InfoHub Logo

Qazaqstanda alǵashqy ret qazaq tilinde jazylǵan «Jasandy ıntellekt álippesi» atty kitap jaryq kórdi. Búgin Almatyda kitaptyń tusaýkeseri ótti. Shara barysynda «AI-hub» kompanıasy men ai-hub.kz saıtynyń tanystyrylymy jasaldy, dep habarlaıdy infohub.kz.

Sonymen qatar TurkAI – túrki memleketteriniń jasandy ıntellekt mamandarynyń qaýymdastyǵy qurylǵany resmı túrde jarıalandy.

Kitaptyń avtory jáne onyń maqsaty

Kitaptyń avtory – Meıirjan Áýelhanuly, jasandy ıntellekt jáne IT salasynyń sarapshysy, tanymal jýrnalıs. Ol bul eńbekti baǵdarlamalaýdy bilmeıtin, biraq jasandy ıntellekttiń múmkindikterin zerttep, ony kúndelikti ómirde qoldanǵysy keletin oqyrmandarǵa arnap jazǵan.

Kitap jasandy ıntellekt uǵymyn qarapaıym ári túsinikti tilde túsindirýge baǵyttalǵan. Avtordyń aıtýynsha, kitaptyń mazmuny jasandy ıntellekttiń etıkasy, zańnamalyq aspektileri, feık aqparattardy ajyratý ádisteri sıaqty mańyzdy taqyryptardy qamtıdy. Sondaı-aq, 27 salaǵa arnalǵan prompttar usynylǵan.

"Bul eńbek qazaqtildi oqyrmanǵa IT salasynyń kúrdeli tilinde emes, qarapaıym oqyrmanǵa túsinikti etip jazylǵan", – deıdi avtor.

Jıynǵa kimder qatysty?

Kitaptyń tusaýkeser rásimine Qazaqstannyń belgili tulǵalary, medıa, bilim jáne tehnologıa salasynyń mamandary qatysty. Olardyń qatarynda:

• Qaınar Oljaı – kitaptyń redaktory
• Mamaı Ahet – Almaty qalasy ákiminiń keńesshisi
• Nurjan Jalaýqyzy – medıamenedjer
• Serik Abas Shah – belgili jýrnalıs
• Ulyqbek Esdáýlet – aqyn

Qaınar Oljaı kitaptyń mańyzdylyǵyn erekshe atap ótti:

"Kitaptyń alǵashqy taraýyn oqyǵanda gramatıkalyq qatelik joq ekenin baıqadym. Biraq ekinshi taraýynda jasandy ıntellektke qatysty kúrdeli tapsyrmalar bar ekenin túsindim. Bul eńbek qazaq tilindegi jasandy ıntellektti damytýǵa úlken úles qosady", – dedi ol.

TurkAI qaýymdastyǵy quryldy

Shara aıasynda TurkAI qaýymdastyǵynyń qurylǵany týraly resmı habarlandy. Bul qaýymdastyq túrki memleketteri arasyndaǵy jasandy ıntellekt salasyndaǵy yntymaqtastyqty damytýǵa baǵyttalǵan. Qaýymdastyqtyń qurylýyna Túrkıa, Ázerbaıjan, Qyrǵyzstan jáne Ózbekstan mamandary qoldaý bildirdi.

"TurkAI túrki áleminde jasandy ıntellektti damytýǵa úlken serpin beredi", – dep atap ótti uıymdastyrýshylar.

Kitaptyń bolashaǵy jáne taralýy

«Jasandy ıntellekt álippesi» kitaby 1000 dana taralymmen Al-HuB Publishing baspasynda jaryq kórdi. Avtor jyl sońyna deıin 25-30 myń danaǵa deıin kóbeıtýdi josparlap otyr.

"Kitaptyń negizgi maqsaty – qazaq aýdıtorıasyn sıfrlyq álemge jaqyndatý. Bul eńbek IT salasyna alǵashqy qadam jasaǵysy keletinderge arnalǵan", – dedi AI-hub kompanıasynyń negizin qalaýshy Erjanar Ásheıhan.

Sondaı-aq, AI-hub aldaǵy ýaqytta IT, jasandy ıntellekt jáne kıberqaýipsizdik salasyndaǵy álemdik eńbekterdi qazaq tiline aýdarýdy josparlap otyr.

Ózbekstan men Qyrǵyzstanǵa aýdarylady

Bul kitap Ortalyq Azıa elderinde jasandy ıntellekt taqyrybynda shyqqan alǵashqy eńbek bolǵandyqtan, oǵan basqa memleketter de qyzyǵýshylyq tanytty.

Ózbekstan men Qyrǵyzstan kitapty óz tilderine aýdarý týraly usynys jasaǵan. Bul jasandy ıntellekt salasyndaǵy bilimdi túrki halyqtary arasynda keńinen taratýǵa múmkindik beredi.

«Jasandy ıntellekt álippesi» – qazaq tilindegi jasandy ıntellekt týraly alǵashqy kitap. Ol tek Qazaqstan úshin ǵana emes, búkil túrki álemi úshin mańyzdy jobaǵa aınaldy.