InfoHub Logo

Akademıalyq adaldyq lıgasyna kiretin 16 qazaqstandyq JOO stýdentteri arasynda júrgizilgen saýalnama osy bilim mekemeleriniń qyzmetine qanaǵattaný deńgeıi 79,9% ekenin kórsetti. Bul týraly Akademıalyq adaldyq lıgasynyń jalpy jınalys-forýmynda málim boldy.

«Akademıalyq adaldyq lıgasy» JOO-lar qaýymdastyǵynyń baspasóz qyzmeti taratqan aqparatqa sáıkes, saýalnamaǵa 23 457 bilim alýshy – lıga músheleri qatysqan.

Saýalnama 10 negizgi sanat boıynsha júrgizildi: akademıalyq adaldyq; pánderdi oqytý jáne baǵalaý; baǵalaý jáne keri baılanys; tirkeý kezinde pánderdi tańdaý; jeke damý; akademıalyq qoldaý; aqparattyq resýrstar men qyzmetter, qatysý, materıaldyq-tehnıkalyq baza jáne kampýs, qashyqtyqtan oqytý.

Paıdalanylǵan esepteý ádistemesine sáıkes, lıgaǵa múshe joǵary oqý oryndary boıynsha qanaǵattanýdyń ortasha deńgeıi – 79,9%.

«Akademıalyq adaldyq lıgasy jalpy joǵary bilim berýdiń damýyna áser etetin akademıalyq, adaldyq pen ádilettilik araly retinde qabyldanady. Akademıalyq adaldyq lıgasynyń róli – bizdiń ómirimizdi jaqsy jaqqa ózgertetin oqý prosesi arqyly elimizdiń qurmetti, laıyqty azamatyn daıyndaý», - dedi Ǵylym jáne joǵary bilim vıse-mınıstri Qýanysh Erǵalıev.

Forým aıasynda joǵary oqý oryndarynyń ózin-ózi retteýi, sybaılas jemqorlyqqa qarsy is-qımyl, akademıalyq adaldyq mádenıetin damytý tetikteri jáne alqalylyq arqyly sapany qamtamasyz etý sıaqty ózekti máselelerine arnalǵan pikirtalas ótti.

---