InfoHub Logo

Qazaqstandyqtardyń kópshiligine tanys “Almatynyń túnderi-aı“ áni daýdyń ortasynda qaldy. Ánniń shyqqanyna 12 jyl ótken soń, ánshi Álisher Qaıratovtyń jubaıy bul týyndynyń quqyǵy óziniń kúıeýine tıesili ekenin aıtyp, Qaırat Nurtastyń bul ánnen jyldar boıy jalǵyz paıda kórip kele jatqanyn málimdedi.

Bul týraly Infohub.kz aqparat agenttigi habarlaıdy.

Daýdyń basy qalaı bastaldy?

Álisher Qaıratovtyń jubaıy Sandına Threads jelisindegi paraqshasynda bul týraly jazba jarıalady. Ol 2013 jyly ánniń quqyǵyn kúıeýi satyp alǵanyn aıtady.

«Qaırat Nurtas oryndaıtyn “Almatynyń túnderi-aı“ ániniń avtory meniń kúıeýim Álisher Qaıratov ekenin bildińizder me? Olar buryn birge oryndaǵan. Quqyǵy boıynsha, Qaırat bul ándi basqa ánshilermen birge oryndamaýy kerek – tek ózi nemese avtormen birge oryndaýy tıis. Men bul týraly 12 jyldan keıin jazýdy jón kórdim», - dep jazdy Sandına.

Sandınanyń aıtýynsha, ánniń quqyǵy 13 jyl buryn Álisherge berilgen. Olardyń qolyndaǵy qujattarǵa sáıkes, án 2013 jyly 18 qańtarda jasalyp, quqyǵy tolyqtaı berilgen. Bul kelisimder buǵan deıin jeke jáne jumys babyndaǵy sebepterge baılanysty jarıa etilmegen.

Ánniń shyǵý tarıhy

Sandınanyń sózinshe, Álisher men Qaırat Nurtas mektep kezinen tanys. Bir toıda kezdeskende, olar birneshe ándi birlesip jazýǵa kelisken. Álisherge sol kezde 16 jasta bolǵan, UBT-ǵa daıyndalyp júrgen. Álisherdiń ájesiniń mereıtoıyna Qaırat Nurtas shaqyrylǵan. Sol jerde Qaırat án shyrqapty. Keıin ekeýi án jazýǵa kelisip, kompozıtor Samat Ryspanbetten mýzykasyn satyp alǵan. Keıin ániniń mátini úshin Qurmanǵazy Bahtıarqyzyna Shymkentke baryp, aqsha tólegen.

Álisherdiń tarapy án men onyń nasıhattalýyna baılanysty barlyq shyǵyndy óz moınyna alǵan. Olardyń aıtýynsha, bul án úshin 4-5 myń dollar kóleminde gonorar tólengen. Ánniń mátini men mýzykalyq materıalyna, sondaı-aq sıfrlyq platformalardaǵy nasıhatyna da Álisherdiń otbasy qarjy bólgen.

Keıin “Almatynyń túnderi-aı“ áni jazylyp, odan keıin “Qaıda-qaıda“ jáne “Qalaı jetem“ atty eki birlesken týyndy jaryq kórgen.

Quqyqtyq talaptar

Sandınanyń aıtýynsha, otbasyna ándi jarnamada jáne strımıng platformalarynda paıdalanǵany úshin eshqandaı tólem jasalmaǵan. Olardyń sózinshe, ándi komersıalyq maqsatta paıdalaný, sonyń ishinde jarnamada qoldaný nemese úshinshi tulǵalarmen birge oryndaý úshin quqyq ıelenýshimen kelisim talap etiledi. Ázirge mundaı kelisim berilmegen.

Qazirgi tańda Álisherdiń otbasy máseleniń zańdy jaǵyn zerttep jatyr. Olar ózderiniń avtorlyq quqyqtaryn qorǵap, Nurtas komandasynyń áreketterine quqyqtyq baǵa berýdi kózdep otyr.

Qaırat Nurtastyń ustanymy

Qaırat Nurtastyń ókilderimen baılanysqanymyzda, olar bul másele boıynsha eshqandaı shaǵym nemese resmı ótinish almaǵandaryn habarlady. Olar avtorlyq quqyqqa qatysty kez kelgen máselege qurmetpen qaraıtyndaryn jáne konstrýktıvti dıalogqa ashyq ekenderin bildirdi.

Án týraly ne belgili?

YouTube Music derekteri boıynsha, ánniń kompozıtory – Samat Ryspanbet, mátin avtory – Qurmanǵazy Bahtıarqyzy. Quqyq ıesi retinde Kairat Nurtas Production kórsetilgen. Ánniń Qaırat Nurtastyń jeke oryndaýyndaǵy, Álisher Qaıratovpen dýet nusqasy jáne Núshamen birge oryndaǵan nusqasy bar. Núshamen birge oryndalǵan nusqasy YouTube-te 30 mıllıonǵa jýyq qaralym jınap, strımıng platformalarynda 3 mıllıonnan astam tyńdalymǵa ıe boldy.

Eske sala keteıik, ánniń mátin avtory Qurmanǵazy Bahtıarqyzy 2024 jyldyń qazan aıynda 49 jasynda qaıtys boldy. Ol óziniń shyǵarmashylyq jolynda 200-den astam hıt án jazǵan.