Anadan alǵash týǵanymda,
Jyladym nege dabystap.
Kindikti kesip qıǵanynda,
Anamnan kettim alystap.

Aq buıymǵa orap alǵanynda,
Qundaqqa qoıdy tańyp sap.
Jyp-jyly sýǵa salǵanynda,
Denemdi ábden arýlap.

Emýdi qaıdan úırendim tap,
Emshekten sútti sorǵanda.
«Kish-kishke» nege kúldim unap,
Úsh aılyq bala bolǵanda.

Bir túnde jylap damyl bermeı,
Oıattym nege anamdy.
Emizgen ony qıyn kórmeı,
«Aldy ǵoı,– demeı,– mazamdy».

Aq sútke ábden toıǵanymda
Ashtyqty umyttym anyqtap.
Jylaýdy múlde qoıǵanymda
Uıqyda kúldim shalyqtap.

Týǵanda keıip jyladym men,
Sezdim be ómir syrlaryn.
Ómirdi súıip unadym men,
Bildim be mundaı qylaryn.

Aspanda kórip juldyz ben aı:
«Erjetsem,– dedim,– sony alam».
Ata-ana qaldy, ah, darıǵa-aı,
Kún boldy jer men – ata-anam.

Jylylyq, jaryq, nuryn berip,
Sezdirgen atam – kún sheber.
Balyna qosyp ýyn berip,
Ósirgen anam – qara jer.

«Muqtajdyq – ómir joly bul» dep,
Muńaıtyp aqyl jylatqan.
«Jas ómir – qyzyq, ony bil» dep,
Aldamshy úmit ýatqan.

«Tamaq pen kıim, at kerek» dep,
Ómirim ketti qıyndap.
Qumarlyq, maqtan qýyp em kep,
Kóbeıdi muqtaj jıyndap.

Osyny sezip jyladym men,
Anadan alǵash týǵanda.
Qyzyqtap ómir unadym men,
Saǵymdy sý dep qýǵanǵa.

Juldyz ben aıdy alamyn dep,
Aptyqtym nege jasymda.
Erkindik jolyn tabamyn dep,
Oılaǵan ekem basynda.

Jyladym ba eken álde sonda,
Azattyq kórmeı ólem dep.
«Kish-kishke» kúldim bilmeı onda,
Mazaqqa talaı kónem dep.

Tabylmas anyq azat adam,
Jaralys bıler zamandy.
Kórseter muqtaj, azap saǵan,
Tartqyzar ómir jazańdy.

Quldanar seni kúshti ókimet,
Noqtasyz erkin el tappaı.
Qorlyqta jylap, zarla da ót,
Bostandyq bolar jer tappaı.

Úkimet óshse, zalymdar kóp
Arlyǵa ómir súrgizbes.
Qarýly qasqyr qudaıyń bop,
Azattyq jolmen júrgizbes.

Ádilet, meıirim, ar men nysap,
Aty bar, olar elde joq.
Súıgenin istep, óziń unap,
Súretin ómir sende joq.

Kárilik jetse aıaý bilmeı,
Jas ómir kelmes qaıtadan.
Buzylmaı, ólmeı, ózgerilmeı,
Qalady deısiń kim aman?

Kindikti kesip tastamaǵy –
Jas ómir súıtip qıylǵan.
Aq buıymǵa oraı bastamaǵy –
Kebiniń sondaı buıymnan.

Qýystap salsa qundaǵyna,
Kiretin kórge uqsamaq.
Taǵdyr joq ólmeı turmaǵyńa,
Ómirdi ólim tusamaq.

Aldaýǵa kúlip qýanǵanyń –
Aldanyp ótpek adam ol.
Ashyǵyp emse, ýanǵanyń –
Ómirde kórmek isiń sol.

Qaıtseń de kórip qaıǵy, jumys,
Qazýly kóriń dap-daıyn.
Aılasyn tap ta, taza araq ish,
Joǵalar sonda bul ýaıym.

Taza aqyldy aıtar taza araq dep,
Mastyq dep aıtsa – tereń oı.
Osyǵan umtyl shyn entelep,
Qıanat, aldaý – bárin qoı.

Eńbekke shyda ebin tap ta,
Sabyrdyń túbi – sary altyn.
Ózimshil bolma, kópti ardaqta,
Adamnyń bári – óz halqyń.

Nysap pen meıirim, ádiletti,
Janyńdaı kórip jan saqta.
Ol jolda ólsek, nemiz ketti,
Maqsutqa jetpeı qalsaq ta.

Zulym bop eldi qyrsań-daǵy,
Qojańyz sebep bolmaı ma?
Patsa bop qansha tursań-daǵy,
Bir kúni ol dáýren solmaı ma?!

---