InfoHub Logo

Almatyda áleýmettik mańyzy bar azyq-túlik taýarlary baǵasyn turaqtandyrý jumystary jalǵasýda. Sońǵy ret áleýmettik nannyń baǵasy 2027 jylǵa deıin bekitildi. Bul týraly qala ákimdiginiń málimetine súıenip, Infohub.kz habarlaıdy.

«Almaty» ÁKK men «ALMATYNAN» nan-toqash kombınaty arasynda áleýmettik, suryptalǵan nan óndirý jáne satý týraly kelisimshart jasaldy. Kelisim boıynsha, bir bólke nannyń baǵasy 130 teńge bolady. Saýda ústemesi 15 paıyzdan aspaıdy. Bul sharalar 2027 jyldyń mamyr aıyna deıin qoldanysta bolady.

Áleýmettik nan qalaı satylady?

Kelisim sharttaryna sáıkes, kásiporyn birinshi sortty unnan 3 846 154 bólke bıdaı nanyn shyǵarady. Keıbir dúkender men saýda jelileri bul ónimdi qosymsha baǵasyz sata alady. Áleýmettik nan iri saýda oryndary men úı mańyndaǵy dúkenderge jetkiziledi.

Baǵasy turaqtandyrylǵan basqa da ónimder

Qalada áleýmettik mańyzy bar azyq-túlik taýarlary baǵasyn ustap turý baǵdarlamasy jalǵasyp jatyr. «Almaty» ÁKK bul úshin óńirlik turaqtandyrý qoryn, óndirýshilerge jeńildikpen qarjylandyrýdy jáne forvardtyq kelisimsharttardy paıdalanady.

Qus fabrıkasymen birinshi sanattaǵy 86,4 mıllıon jumyrtqany ár danasy 59 teńgeden aspaıtyn baǵamen jetkizý týrali kelisim jasaldy. Bul ónim qaladaǵy iri saýda jelilerinde qoljetimdi.

Sondaı-aq, taýyq eti óndirýshilerimen kelisimder bar. Bedre men aıaqtary bir kılogramy 1100 teńgeden, golen – 1650 teńgeden satylady. Bul taýarlarǵa baǵa shekteýleri úsh jylǵa deıin saqtalady.

Qant baǵasy qandaı?

«Almaty» ÁKK otandyq óndirýshilerden 4500 tonna qumsheker satyp aldy. Ónim iri saýda jelileri jáne basqa da dúkender arqyly satylady. Qanttyń satylym baǵasy 1 kılogramyna 405 teńge bolyp belgilendi. Saýda ústemesi 10 paıyzben shektelgen. Baǵany turaqtandyrý sharalary 2026 jyldyń qarasha aıyna deıin jalǵasady.

Esterińizge sala keteıik, 2024 jyldyń qyrkúıek aıynda Almatyda áleýmettik nan baǵasy 80 teńgeden 120 teńgege deıin qymbattaǵany habarlanǵan bolatyn.