InfoHub Logo

Almaty men Astanada turǵyn úı baǵasynyń ósýi toqtap, tipti tómendeı bastady. Bul jaǵdaı ásirese ekinshi qol naryǵynda aıqyn baıqalady. Jańa salynǵan úılerdiń baǵasy turaqty qalpyn saqtap otyr.

Bul týraly Infohub.kz aqparat agenttigi habarlaıdy.

Almatydaǵy jaǵdaı

Mamyr aıynda Almatyda jańa páterlerdiń baǵasy orta eseppen 0,3%-ǵa ósip, sharshy metri 718 myń teńgege jetti. Jyl basynan beri bul kórsetkish 6,2%-ǵa artqan. Alaıda, ekinshi qol páterlerdiń baǵasy kerisinshe, 0,6%-ǵa tómendep, sharshy metri 742 myń teńge boldy. Jyl basynan bergi ósim nebári 0,5%-dy qurady. Turǵyn úı jaldaý aqysy 0,5%-ǵa kóterilip, 5,85 myń teńgege jetti.

Astanadaǵy ahýal

Elordadaǵy jaǵdaı Almatyǵa uqsas. Jańa úılerdiń baǵasy ózgerissiz qalyp, sharshy metri 734,5 myń teńgeden satylýda. Jyl basynan beri baǵa 5%-ǵa ósken. Al ekinshi qol naryǵynda baǵa 0,4%-ǵa tómendep, ortasha eseppen 725,7 myń teńgege tústi. Jyl basynan bergi ózgeris 0,7%-ǵa ǵana jetti. Astanada jaldaý aqysy 1,3%-ǵa ósip, 5,6 myń teńgege jetti.

Basqa qalalar

Jańa úıler baǵasy mamyr aıynda Qostanaıda (1,5%, 442,6 myń teńge), Pavlodarda (1,4%, 494 myń teńge), Qyzylordada (1,2%, 392 myń teńge) aıtarlyqtaı ósti. Ekinshi qol naryǵynda baǵa tek Taldyqorǵanda (2%, 425 myń teńge), Kókshetaýda (0,9%, 372,6 myń teńge), Oral men Óskemende (0,7%, 393 jáne 419 myń teńge) kóterildi. Qalǵan qalalarda baǵa tómendedi, ásirese Qaraǵandyda 2,2%-ǵa azaıdy.

Buǵan deıin «Kýrsıv» jyljymaıtyn múlik baǵasynyń resmı statısıkada kórsetilgennen góri baıaý ósetinin jazǵan bolatyn. Qazaqstan rıeltorlar qaýymdastyǵynyń ókili Nına Lýkánenko bir aı ishindegi qysqa merzimdi ózgeristerge ǵana qarap qorytyndy shyǵarýǵa bolmaıtynyn aıtty.