InfoHub Logo

Kúnderdiń kúninde Ámir Temir el bıleýshi bolyp, joryqqa shyǵa bastaǵan kezinde Qoja Ahmet Iasaýı túsinde aıan beripti. «Sen meniń basyma ǵımarat turǵyz, meniń árýaǵym seni demep júredi», — depti. Sonda Ámir Temir: «Men seni qaıdan tabamyn?» — degende, — «Joldy men ózim kórsetip otyramyn», — degen eken. Sonymen [táýekelge] bel baılap, Ámir Temir Qoja Ahmetti izdep shyǵypty. Uzaq júrip, Túrkistan shaharyna kelgende, túsinde aıan berip, jatqan jerin aıtady. Tańerteń erterek baryp qarasa, shynynda da kishkene ǵana mazarat tur eken. Quran oqyp, ertesine is bastapty. Keshke deıin biraz dýal qalap qoıǵan eken, tańerteń barsa, buzylyp jatqanyn kóredi. Basyna qaraýyl qoıady. Tań aldynda uıyqtap ketip, kimniń buzǵanyn bilmeı qala beredi. Bolmaǵan soń úshinshi kúni ózi barady. Tań aldynda uıqy qysady, uıqyǵa boı aldyra bergen soń qolyn qanjarmen tilip jiberip, uıyqtamaý úshin tuz seýip qoıady. Sonymen bir kezde qarasa, úlken ógiz kelip, dýaldy maıqandap jatyr eken. Ne isterin bilmegen Ámir Temir oılanyp qalady. Túsinde Qoja Ahmet taǵy da aıan berip, bylaı depti: «Ol kók ógiz Arystan baptyń arýaǵy, saǵan qapalanyp buzyp tastap jatyr. Ol — meniń ustazym, sen onyń arýaǵyn attap óttiń, sol úshin aldymen onyń basyna ǵımarat turǵyz. Sodan soń maǵan qaıta kelersiń», — depti. «Men ony qalaı tabamyn?» — degende, — «Men ózim jol siltep otyramyn», — dep jaýap beredi.

Sonymen erte turyp, otyrarǵa bet alady. Keshke sonda jetip, uıyqtap jatqanda, túsinde aıan berip, jatqan jerin kórsetedi. Tań ata, erte basyna baryp, Quran oqyp, qurylysty salýǵa kirisedi. Bastalǵan qurylys oıdaǵydaı aıaqtalǵan soń, demalyp jatqanda jáne túsinde aıan
berip: «Mine, endi sátti boldy, endi kelip meniń basyma ǵımaratyńdy saldyra ber! — deıdi. Sonymen Túrkistanǵa qaıta kelip, Qoja Ahmet meshitin salýdy bastaǵan eken. Biraq qurylys jumystary jaqsy júrip jatqanda, Samarqanda basqa bir qaýyrt jumys shyǵyp, qurylys salyp jatqan usta sol jaqqa ketip, kóptegen sebeptermen qaıta oralmaǵan-dy. Sodan ǵımarat qurylysy tolyq bitpeı qalady. Sol kezden bastap Ámir Temir joryqqa shyǵar kezinde únemi Túrkistanǵa kelip, Ahmet Iasaýıdiń basyna zıarat etip, as berip, taıqazannan dám tatý ádetke aınalǵan eken. Sondaı bir saparmen kelgende, qatty syrqattanyp, osy jerde qaıtys bolǵan desedi. Onyń aıtqan óz ósıeti boıynsha, ol Samarqanǵa qaıtýy kerek edi. Biraq halyq arasynda shý shyqpasyn dep, bildirmeı, «Ámir naýqas» dep, jol júrip ketedi. Sol jolda otyrardan beri jaılasqan Temir stansasyna kelgende, bir demalys jasaǵan kórinedi. Sonyń qurmetine «Temir» atalyp ketipti. Sodan Temirlan degen jerge barǵanda, halyq Ámir Temirdiń qaıtys bolǵanyn bilip qoıyp, syr ashylǵan kórinedi. Mine «Temirlan» atalýy sodan shyqqan eken dep el ańyz etisedi.

---