qaıdan taýyp alǵany belgisiz, judyryqtaı shúıkesimen qosa bala mysyq tór aldynda domalatyp júr. Ájeı urshyqty julyp alyp, mysyqty jelkesinen ustap laqtyryp jiberdi. Serik anadaı jerge baryp top ete qalǵan mysyǵyn kóterip aldy da, aýzyn tompaıta ájesine qarady.

— Áı, nege qaraısyń? Bar ket ana Rahıma shesheńe. Meni kógertpeı-aq qoı.

Osy kezde Rahıma kirip keldi. Ony kórgen soń, ájeıdiń kúni boıy janyn jep otyrǵan ashýy tipti qozyp ketti. Sheke tamyrlary bileýlenip, demig esóıledi:

— Aıttym ǵoı, bar Rahımaǵa. Baýyryma salyp bosqa áýrelenippin men beıbaq. Oıboı, bilmeppiz shyn sheshesi osynda eken ǵoı.

— Apa-aı, endi. . . Qonaq surap qoımaǵan soń. . .

— Qoı, qoı ondaı syltaýyńdy. «Kempirdiń balasy» deseń tiliń jetpedi me?  «Túbi osy kempir ıelenip kete me?»  — dep qoryqqansyń ǵoı. Qaýiptenbeı-aq qoı, almaımyn, bildik seniń balań ekenin.

Altyn ájeı qara púlish jeńsiziniń shalǵaıyn tizesiniń ústine tartyp qoıdy da, bir qyryn otyryp aldy.

— Kóp bolsa ógeısiń degeniń de. . .

— Keshir, apataı, men. . . ánsheıin, baıqamaı. . . Serik — sizdiń balańyz.

Beli búgile,  ájimdi kózderin taramys alaqandarymen jaba qoıǵan ájeı di Rahıma qushaqtaı aldy. 

— Táıt, ári. Esińe jańa tústi me, aldama óıtip meni.

Ájeı Rahımany ishteı aıap otyrsa da, jekirip tastap, árirek jyljyp otyrdy. Rahıma qos janary jasqa tola, tańyrqaı qarap: «Apa!» dedi de, ar jaǵyn aıta almaı, jasqa býlyǵyp shyǵyp ketti. Ájeı burylyp Serikke qarap edi, ol ernin tistep jylap jiberýge shaq tur eken. 

— Serikjan!

Ájeı Serikke qolyn sozdy. Sol-aq eken, Serik jábirlegendeı óksı baqyryp qoıa berdi de, mysyǵyn qushaqtap júgire jóneldi. Ájeı qysylyp qaldy.

— Serik, Serik! — dep bir-eki daýystap edi, qaramady. Ornynan turyp baryp, esiktiń jaqtaýynan syǵalasa, Rahıma Serikti qolynan jetelep, shúpirlesip oınap jatqan bir top balaǵa bettep barady eken. Ájeıdiń kóńili alaı-dúleı. Ásirese dúnıedeginiń bárinen jaqsy kóretin kishkene Seriginiń myna qylyǵy, búgingi ýaqıǵa ájeıdi oılantyp tastady. «Oıpyrym-aı, bala sezimine qaıaý túsirip almasam jarar edi», — dedi ózinen-ózi qınala. Sodan keshki shaıǵa deıin ornynan qozǵalǵan joq. Tek dastarqan jaıylyp, aldyna shaı quıylǵan kese kelgen soń ǵana jaqyndap otyrdy. Kelininiń de óńi synyq.

—  Shaı ishińiz, — degeniniń ózi de salqyn estildi.

Ájeı úndegen joq. Kese, sháınektiń shyldyrynan basqa túk estilmeı-di. Kúnde shúıirkelesip otyratyn ene men kelin tym-tyrys, árqaısysy óz oıymen. Osy kezde, aıaǵynyń ushynan basyp Serik kelip kirdi. Túımedeı qara kózderin jypylyqtatyp Altyn ájeıge qaraı beredi. «Oı,  jaman neme» ájesiniń ishi-baýyry eljirep qoıa berdi.

— Kel, Serikjan! Kelesiń be? — ájeı Serikti ózine tartty.

— Álde ... Rahımaǵa barasyń ba? Bara ǵoı.

Serik kózderin jypylyqtatyp ekeýine kezek-kezek qarap az-kem turdy da, júgirip baryp Rahımanyń betinen sábı erinderimen shóp etkizip súıip aldy da, ájesiniń aldyna qulaı ketti.

---