InfoHub Logo

Ortalyq qalasy Samarqan bolǵan. Ámir Temir óte jaýynger bolypty. Bir jylda alty memleketti shaýyp alypty, aqyrynda qalasyn almaqshy bolypty. Sultan Baıazıt degen kisini tize búktiripti. Soǵyspaı kóp oljamen qaıtypty. Qaıtyp kele jatqanda teńizdiń jaǵasynda balyq aýlap júrgen kedeıdiń on alty jasar balasyn alyp ketipti.

Samarqanǵa kelgennen keıin úlken toı jasaǵan. Sol toı jasap jatqan jerge jalań aıaq, jalań bas bir áıel kelip, Ámir Temirdiń aýlynda turǵan ýázirlerge:

— Meni bosat, — depti, — Ámir Temirge jolyǵatyn sharýam bar, alys joldan kelem, — depti. Ámir Temir bajyldap júrgen áıeldiń daýsyn estip, «bosat!» dep ýázirlerine ámir etipti.

— Ámir-Temir siz bolasyz ba? — depti.

— Men bolam, — depti.

— Sen Ámir bolsań, maǵan tájim et, basyńdy ı!

Ámir-Temir:

— Ne úshin tájim etem? — depti. Áıel bylaı depti:

— Jer júzine ǵylym taratqan grekten shyqqan Arıstoteldi tapqan kim? Ana! Qudaıdan shyqqan Muhammed paıǵambardy tapqan kim? Ana! Bir jylda alty memleketti ózine baǵyndyryp, jetinshi sultan Baıazıtty tize búktirgen kim? Men. Seni tapqan kim? Ana! Olaı bolsa, sol anany qurmettep tájim et!

Ámir Temir basyn ıedi. Sonan keıin jón suraıdy.

— Sen kimsiń?

— Men siz alyp ketken balanyń anasymyn.

Ámir Temir:

— Jolshybaı qıyn qystaý jerler bar, jyrtqysh ańdar bar, odan qalaı óttińiz?

— Eki emshegim ıip, zar eńirep jylap kele jatqanymda jyrtqysh ańdar da, Alla da raqym etti. Alty memleketti jeńip alyp otyrǵan siz de maǵan raqym etersiz.

Ámir Temir danyshpan áıeldiń balasyn berip, kóp oljamen eline aparyp salady.

---