InfoHub Logo

Aýdandyq tutynýshylar odaǵynyń qyzmetkeri Kerbıke jeńgeı kelsaptaı bilekterin eki jaqqa sozyp, uzaq esinedi. Telefonnyń qulaǵyn ǵyr-ǵyr etkizip burady da, trýbkany qulaǵyna tosty:

— Áı, sary qyz, bizdiń páterdi jalǵap jibershi!.. Altaıka, papań úıde me?.. telefonǵa shaqyrshy, qalqam... Alo, Máýtik, men úıge búgin keshigip baramyn. Oblystan revızor kelmekshi eken, soǵan ázirlený kerek... sen bylaı iste: balany al da, otyn jar. Sosyn qazanǵa ot jaq. Qazyǵa jas etti aralastyryp molyraq salǵaısyń. Shyrpy oshaqtyń basynda. Abaıla, tuzy ótkir bop ketpesin... Estip tursyń ba?.. Iá, durys, solaı iste!.. Alo, alo!.. Umytyp barady ekem... Sıyrdy qazyqqa baılap, taǵaraǵa kebek sala salshy, jep tursyn. Buzaýyna saq bol, emip qoımasyn. Syrǵashka qaıda?.. Oınap júr deısiń be?..Aınalaıyn, ákem-aý, saq bolshy, áıteýir. Máshıne-páshıne basyp ketpesin!.. Sosyn, Ermekjannyń jaıalyǵyn dalaǵa jaıa salshy, baı bolǵyr...

Kerbıke «ýf» dep aýyr dem alyp, trýbkany tuǵyryna sart etkizip tastaı saldy. Aq shaınekten pıalaǵa qoıý kúreń shaıdy quıdy da, soraptap ishe bastady. Shyp-shyp terlegen keń mańdaıyn jibek oramalmen jıi-jıi súrtip qoıady. Appaq buǵaǵy búlkildep, oqtyn-oqtyn yqylyq atady.

Kerbıke jeńgeı trýbkaǵa qaıta qol saldy.

— Alo!.. Raıfo, raıfo!.. Á-á, Shárıpash, haliń jaqsy ma?.. Kerbıke ǵoı... Iá, bizdiń álgi Máýtik jalaqysyn aldy ma?.. Durys, durys! Premıa bergen joqsyńdar ǵoı... Qansha qansha?.. Elý som deısiń be, eı!.. Túý, mo-lo-ded!.. Jaq-sy!.. Áı, álgi káýpek baspen kezdesip turasyń ba?.. E-e-e jón, jón. Bul pánı dúnıeden shalqyp bir ótseıshi, jazǵan-aý!..

Kerbıkeıiń buǵaǵy dirildep, kózi jaınap ketti. Jalma-jan úıine telefon soqty.

— Alo, Máýtik!.. Jalaqyńdy aldyń ba, janym? Óte jaqsy! Al, premıa she? Ta-ma-sh-a! Jaraısyń, shalym!.. Máýtıshka, aqshańdy ysyrap etpeı, meniń qyzyl sýmkama salyp qoı. Kókmoıyn deısiń be? Bir shólmek alýyńa bolady. Jo-j-o-joq, kóp kókime! Bir shólmek qana... Áı, Máýtikjan, qazanyń qaınady ma? Qaınasa, betinen kóbigin kilkip qana al da, sorpasyn shómishpen sapyryp-sapyryp jiber. Oshaqtyń shoǵyn aldyna ysyra salshy, qazan baıaý qaınasyn. Tuzy táýir me?.. Jaraısyń, shalym!.. Alo, Máýtıshka!.. Men barǵansha qamyr ılep, daıyndap qoı! Elgezer asqanada ilýli tur... Iá, solaı iste, durys!..

Stol ústindegi ashylyp-shashylǵan býma-býma qaǵazdardy jıystyryp jatyp, Kerbıke jeńgeı taǵy bir mekemege telefon soqty.

— Alo, raımag?.. Bu kim eken? Marzıfa ma?.. Haliń jaqsy ma, shyraǵym?.. Men saǵan mynany eskerteıin degen edim; búgin senderdiń dúkenderińe on eki dana jempir túsedi. Iá, ıá!.. Baǵasy otyz somnan... Taptyrmaıtyn dúnıe!.. Sonyń bireýin maǵan saqtap qoıshy, janym. Qudaqalasa, erteń baryp alarmyn... Kelistik qoı, qosh saý bol, tórem!.. «Jaman» inime sálem aıta sal...

Kerbıke jeńgeı raqattana taǵy bir esinedi. Qol saǵatyna qarap edi, besten asyp barady eken. Kenet telefon shyldyrlady. Ol qulaǵyn tosty.

— Alo!.. Iá, tyńdap turmyn... Qaı kolhozdan?.. Shyraǵym-aý, qyzmet ýaqyty bitti ǵoı. Azamattyq pravomyzdy paıdalana alamyz ba, joq pa?.. Eńbek tártibin otyrǵandaryń jón be osy?.. Erteń habarlas, qaraǵym... Qosh saý bol!..

Kabınet esigi jartylaı ashyldy. Bir jas qyzdyń qyltıǵan basy kórindi.

— Apaı, jalaqyńyzdy alyńyz.

— Qup bolady janym, qazir...

Kerbıke kerdeńdeı basyp kabınetten shyqty.

---